Foto: senate.parlam.kz
Senat Tóraǵasy atap ótkendeı, konstıtýsııalyq reforma – aıryqsha mańyzǵa ıe tarıhı oqıǵa jáne demokratııany nyǵaıtý jolyndaǵy naqty qadam. Jańa Konstıtýsııa – Memleket basshysynyń bastamasymen qolǵa alynǵan reformalardyń tikeleı nátıjesi. Bul ózgerister saıası ınstıtýttardy qaıta jańǵyrtyp, Qazaqstannyń tıimdi ári zamanaýı basqarý úlgisine kezeń-kezeńimen kóshýin qamtamasyz etedi.
«Konstıtýsııalyq reforma – Prezıdentimiz Qasym-Jomart Kemeluly Toqaevtyń elimizdiń saıası júıesin aýqymdy jáne keshendi jańǵyrtýǵa arnalǵan bastamalarynyń zańdy ári dáıekti jalǵasy. Jańa Konstıtýsııa jobasy zań men tártip qaǵıdatyna, azamattardyń múddesi men quqyqtaryna taban tireıdi. Jalpy, bul sheshim – zamanaýı memleket modeline ótý jolyndaǵy sanaly jáne batyl qadam. Ata Zańdaǵy konseptýaldy ózgertýlerdiń biri adam quqyqtary men bostandyqtary memlekettiń eń joǵary qundylyǵy retinde bekitilýi ekenin atap ótken jón. Jańa konstıtýsııadaǵy dál osy qaǵıda memlekettik qurylymnyń barlyq júıesiniń negizin qalyptastyrady», dep Máýlen Áshimbaev máslıhat depýtattarymen birlesip atqaratyn aldaǵy ortaq mindetterdi tilge tıek etti.
Saýalnama: Respondentterdiń 86,5%-y jańa Konstıtýsııa jobasyn qoldaıdy
Máýlen Áshimbaev sondaı-aq óńirdiń óndiristik jáne ǵylymı áleýetine erekshe nazar aýdaryp, qorshaǵan ortany qorǵaý salasyndaǵy syn-qaterlerge de toqtaldy. Sondaı-aq ol jańa Konstıtýsııadaǵy ekologııalyq normalar halyqtyń densaýlyǵyn saqtaýdy jáne kásiporyndardyń jumysyna ınnovasııalyq tehnologııalardy engizýdi qamtamasyz etetin strategııalyq mańyzǵa ıe ekenin aıtty.
«Jańa Konstıtýsııadaǵy ekologııalyq erejelerdiń Shyǵys Qazaqstan úshin mańyzy zor. Alǵash ret tabıǵatqa qamqorlyq tanytý memlekettiń irgeli qundylyqtarynyń biri retinde bekitildi. Ornyqty damý, ekologııalyq qaýipsizdik jáne keler urpaqqa qamqorlyq jasaý – Qazaqstannyń strategııalyq tańdaýy. Sondaı-aq bul – zamanaýı standarttardy engizý, ozyq tehnologııalarǵa kóshý jáne ekologııalyq eseptiliktiń ashyqtyǵyn qamtamasyz etý degen sóz. Búginde memleket ǵylymdy, bilimdi, ekologııalyq bastamalardy, jańa tehnologııalar men sıfrlyq sheshimderdi belsendi qoldap otyr. Dál osy baǵyttar elimizdiń jahandyq básekege qabilettiligin arttyrady. Munyń bári Ádiletti Qazaqstan ıdeıasyn júzege asyrýdyń jarqyn kórinisi ekeni anyq», dedi Palata Tóraǵasy.
Baqytgúl Qambar: Jańa Konstıtýsııa halyqaralyq normalarǵa tolyq sáıkes keledi
Is-sharalarda jańa Ata Zań elimizdiń uzaqmerzimdi turaqtylyǵy men ulttyq qaýipsizdigin qamtamasyz etetin jáne serpindi damýǵa negiz bolatyn saıası qurylymdy qalyptastyratyny týraly da sóz boldy. Jastarmen jáne etnomádenı birlestikter ókilderimen kezdesýde konstıtýsııalyq ózgerister búgingi jahandyq syn-qaterler jaǵdaıynda tıimdi jumys isteıtin saıası júıe qurýǵa baǵyttalǵany aıtyldy. Máýlen Áshimbaev bul reformalardyń sapaly júzege asyrylýy, jalpy eldiń damýy jastardyń qoǵamdyq-saıası úderisterge sanaly túrde qatysýyna jáne olardyń bastamashyldyǵy men kásibı qabiletterine tikeleı baılanysty ekenin de atap ótti.
«Prezıdentimiz Qasym-Jomart Kemeluly Toqaev eńbekqorlyq, kásibı biliktilik, jasampazdyq jáne úzdiksiz bilim alý qundylyqtarynyń mańyzyna únemi basa mán berip keledi. Bul qaǵıdattar Memleket basshysy usynǵan «Adal azamat» tujyrymdamasynda kórinis tapqan. Ol Abaıdyń «Tolyq adam» ilimimen úndesetini belgili. Búginde jastardyń belsendilik tanytyp, qoǵamdyq talqylaýlarǵa qatysýy, dıalog mádenıetin ilgeriletýi jáne eldiń bolashaǵyna jaýapkershilikpen qaraýy asa mańyzdy. О́ıtkeni, reformalardyń tabysty júzege asýy jáne Qazaqstannyń ári qaraı qarqyndy damýy jas býynnyń ustanymyna tikeleı baılanysty», dedi Máýlen Áshimbaev.
Ol óz sózinde Senat janynda bes jyldan beri jumys istep kele jatqan, sondaı-aq, jas mamandardyń taldaý qabiletin jetildirýge baǵyttalǵan Sarapshylar klýby men Taldaý mektebiniń qyzmetine de toqtaldy.
Sapar aıasynda Senat Tóraǵasy D.Serikbaev atyndaǵy Shyǵys Qazaqstan tehnıkalyq ýnıversıtetiniń, О́skemen tıtan-magnıı kombınatynyń jáne «Vostok-moloko» korporasııasynyń ujymdarymen kezdesti. Sondaı-aq Lý Ban sheberhanasyna at basyn buryp, «Avtomobılderdiń SMART-tehnologııasy» zerthanasynyń qyzmetimen tanysty.
