Basty foto: stayersportswear.com Mátin ishindegi sýretter: olympic.kz/ru, TSM
Bıyl otandastarymyz el tarıhyndaǵy toǵyzynshy qysqy Olımpıadada óner kórsetti. Buǵan deıingi qysqy Olımpıada oıyndarynda altyn júlde tek Norvegııanyń Lıllehamer qalasynda ótken dodada qorjynǵa túsken edi. Elimiz úshin erekshe júldeni shańǵyshy Vladımır Smırnov enshilegen. Al Italııa tórindegi mánerlep syrǵanaýshy Mıhaıl Shaıdorovtyń altyny Qazaqstan enshisine 32 jyldan keıin buıyrdy.
Qysqy Olımpıada: Qazaqstan quramasynyń nátıjeleri
Jerlesterimiz 1994 jyly Norvegııanyń Lıllehamer qalasynda ótken qysqy Olımpıadaǵa tuńǵysh ret qatysyp, bir altyn jáne eki kúmis medaldi qanjyǵalady. Osylaısha, elimiz jalpy komandalyq esepte 12-orynǵa taban tiredi. Úsh júldeni de el qorjynyna shańǵyshy Vladımır Smırnov saldy. Atalǵan Olımpıadada el atynan 29 sportshy sporttyń segiz túrinen baq synaǵan edi.
Araǵa tórt jyl salyp sportshylarymyz Japonııanyń Nagano qalasynda ótken Aq Olımpıadaǵa attandy. Baıraqty básekede 60 sportshynyń ishinde taǵy da shańǵyshy Vladımır Smırnov daralanyp, el qorjynyna qola júlde saldy. Sol saıysta buıyrǵan ekinshi qolany konkımen júgirý sportynyń ókili Lıýdmıla Prokasheva ıelendi. Qolany qanaǵat tutqan qurama bul joly týrnırlik kesteniń 20-shy satysyna jaıǵasty.
2002 jáne 2006 jylǵy qysqy Olımpıada AQSh-tyń Solt-Leık-Sıtı jáne Italııanyń Týrın qalasynda ótti. Muhıttyń arǵy betindegi oıyndarǵa Qazaqstan quramasynan 52 sportshy, Týrındegi básekege 43 sportshy qatysty. О́kinishke qaraı, eki Olımpıadada da el sporshylary jeńis tuǵyrynan kórine almady.
2010 jyly Kanadanyń Vankýver qalasynda jalaýy jelbiregen Aq Olımpıadada 37 sportshymyz baq synap, bir kúmis júlde ǵana buıyrdy. Jalǵyz júldeni bıatlon básekesinde óner kórsetken Elena Hrýstaleva jekeleı saıysta enshiledi.
2014 jyly Reseıdiń Sochı qalasynda ótken jahandyq jarysta da jalǵyz medal qolǵa tústi. Olımpıadanyń sońǵy kúnderinde muz aıdynǵa shyqqan mánerlep syrǵanaýshy Denıs Ten úshinshi tuǵyrdan kórinip, elimizge qola medal syılap qýantty. Bul olımpıadaǵa jalpy sany 51 sportshy attanǵan edi.
2018 jylǵy Olımpıada Koreıa Respýblıkasynyń Phıonchhan qalasynda uıymdastyrylyp, jarysqa Qazaqstan quramasy sapynan 44 sportshy qatysty. Bul Olımpıadada Qazaqstan quramasynyń qorjyny bos qaıtqan joq. Frıstaıl-mogýl ókili Iýlııa Galysheva 77,40 upaı jınap, Phıonchhan Olımpıadasynyń qola júldegeri atandy.
Al 2022 jyly Aq Olımpıada alaýy Qytaıdyń Beıjiń qalasynda tutandy. Bul dodaǵa Qazaqstan quramasynan 34 sportshy (17 er, 17 áıel) qatysty. Buǵan deıingi Solt-Leık-Sıtı (AQSh) jáne Týrın (Italııa) Olımpıadalary sekildi bul básekede de otandastarymyz júldesiz qaldy. Degenmen, short-trekshi Abzal Ájiǵalıev tórtinshi satyǵa taban tirep, júldege bir qadam jetpeı toqtady. Sondaı-aq aralas estafetadaǵy otandyq short-trek komandasy Abzal Ájiǵalıev, Denıs Nıkısha, Olga Tıhonova, Iаna Han besinshi orynnan kórindi.
Mılan jáne Kortına-2026: Shaıdorov shyńy. Úzdik ondyq
Italııanyń qos qalasynda ótken XXV qysqy Olımpıadada ulttyq qurama sapynda 10 dıssıplına boıynsha 18 er, 18 áıel, jalpy jıyny – 36 sportshy jarys jolyna shyqty. Tórtjyldyqtyń basty básekesine elimizdiń 11 óńiri, Almaty, Astana jáne Shymkent qalalary, sondaı-aq Aqmola, Shyǵys Qazaqstan, Almaty, Pavlodar, Qostanaı, Soltústik Qazaqstan, Qaraǵandy jáne Abaı oblystary úkilep úmit qosty. Bul kórsetkish elimizde qysqy sport geografııasynyń keńeıip kele jatqanyn aıqyn ańǵartty. Týrızm jáne sport mınıstrliginiń málimetinshe, 2022 jylǵy qysqy oıyndarǵa – 10 óńirdiń, 2018 jyly – 9 óńirdiń, al 2014 jyly – 10 óńirdiń ókilderi qatysqan.
Otandyq sport úshin bıylǵy Olımpıadanyń eń iri jetistigi 13 aqpan kúni tirkeldi. Sol kúni otandasymyz Mıhaıl Shaıdorov mánerlep syrǵanaýdan Olımpıada chempıony atandy. Bul – Qazaqstannyń qysqy Olımpıadada keıingi 32 jylda jeńip alǵan altyn medali ári mánerlep syrǵanaýdan el tarıhyndaǵy alǵashqy Olımpıada chempıony. Buǵan deıin mánerlep syrǵanaýdan Qazaqstan qorjynynda tek qola júlde bolǵan. Jóni bólek ol júldeni elimizge 2014 jylǵy qysqy Olımpıadada Denıs Ten tartý etken.
Erkin baǵdarlamada jerlesimiz erkin kósildi. Mıhaıl áý basta tórt aınalym elementin tórt márte jasaımyn degenmen, muz ústinde bes ret tórt aınalym elementin, odan keıin úsh aınalym akselge tórt aınalym salhov elementin qosa sátti oryndady. Júlde jolynda mánerlep syrǵanaýshylardyń eshbiri bul elementti qaıtalaı alǵan joq. Otandasymyz erkin baǵdarlamada Qazaqstannyń halyq ártisi Dımash Qudaıbergenniń oryndaýyndaǵy týyndynyń áýenimen óner kórsetip, qos saıys qorytyndysy boıynsha 291,58 upaımen kósh bastady.
Budan bólek otandastarymyz qysqy sport túrlerine mashyqtanǵan álem elderiniń ókilderine laıyqty qarsylyq tanytty. Birneshe otandasymyz úzdik ondyqtan oıyp oryn aldy. Máselen, 19 jastaǵy mánerlep syrǵanaýshy Sofıa Samodelkına Olımpıadadaǵy debıýtinde 207,46 upaı jınap, jeke rekordyn jańartyp, 10-oryn ıelendi. Bul – Qazaqstan tarıhyndaǵy áıelder arasyndaǵy mánerlep syrǵanaýdan Olımpıadadaǵy eń joǵary nátıje. Konkımen júgirýden Nadejda Morozova 3000 metr qashyqtyqta 6-oryn, 5000 metrde 10-oryn alyp, 1998 jyldan bergi otandyq konkıshilerdiń eń úzdik kórsetkishin tirkedi. Elızaveta Golýbeva 1500 metrde 7-nátıje kórsetip, 3000 metrde úzdik ondyqqa endi. Sonymen qatar áıelder quramasy komandalyq jarysta Olımpıadanyń eń úzdik segiz komandasynyń qataryna qosyldy.
О́zge sport túrlerinde de aıtarlyqtaı ilgerileý baıqalyp otyr. Shańǵymen tuǵyrdan sekirýden 19 jastaǵy Ilıa Mızernyh úlken tramplınde 8-oryn alyp, osy sport túri boıynsha Qazaqstannyń Olımpıada tarıhyndaǵy eń úzdik nátıjesin kórsetti. Short-trekte Denıs Nıkısha 500 metr qashyqtyqta 7-orynǵa ıe bolyp, aldyńǵy Olımpıadadaǵy nátıjesin jaqsartty.
Frıstaıl-mogýlda birden eki sportshymyz úzdik ondyqqa endi: Anastasııa Gorodko 8-oryn, Pavel Kolmakov 9-oryn alyp, 2022 jylǵy oıyndardaǵy kórsetkishterin oń tarapqa jaqsartty. Sondaı-aq konkımen júgirý saıysynda Evgenıı Koshkın 500 metr qashyqtyqta 9-oryn, frıstaıl-akrobatıkadan (mıkst) komandalyq básekede jerlesterimiz 7-orynǵa taban tiredi.
Osylaısha, Qazaqstan quramasy qysqy sport túrlerinde dástúrli túrde júlde alyp, úzdikter qatarynda júretin Fınlıandııa men Belgııa quramalaryn artta qaldyrdy.
