Otyrysta Senat tóraǵasy buqaralyq aqparat quraldarynda jarııalanǵan jańa Konstıtýsııa jobasy keń aýqymdy qoǵamdyq talqylaýdyń nátıjesi ekenin atap ótti. Palata spıkeri bul qujat «Halyq únine qulaq asatyn memleket» tujyrymdamasynyń naqty nátıjesi ekenin de tilge tıek etti.
– Memleket basshysy 15 naýryzda jańa Konstıtýsııasynyń jobasy boıynsha respýblıkalyq referendým ótkizý týraly Jarlyqqa qol qoıdy. Bul – el damýynyń jańa kezeńin aıqyndaıtyn mańyzdy oqıǵa. Jańa Konstıtýsııa jobasy ashyq ári jan-jaqty talqylanyp, muqııat pysyqtaldy. Talqylaý barysynda azamattardyń usynystary barynsha eskerildi. Bul «Halyq únine qulaq asatyn memleket» tujyrymdamasynyń is júzindegi jarqyn kórinisi ekeni sózsiz. Sol arqyly Ádiletti Qazaqstannyń konstıtýsııalyq modeli qalyptasyp keledi. Aldaǵy ýaqytta Senat depýtattary jańa Ata zańymyz týraly referendýmdy ilgeriletý jumystaryna bir kisideı atsalysady. Osy rette Ádiletti Qazaqstannyń quqyqtyq negizi qalanatyn jaýapty kezeńde barsha otandastarymyz ózderiniń azamattyq ustanymdaryn bildirip, referendýmǵa belsendi qatysady dep senemiz, – dedi M.Áshimbaev.
Budan soń palata otyrysynda Naýryzbaı Baıqadamovtyń Qorqyt ata atyndaǵy Qyzylorda ýnıversıtetiniń rektory bolyp taǵaıyndalýyna baılanysty Senat depýtaty retindegi ókilettigin toqtatý týraly másele qaraldy. Senat tóraǵasy Naýryzbaı Baıqadamovqa palatanyń zań shyǵarý isine belsendi atsalysqany úshin alǵys bildirip, jańa qyzmetine sáttilik tiledi.
Sonymen qatar senatorlar Qyrǵyzstannyń Ystyqkól aımaǵyndaǵy menshik quqyqtaryn retteý týraly kelisimdi jáne jer ýchaskelerin jalǵa berý týraly kelisimdi ratıfıkasııalady. Endi Qazaqstan Qyrǵyz Respýblıkasynda ornalasqan sanatorıı, eki demalys úıi men sporttyq-deneshynyqtyrý ortalyǵyna ıelik etedi. Sporttyq ortalyqtan ózge 3-4 juldyzdy qonaqúılerde jańǵyrtý jumystaryn odan ári júrgize alady.
– Atalǵan zańdar Qyrǵyz Respýblıkasy aýmaǵynda ornalasqan kýrorttyq-rekreasııalyq nysandarǵa – «Qazaqstan» sanatorııine, «Samal» demalys úıine, «Ýnıversıtet» sporttyq-saýyqtyrý lagerine jáne «Olımp» sporttyq-saýyqtyrý ortalyǵyna – Qazaqstan Respýblıkasynyń menshik quqyǵyn retteýge jáne aıqyndaýǵa baǵyttalǵan. Sonymen qatar jalpy aýdany 58,8 gektardy quraıtyn osy nysandar ornalasqan jer telimderin jalǵa alý sharttaryn ózektendirý kózdelgen, – dedi senator Bekbol Orynbasarov.
Mundaǵy jer ýchaskeleri 49 jyl merzimge jalǵa beriledi. Al qyrǵyz tarapy nysandardy tárkilemeýge, olardyń maqsatqa saı paıdalanylatynyna kepildik beredi. Barlyq áreket «2006 jylǵy 4 shildedegi Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qyrǵyz Respýblıkasy Ystyqkól oblysynyń aýmaǵynda ornalasqan kýrorttyq-rekreasııalyq sharýashylyq obektilerine Qazaqstan Respýblıkasynyń menshik quqyqtaryn retteý týraly kelisimdi jáne 2006 jylǵy 4 shildedegi Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qyrǵyz Respýblıkasy Ystyqkól oblysynyń aýmaǵynda ornalasqan kýrorttyq-rekreasııalyq sharýashylyq obektilerine Qazaqstan Respýblıkasynyń menshik quqyqtaryn retteý týraly kelisimge ózgerister men tolyqtyrýlar engizý týraly hattamany ratıfıkasııalaý týraly» jáne «2009 jylǵy 1 jeltoqsandaǵy Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qyrǵyz Respýblıkasy Ystyqkól oblysynyń Ystyqkól aýdanyndaǵy jer ýchaskelerin jalǵa berý týraly shartty jáne 2009 jylǵy 1 jeltoqsandaǵy Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qyrǵyz Respýblıkasy Ystyqkól oblysynyń Ystyqkól aýdanyndaǵy jer ýchaskelerin jalǵa berý týraly shartqa ózgerister men tolyqtyrýlar engizý týraly hattamany ratıfıkasııalaý týraly» zań aıasynda júzege asyrylady.
Qujatta sondaı-aq materıaldyq-tehnıkalyq bazany nyǵaıtyp, kórsetiletin qyzmet sapasyn arttyrý úshin ınvestısııa tartý múmkindigi qarastyrylǵan. Jalpy, bul zań týrızm salasynyń damýyna serpin berip, Qazaqstan men Qyrǵyzstan arasyndaǵy ekijaqty yntymaqtastyqty odan ári nyǵaıta túspek.
Sondaı-aq Senat depýtattary Eýrazııalyq ekonomıkalyq odaq pen Mońǵolııa arasyndaǵy Ýaqytsha saýda kelisimin ratıfıkasııalady. Bul ásirese otandyq taýarlardyń Mońǵolııa naryǵyna kedendik baj salyǵynsyz shyǵýyna jol ashty. Jalpy, kelisim EEAO elderi men Mońǵolııa arasynda 367 taýarlarǵa qatysty ımporttyq kedendik bajdardy joıýdy kózdeıdi.
– Elimizden Mońǵolııaǵa temeki ónimderi, nan jáne kondıterlik ónimder, kofe men shaı, dárilik zattar, teledıdarlar, monıtorlar men proektorlar jetkiziledi. Al Qazaqstan Mońǵolııadan jylqy etin, kartop, poshta markalary men ózge de baǵaly qaǵazdardy, shulyq taýarlary, aıaqkıim jáne basqa da taýarlardy ımporttaıdy. Sondyqtan kelisimdi ratıfıkasııalaý aýyl sharýashylyǵy men ónerkásip sektorlarynyń damýyna oń áserin tıgizedi, – dedi senator Álibek Náýtıev.
Senatorlardyń aıtýynsha, EEAO elderi men Mońǵolııa arasynda alys-beris artyp, ózara saýda kólemi ulǵaımaq.
