Sýretti túsirgen – Jangeldi ÁBDIǴALYM
Kezdesýge oblys ákimi Ermaǵanbet Bólekpaev qatysyp, Konstıtýsııany jańartý jaı ǵana quqyqtyq túzetý emes, zamanaýı tehnologııalyq, jahandyq ózgerister jaǵdaıynda memlekettilikti nyǵaıtýdyń strategııalyq qadamy ekenin atap ótti. Aımaq basshysynyń aıtýynsha, reformalardyń tabysty júzege asýy jastardyń belsendi ustanymyna tikeleı baılanysty.
Konstıtýsııalyq komıssııa músheleri Nurken Kobjanov pen Bekzat Altynbekov komıssııa jumysynyń barysyna toqtalyp, ózgeristerdi ázirleý barysynda qoǵamdyq talqylaýǵa basymdyq berilgenin jetkizdi.
«Halyqtyq Konstıtýsııa» ataýy kezdeısoq emes. Negizgi zańdaǵy árbir ózgeris qoǵamnyń naqty suranysyna jaýap berýge tıis. Osy maqsatta óńirlerde kezdesýler ótkizilip, usynystar jınaqtalyp jatyr. Bul tásil saıası sheshimderdiń ashyqtyǵyn arttyryp, bılik pen qoǵam arasyndaǵy senimdi nyǵaıtýǵa baǵyttalyp otyr.
Kezdesýde sóz alǵan «Taldaý Qaraǵandy» óńirlik taldaý mektebiniń túlegi Asyljan Tólegenov Konstıtýsııa deńgeıinde ekologııalyq qaǵıdattardy bekitýdiń mańyzyn atap ótti. Indýstrııalyq aımaq úshin qorshaǵan ortany qorǵaý máselesi ózekti. Ekologııalyq jaýapkershilikti negizgi zańda naqtylaý – uzaqmerzimdi damý kepili.
Al oblystyq Jastar isi jónindegi keńes múshesi Janbota Elýbaev zııatkerlik menshikti qorǵaý tetikterin kúsheıtý qajettigin aıtty. Onyń pikirinshe, jastardyń ǵylymı, tehnologııalyq jáne kreatıvti bastamalary senimdi quqyqtyq negizge súıenýge tıis. Bul – ınnovasııalyq ekonomıka qalyptastyrýdyń alǵysharty.
Jıyn barysynda qatysýshylar konstıtýsııalyq reformalardyń baǵyttary boıynsha pikir bildirip, ózderin tolǵandyrǵan saýaldarǵa jaýap aldy. Ashyq formattaǵy dıalog óńirlik deńgeıde saıası mádenıettiń nyǵaıyp kele jatqanyn kórsetti.
Qaraǵandydaǵy bul kezdesý reformalardyń ortalyq deńgeıde emes, aımaqtarda da keńinen talqylanyp jatqanyn aıǵaqtaıdy. Halyqtyq Konstıtýsııa ıdeıasy quqyqtyq qujattan góri keń uǵymdy bildiredi. Ol – ádilettilikke, ashyqtyqqa ári progreske negizdelgen jańa qoǵamdyq kelisimniń kórinisi. El damýynyń kelesi kezeńi dál osyndaı mazmundy, salmaqty qoǵamdyq dıalog arqyly aıqyndalatyny anyq.
Qaraǵandy oblysy
