Prezıdenttiń aıtýynsha, bilim salasynda «ekonomızasııa», ıaǵnı qarjyny beı-bereket jumsamaı, júıeli ári nátıjeli paıdalaný úderisin jalǵastyrý qajet. Bul rette balabaqshadan bastap ýnıversıtetterge deıingi barlyq deńgeıde memlekettik qarjylandyrýdyń tıimdiligin túbegeıli arttyrýǵa basymdyq berilýi tıis.
Memleket basshysy maman daıarlaý isi ekonomıkanyń naqty sektorlaryndaǵy ózgeristerden, ásirese jasandy ıntellekt pen jańa tehnologııalardy ıgerý qarqynynan qalyp otyrǵanyn synǵa aldy. Onyń aıtýynsha, oqý baǵdarlamalary men standarttar jańarǵansha, naryqtaǵy mamandyqtardyń ózi ózgerip ketedi.
Prezıdent tek IT mamandarynyń sanyn kóbeıtý nemese jalpy sıfrlyq daǵdylardy úıretý jetkiliksiz ekenin aıtty. Elge jasandy ıntellektini túrli salada tıimdi qoldana alatyn, naqty óndiris pen qyzmet kórsetý úderisterinde eńbek ónimdiligin arttyratyn kásibı kadrlar qajet.
Osyǵan baılanysty Memleket basshysy Úkimetke naqty tapsyrma júktedi. Jetekshi kompanııalarmen birlesip, memleket pen jeke seriktestik negizinde Ulttyq mamandyqtar transformasııasy ortalyǵyn qurý usynyldy. Prezıdent bul ortalyqty memlekettik emes kompanııalardyń konsorsıýmy basqarǵany durys ekenin atap ótti.
Astanada mektep oqýshylarynyń qaýipsizdigin jasandy ıntellekt baqylaıdy
Memleket basshysynyń pikirinshe, bıznes ókilderi naryq talabyn jaqsy biledi ári ózgeristerge tez beıimdeledi. Al Úkimet óz kezeginde erejelerdi aıqyndap, ashyqtyqty qamtamasyz etýge, suranysty naqtylaýǵa jáne tıimdi sheshimderdiń keńinen taralýyna jaǵdaı jasaı alady.
Prezıdent bul qadam bilim berý júıesin ekonomıkanyń naqty qajettilikterimen ushtastyryp, eldiń tehnologııalyq damýyna serpin beredi dep esepteıdi.
