Jaqynda Germanııada ótken Grüne Woche 2026 halyqaralyq kórmesine qatysqan qaýymdastyq, aportqa eýropalyq seriktesterdiń qyzyqqanyn aıtty. Tek alma emes, odan jasalǵan ónimder de eýropalyqtardyń nazaryna ilikken.
Búginde Almaty aportyn óndirýshiler qaýymdastyǵyna 8 sharýashylyq kiredi. Jyl saıyn olar 1500-2000 tonna ónim óndiredi. Ázirge eksport kólemi tómen. Sondyqtan jańa memorandým turaqty eksport júıesin qalyptastyrýǵa baǵyttalǵan mańyzdy qadam.
Qaýymdastyq prezıdenti Roman Safarovtyń aıtýynsha, Berlındegi kórmege saýda saıasatyn damytý ortalyǵynyń shaqyrýymen qatysqan.
«Aporttyń basty ereksheligi onyń tabıǵatynda. Bul jappaı ósiriletin, uzaq saqtaýǵa arnalǵan sort emes. Aport iri, dámi qanyq, hosh ıisi erekshe bolyp keledi. Bizdiń alma baqtar teńiz deńgeıinen 850 metrden joǵary ornalasqan. Almanyń dámine taýly aımaqtyń klımaty áser etedi», deıdi Roman Safarov.
Berlınde ótken kórme aporttyń eksporttyq áleýetin naqty kórsetti. Ásirese, qosylǵan quny joǵary óńdelgen ónimderge qyzyǵýshylyq basym bolǵan. Olardyń qatarynda pastıla, alma chıpsy, shyryn, sirke sýy jáne keptirilgen alma bar.
«Almaty aporty geografııalyq kórsetkish retinde tirkelgen. Bul mártebe onyń tabıǵı ereksheligin qorǵaıdy. Almatynyń taý bókterindegi topyraq, taza sý jáne temperatýra ónim sapasyn qalyptastyrady. Geografııalyq kórsetkish brendti shetelde premıým ónim retinde ilgeriletýge múmkindik beredi», deıdi saýda saıasatyn damytý ortalyǵnyń bas dırektory Aıtmuhammed Aldajarov.
Memorandým aıasynda Saýda jáne ıntegrasııa mınıstrligine qarasty QazTrade uıymy aport óndirýshilerdi syrtqy naryqta súıemeldeıdi. Halyqaralyq kórmelerge qatysý, kelissóz júrgizý jáne seriktes tabý baǵytynda qoldaý kórsetedi. Júıeli jumys arqasynda aporttyń geografııasy keńeıip, qosylǵan quny joǵary ulttyq brendke aınalady dep boljanyp otyr.
