Semınarǵa Mádenıet jáne aqparat mınıstrligi Arhıv, qujattama jáne kitap isi komıtetiniń tóraǵasy Rýstam Alı qatysyp, kitaphana salasyn sıfrlyq jańǵyrtýdyń strategııalyq mańyzyn atap ótti. Ol aqparattyq qoǵam jaǵdaıynda kitaphanalardyń tek mádenı oshaq emes, ulttyq zııatkerlik ınfraqurylymnyń mańyzdy bóligine aınalyp otyrǵanyn aıtty.
Al Ulttyq kitaphana dırektory Ǵazıza Qudaıbergenqyzy kitaphana isinde tehnologııalardy tıimdi ári saýatty paıdalanýdyń mańyzyn aıryqsha atap ótti. Sıfrlyq quraldar kitaphanashynyń ornyn almastyrý úshin emes, kerisinshe onyń kásibı eńbegin jeńildetip, qyzmet aıasyn keńeıtýge jáne jańa múmkindikterge jol ashýǵa baǵyttalýy tıis ekenin jetkizdi.
Semınardyń alǵashqy kúni jasandy ıntellekt quraldaryn kitaphana qyzmetine beıimdeýge arnaldy. Qatysýshylar katalogtaý úderisin jetildirý, izdeý júıelerin ońtaılandyrý, elektrondyq qorlardy qalyptastyrý jáne tolyqmátindi qujattarmen jumys isteý tájirıbesimen bólisti.
Ulttyq kitaphananyń Ǵylymı-ádistemelik qyzmetiniń kitaphanashysy Nurlyhan Jumahan ChatGPT platformasyn kásibı mindetterge paıdalaný, Custom GPT negizinde kitaphanaǵa arnalǵan sıfrlyq kómekshiler ázirleý joldary týraly mazmundy baıandama jasady. Sonymen qatar sheberlik saǵatynda LibLab avtorlyq jobasy tanystyryldy. LibLab – jasandy ıntellekt negizinde ázirlengen sıfrlyq qural. Ol bıblıografııalyq sıpattama jasaýǵa, katalogtaý úderisin ońtaılandyrýǵa, aqparattyq suranystarǵa jedel jaýap berýge, mátinderdi taldaýǵa jáne resmı qujattar ázirleýge qoldaý kórsetedi. Joba kitaphanashynyń kúndelikti eńbegin jeńildetip qana qoımaı, kásibı sapany jańa deńgeıge kóterýdi maqsat etedi.
Sondaı-aq Ulttyq kitaphananyń Aqparattyq resýrstar qyzmetiniń jetekshisi Tolqyn Zamzaeva katalogtaý jáne zııatkerlik izdeý júıeleri boıynsha praktıkalyq keıster usynyp, derektermen jumys isteýdiń zamanaýı tásilderin kórsetti. Semınardyń ekinshi kúni normatıvtik jáne tehnologııalyq baǵyttarǵa arnaldy. Elektrondyq qujattardy tirkeý men uzaqmerzimdi saqtaý talaptary, qazaqstandyq katalogtaýdyń bolashaǵy, kásibı standarttardy jetildirý máseleleri jan-jaqty talqylandy.
Ulttyq kitaphanada Joltaı Álmashulynyń jańa kitaptary tanystyryldy
Ulttyq kitap palatasy dırektorynyń orynbasary Tolqyn Sálmenbaeva basylymdardy halyqaralyq sáıkestendirý júıeleri – ISBN, ISSN jáne ISMN erekshelikteri, ulttyq baspasózdi tirkeý jáne esepke alý tetikteri týraly baıandady. Al Ulttyq akademııalyq kitaphana dırektorynyń orynbasary Nurjan Joldybalınov «Qazaqstandyq Ulttyq elektrondyq kitaphana (QazUEK) – jasandy ıntellekttiń jańa quraldary» taqyrybynda baıandama jasap, sıfrlyq resýrstardy júıeleý, derekterdi taldaýdyń zamanaýı tásilderi jáne oqyrmanǵa baǵyttalǵan aqyldy qyzmetterdi damytý joldaryn tarqatty. Osylaısha eki kúndik semınar kitaphana salasynyń sıfrlyq bolashaǵyn aıqyndap, kásibı ortada jańa serpin týdyrdy.
