О́ńirdegi jastar birlestikteri, kreatıvti ındýstrııa ókilderi, volonterlik qozǵalys, medıa jáne qoǵamdyq uıymdarmen ótken áńgime barysynda joba normalarynyń basym bóligi dál búgingi jastarǵa arnalǵany erekshe atap ótildi.
Aıda Balaeva qoldanystaǵy Konstıtýsııa óziniń tarıhı mıssııasyn oryndaǵanyn, al jańa Konstıtýsııa bilimge, ǵylymǵa, mádenıetke jáne ınnovasııaǵa negizdelgen jańa damý modeline kóshýge baǵyttalǵanyn aıtty.
«Prezıdent eldiń uzaqmerzimdi básekege qabilettiligin ǵylymdy, tehnologııany jáne bilimdi ilgeriletý arqyly qamtamasyz etýdi strategııalyq mindet retinde aıqyndap otyr. О́ıtkeni shynaıy tabysty memleket – bul ıntellektýaldyq áleýeti myqty, mádenıeti joǵary, jańasha oılaıtyn ult. Bul úderiste sizderdiń rólderińiz asa mańyzdy. Sondyqtan konstıtýsııalyq bastamalarda ǵylym men bilimge qatysty negizgi qaǵıdattardyń – ǵylymı shyǵarmashylyq erkindiginiń, ǵalym mártebesiniń, bilimniń adam men azamattyń ajyramas quqyǵy retinde tanylýynyń bekitilýi strategııalyq mánge ıe. Bul – bolashaq urpaq aldyndaǵy memlekettiń uzaqmerzimdi jaýapkershiligi, ult sapasyna, adamı kapıtaldyń qýatyna jáne eldiń zııatkerlik áleýetine baǵyttalǵan júıeli ınvestısııa», dedi vıse-premer.
Sonymen qatar Aıda Balaeva sıfrlandyrý men jasandy ıntellekt dáýirinde Konstıtýsııa jobasynda alǵash ret sıfrlyq qaýipsizdikke, derbes derekterdi qorǵaýǵa jáne ınternet-alaıaqtyqqa qarsy normalar bekitilgenin tilge tıek etti.
«Jańa Konstıtýsııa jobasynda Memleket basshysynyń erekshe baqylaýyndaǵy zııatkerlik menshikti qorǵaý máselesi de kórinis tapty. Bul normany Ata zań deńgeıinde bekitý – kreatıvti ındýstrııany derbes ári ekonomıkalyq mańyzy bar sala retinde qarastyrýdyń aıqyn dáleli. О́ner, ǵylym, sıfrlyq tehnologııalar, dızaın, medıa jáne mádenı kontent salasynda qyzmet etetin jastar úshin bul quqyqtyq kepildikterdiń kúsheıgenin bildiredi», dedi A.Balaeva.
Jıynda «Assambleıa jastary» jastar qanaty jetekshisiniń orynbasary Zalına Alıeva da sóz sóıledi. Ol jastardyń balalarmen atqarylatyn jobalaryn, etnosaralyq kelisimdi nyǵaıtýǵa baǵyttalǵan bastamalary týraly aıtyp, referendýmǵa qatysty jastardyń ustanymyn jetkizdi.
Elordada Konstıtýsııalyq reformaǵa arnalǵan halyqaralyq konferensııa ótti
«Aldymyzda referendým tur, onyń mańyzyn túsinemiz jáne bul sheshimdi qoldaıtynymyzdy atap ótkim keledi. Jastardyń bilimin, quqyqtaryn jáne shyǵarmashylyq erkindigin qorǵaýdy maqsat etetin qujat eldiń ári qaraı damýyna tyń serpin beredi dep senemin. Búginde jastar men qoǵamdyq uıym ókilderi jaýapkershilikti sezinip, elimizdiń tarıhı damýyn qoldaýy tıis», dedi Zalına Alıeva.
Batys Qazaqstan oblysyndaǵy О́ńirlik kommýnıkasııalar qyzmetiniń basshysy, jas aqyn Ádilet Orynbasarov sanaly tańdaý aqparatqa degen senim men belsendi azamattyq ustanymnan bastalatynyn, al referendým ár azamattyń jeke jaýapkershiligi ekenin atap ótti.
«Konstıtýsııanyń 3-babynda «Memlekettik bıliktiń birden-bir bastaýy – halyq» dep naqty kórsetilgen. Bul el taǵdyryna qatysty mańyzdy sheshimder halyqtyń erkimen aıqyndalatynyn bildiredi jáne árbir azamatqa úlken jaýapkershilik júkteıdi. Referendýmǵa qatysý – jaı formaldy rásim emes. Bul – azamattyq ustanym. Ár daýys mańyzdy. Ár tańdaý – ortaq sheshimniń bir bóligi. Bolashaq ózdiginen qalyptaspaıdy – biz ony búgingi tańdaýymyz arqyly jasaımyz», dedi Á. Orynbasarov.
Otyrysqa qatysqan ózge spıkerler de Ata zańdy ýaqyt talabyna saı jańartýdy qoldady. Konstıtýsııa jobasy quqyqtar men bostandyqtardy nyǵaıtýǵa, adamı kapıtaldy damytýǵa, jastardyń múmkindikterin keńeıtýge baǵyttalǵany, sondaı-aq sıfrlyq qaýipsizdikke, ekologııalyq jaýapkershilikke jáne qoǵamdyq yntymaqty kúsheıtýge qatysty normalardy qamtıtyny talqylandy.
«Taldaý» ulttyq zertteýler ortalyǵynyń sarapshylary konstıtýsııalyq jańashyldyqtardy talqylady
Kezdesý sońynda qatysýshylar suraqtar qoıyp, óz usynystaryn aıtty. 2026 jylǵy 15 naýryzda ótetin respýblıkalyq referendýmǵa jastardyń belsendi qatysýynyń mańyzy sóz boldy. Sebebi eldiń konstıtýsııalyq damýynyń aldaǵy baǵytyn azamattardyń tańdaýy aıqyndaıdy.
