Prezıdenttiń aıtýynsha, bıyl kúshine engen Salyq kodeksi ekonomıkadaǵy ashyqtyq pen tártipti kúsheıtýge serpin berip otyr. Alǵashqy nátıjeler de kórine bastaǵan.
«Ekonomıka mınıstrliginiń málimetine sáıkes, ózin-ózi jumyspen qamtyǵandarǵa arnalǵan jańa salyq rejımi iske qosylǵaly beri 180 myńnan astam jańa salyq tóleýshi zań aıasynda áreket ete bastady», dedi Memleket basshysy.
Prezıdent: Konstıtýsııalyq komıssııanyń jumysy barynsha ashyq júrgizildi
Úkimettiń baǵalaýynsha, salyq reformasynyń nátıjesinde bıyl bıýdjetke qosymsha 4,4 trln teńge túsýi tıis. Alaıda Prezıdent bul kórsetkishterge qalaı jetý keregine aıryqsha toqtaldy.
«Belgilengen kórsetkishterge shamadan tys salyq salý, bıznesti zańsyz nemese negizsiz qyspaqqa alý esebinen jetýge bolmaıdy. Bıýdjetti tıimdi salyqtyq ákimshilendirý arqyly tolyqtyrýǵa bolady. Sondyqtan salyq júıesin jappaı sıfrlandyrýǵa shuǵyl kirisken jón», dedi Qasym-Jomart Toqaev.
Memleket basshysy salyq salasyndaǵy kózqarasty túbegeıli ózgertý qajettigin de ashyq aıtty. Onyń pikirinshe, jazalaýǵa negizdelgen eski ustanymnan arylatyn ýaqyt jetken.
«Jazalaýshy mentalıtetten arylatyn kez keldi. Salyq organdary men salyq tóleýshiler arasynda seriktestik jáne ózara senim qaǵıdaty ornyǵýǵa tıis. Memleket pen bıznestiń tıimdi yqpaldastyǵyn jolǵa qoıý kerek», dedi Prezıdent.
Osy máselege qatysty Memleket basshysy buǵan deıin «Turkistan» gazetine bergen suhbatynda jáne Qyzylordada ótken Ulttyq quryltaı otyrysynda naqty oı aıtqanyn eske saldy. Alaıda bul ustanymdardy barlyǵy birdeı tereń túsinbegenin de jasyrmady.
Toqaev: О́z basym merzimdi baspasózdi jas kezimnen úzbeı oqıtynym ras
«Internet uzaq mátinderdi oqýdan alystatty. Biraq bul memlekettik qyzmetkerlerge jaraspaıtyn ádet. Oqý kerek. Áıtpese, zeınet jasyna jetken kezde, oılaný qabiletinen aıyrylyp qalasyzdar», dedi Qasym-Jomart Toqaev.
Prezıdent salyqtyq ákimshilendirýdi sıfrlandyrýǵa qatysty naqty tapsyrmalar berdi. Onyń aıtýynsha, bankter, agregatorlar men marketpleıster salyqtyq baqylaý júıesine tolyq kirip, salyq agentteri mindetin atqarýǵa tıis. Sonymen qatar Memlekettik kirister komıteti tolyq sıfrlyq rejımde jumys isteıtin «fıskaldyq derekter fabrıkasyna» aınalýy qajet.
«2027 jyldyń sońyna deıin salyq jáne keden júıesin basqarýdyń sıfrlyq tásilin engizý qajet. Bul – strategııalyq mańyzy bar mindet», dedi Memleket basshysy.
Toqaev: Advokattardyń usynysymen Ata zań jobasyna advokatýra týraly jeke bap qosyldy
Sonymen birge Ulttyq taýarlar katalogy men Otandyq taýar óndirýshileri reestrin jedel iske qosý, taýarlardy sıfrlyq tańbalaý júıesin keńeıtý tapsyryldy. Prezıdent bul úderis óndiris pen bızneske zııan keltirmeýi keregin qadap aıtty.
«Mınıstrlikter qabyldaǵan jańa erejeler men sheshimder sheteldik jáne otandyq kompanııalardyń qyzmetine keri áser etpeýge tıis. Mundaı jaǵdaı ınvestısııalyq klımatty nasharlatady. Bul máselege baılanysty maǵan kompanııalardan hattar kelip jatyr», dedi Qasym-Jomart Toqaev.
Memleket basshysy salyq reformasy el ekonomıkasyn damytýǵa qyzmet etýi tıis ekenin taǵy bir márte naqtylap, Úkimetke osy baǵytta baıypty ári jaýapty jumys júrgizýdi tapsyrdy.
