Delegasııany Premer-mınıstrdiń orynbasary – Mádenıet jáne aqparat mınıstri Aıda Balaeva bastap bardy. Kezdesýge Qazaqstan Respýblıkasy Parlamentiniń depýtattary, Konstıtýsııalyq komıssııa ókilderi jáne basqalary qatysty.
Jıynda jańa Konstıtýsııa jobasy men aldaǵy referendýmǵa qatysty túsindirý jumystary júrgizildi. Qatysýshylar aıqyn erejeler ústemdik etip, azamattardyń quqyqtary qorǵalatyn, qoǵam men bılik arasyndaǵy senim nyǵaıatyn turaqty jáne ádiletti memleket qurýdaǵy Ata Zańnyń rólin talqylady.
Aıda Balaeva zamanaýı óndiris úshin sıfrlandyrýdyń, ekologııalyq jaýapkershiliktiń jáne adamı kapıtaldy damytýdyń mańyzyna toqtalyp, atalǵan basymdyqtar jańa Konstıtýsııa jobasynda kórinis tapqanyn jetkizdi.
«Bul adam úshin de, óndiris úshin de mańyzdy. Sebebi derekter qaýipsizdigi, úderisterdiń turaqtylyǵy men senim kúndelikti ómirdiń ajyramas bóligine aınaldy. Qazirgi zamanǵy zaýyt úshin sıfrlandyrý men avtomattandyrý – tek tıimdilik emes, sonymen birge jaýapkershilik: tehnologııalyq úderisterdi qorǵaý, basqarýshylyq, senimdilik pen sapanyń kepili. Tabıǵatqa janashyrlyq, eńbek qaýipsizdigi men óndiristik standarttardy saqtaý da aıryqsha mánge ıe. Qazirgi ekonomıka tehnologııalyq damýdy jáne ekologııalyq jaýapkershilikti talap etedi. Konstıtýsııada bekitiletin qundylyqtar ortaq baǵdardy aıqyndaıdy. Qarqyndy damý zamanynda da adam qurmet kórsetýi, zań men tártipke adal bolý jáne bolashaq aldyndaǵy jaýapkershilikti sezinýi qajet. Sonymen qatar adamı kapıtaldy – bilimdi, ǵylymdy, ınnovasııalardy damytý basymdyǵy erekshe atap ótilgen. Elektrotehnıkalyq sala úshin bul qaǵıdattardyń máni zor. Zamanaýı óndiris quzyrettilikke, ınjenerlik oılaýǵa jáne sapa mádenıetine súıenedi», dedi Aıda Balaeva.
Qazaqstan Respýblıkasy Parlamenti Májilisiniń depýtaty, «AMANAT» partııasy fraksııasy jetekshisiniń orynbasary Erlan Saırov jańa Konstıtýsııanyń negizgi erekshelikteriniń biri – onyń memlekettik tilde, ıaǵnı qazaq tilinde jazylǵanyn, sondaı-aq dástúrli mádenıetti saqtaý men ulttyq qundylyqtardy qorǵaý týraly naqty normalardy qamtıtynyn sóz etti.
«Qazaqta «Elý jylda el jańa» degen maqal bar. Alaıda bizde nebári 35 jyldyń ishinde túbegeıli ózgerister oryn aldy – búginde sıfrlyq tehnologııalar men jasandy ıntellekt dáýirinde ómir súrip otyrmyz. Sondyqtan jańa Konstıtýsııaǵa XXI ǵasyrdyń zamanaýı úrdisteri men baǵyttary engizildi. Sonymen qatar memlekettiń áleýmettik mindettemeleri tolyq saqtalady», dedi depýtat.
«Zenchenko ı K» dırektory Gennadıı Zenchenko óz sózinde júrgizilip jatqan reformalarǵa eńbek ujymdarynyń belsendi qatysýynyń mańyzyna toqtalyp, eldegi ózgerister azamattardyń suranystaryna tikeleı baılanysty ekenin aıtty.
«Sizder – zamanaýı kásiporynda eńbek etip jatyrsyzdar. Búginde óndiristi damytyp otyrǵan – jastar. Basqarý júıesinde, tásilderde, saılaý barysynda kórip otyrǵan ózgerister – jaı ǵana uran emes. Prezıdent memleket halyqtyń únin estýi tıis ekenin aıtty. Azamattardyń ótinishteri saralanǵan kezde zańnamada qaıta qaraýdy qajet etetin máseleler bar ekeni aıqyndaldy. Bul ásirese óńirlerde, sonyń ishinde Soltústik Qazaqstan oblysynda kadr tapshylyǵy máselesi aıqyn seziledi. Sondyqtan referendýmdaǵy bastamalar osyndaı ózekti máselelermen tikeleı baılanysty», dedi ol.
Kezdesý sońynda zaýyt qyzmetkerleri óz suraqtaryn qoıyp, usynystaryn bildirdi. Sondaı-aq referendým árbir azamatqa el bolashaǵyna óz úlesin qosýǵa múmkindik beretin mańyzdy qadam ekeni atap ótildi. Ár azamattyń óz ustanymyn bildirýi qoǵamdyq jaýapkershilikti arttyryp, memleketimizdiń damýyna oń áserin tıgizeri anyq.
