Foto: Úkimet, telegram
Baý-baqsha kooperatıvteri jáne QQS
Kún tártibindegi alǵashqy másele – baý-baqsha qoǵamdarynyń QQS boıynsha esepke turý mindeti. QQS boıynsha mindetti tirkeý sheginiń 40 mln teńgege deıin tómendeýine baılanysty tutyný kooperatıvi túrinde tirkelgen kommersııalyq emes uıymdar arasynda alańdaýshylyq týyndaǵan.
Qarjy vıse-mınıstri Erjan Birjanovtyń túsindirýinshe, tutyný kooperatıvi múshelik jarna esebinen ortaq shyǵyndy jabý úshin qurylǵan azamattar birlestigi bolyp sanalady. Múshelik jarnalar taýar ne qyzmet úshin tólem retinde tanylmaıdy, tıisinshe QQS salynatyn aınalymǵa jatpaıdy. Sondyqtan múshelik jarna túsken kezde QQS eseptelmeıdi jáne shot-faktýra jazylmaıdy.
Demek, kooperatıv tek jarna jınaýmen jáne ony músheleriniń ortaq qajettiligine jumsaýmen shektelse, QQS boıynsha esepke turý talaby qoıylmaıdy. Al qosymsha kásipkerlik qyzmet júrgizip, taýar ne qyzmet satýdan tabys tapqan jaǵdaıda ǵana salyq mindettemesi týyndaıdy.
Iri salyq bereshegi bar tulǵalarǵa elden shyǵýǵa tyıym salynady
JJM ımporty kezinde QQS-tan bosatý
Jıynda halyqaralyq tasymaldaýda áýe kemeleri paıdalanatyn janar-jaǵarmaı materıaldaryn ımporttaý kezinde QQS-tan bosatý máselesi de qaraldy. Jańa Salyq kodeksiniń 479-babynda mundaı operasııalarǵa qatysty dıplomatııalyq nemese konsýldyq mekemelerdiń otyndy maqsatty paıdalanǵanyn qosymsha rastaý talaby kózdelgen.
Alaıda otyrysqa qatysýshylar bul shartty artyq ákimshilik kedergi dep baǵalady. Nátıjesinde artyq rásimderdi boldyrmaý maqsatynda atalǵan talapty qoldanbaý jóninde sheshim qabyldandy.
Rezıdent emesterdiń qyzmeti boıynsha shot-faktýra
Sonymen qatar 2026 jyldan bastap rezıdent emesterden jumystar men qyzmetterdi satyp alý kezinde shot-faktýra rásimdeý talaby engiziledi. Bul rette QQS tóleýshiler men tólemeıtinder úshin tártip ártúrli bolmaq. Memlekettik kirister komıteti atalǵan normalardyń qoldanylý tártibi jóninde aldaǵy ýaqytta resmı túsindirme beredi.
О́zin-ózi jumyspen qamtyǵandarmen ózara is-qımyl
О́zin-ózi jumyspen qamtyǵandarmen jumys isteý barysynda shyǵystardy shegerimge jatqyzý máselesi de jan-jaqty talqylandy. Atap aıtqanda, jalpyǵa birdeı belgilengen rejımde jumys isteıtin jaýapkershiligi shekteýli seriktestiktiń quryltaıshysy bolyp tabylatyn jeke tulǵamen, eger ol ózin-ózi jumyspen qamtyǵandarǵa arnalǵan arnaýly salyq rejımin qoldansa, jasalǵan shart boıynsha shyǵystardy korporatıvtik tabys salyǵy (KTS) boıynsha shegerimge jatqyzý múmkindigi qarastyryldy.
Qoldanystaǵy Salyq kodeksinde mundaı shyǵystardy shegerýge tyıym salynbaǵan. Jeke tulǵanyń, onyń ishinde quryltaıshynyń qosymsha mártebesi shegerimnen bas tartýǵa negiz bolmaıdy.
Degenmen ózin-ózi jumyspen qamtý rejımi bastapqyda ózge kásipkerlik qyzmet júrgizbeıtin azamattarǵa arnalǵany, al eńbek qatynastaryn azamattyq-quqyqtyq sharttarmen almastyrýǵa jol berilmeıtini atap ótildi. Bul másele aldaǵy otyrystarda qaıta qaralmaq.
Aýyl sharýashylyǵy ónimin rastaý tetikteri
Jıynda arnaıy salyq rejımin qoldanatyn sharýa qojalyqtarynyń ónim óndirisin rastaý tetikteri de sóz boldy. Mundaı sharalar aýyl sharýashylyǵy ónimderin ótkizý kezinde «sur» ımporttyń jolyn kesý úshin qajet.
Mal sharýashylyǵynda maldyń shyǵý tegi aqparattyq júıeler arqyly aıqyndalady, al egin sharýashylyǵynda qadaǵalaý júıesi jumys isteıdi. Degenmen ónimdi rastaý mehanızmin naqtylaý qajettigi aıtyldy. Másele beıindi memlekettik organmen birlesip pysyqtalyp, Jobalyq keńseniń kelesi otyrysyna usynylady.
Jobalyq keńeste qaralǵan bastamalar salyqtyq ákimshilendirýdi ońtaılandyrýǵa, artyq kedergilerdi azaıtýǵa jáne kóleńkeli aınalymdy qysqartýǵa baǵyttalǵan. Jańa Salyq kodeksin tıimdi iske asyrý osy ustanymdarǵa negizdelmek.
