Reseıdegi Qıyr Shyǵys gvardııalyq joǵary jalpy áskerı komandalyq ýchılıshesiniń kýrsanty «Qazaq halqynyń Uly Otan soǵysyndaǵy Jeńiske qosqan úlesi» taqyrybynda ǵylymı eńbek jazyp, baıqaýǵa qatysqan bolatyn. Jeńistiń 80 jyldyǵyna oraı uıymdastyrylǵan is-sharaǵa 700-den astam áskerı-ǵylymı jumys usynylǵan. Solardyń ishinen úzdik shyqqan Ádilet Serikbaı Reseı Federasııasy Qorǵanys mınıstrliginiń gramotasymen marapattaldy.
«Meniń zertteýimde Qazaqstan jaýyngerleriniń maıdanda kórsetken erligi men tabandylyǵy, tyldaǵy janqııarlyǵy týraly derekter berildi. El tarıhyn halyqaralyq deńgeıde tanystyrý – men úshin abyroıly is. Biz ata-babamyzdyń erligin umytpaýymyz kerek», dedi bolashaq ofıser.
Aıta ketsek, Ádilet Serikbaı 2003 jyly Pavlodar oblysy, Baıanaýyl aýdany, Sátbaev aýylynda dúnıege kelgen. 2020 jyly Almatydaǵy Qurlyq áskerleriniń áskerı ınstıtýtyna túsip, keıin Qıyr Shyǵys gvardııalyq joǵary jalpy áskerı komandalyq ýchılıshesiniń «Teńiz jaıaý áskerleri bólimshelerin basqarý» mamandyǵyna aýysty. Aldaǵy ýaqytta ol elimizdiń Qarýly kúshteri Arnaıy operasııalar kúshteri qatarynda qyzmet etýdi josparlap otyr.
