Nurlan Esenqul jáne Nurbol Jaýynbaı jańa Konstıtýsııa jobasyna qoldaýyn poezııa tili arqyly bildirdi. Aıtyskerler sýyrypsalma jyrlarynda halyq birligi, ǵylym men bilimniń damýy, sondaı-aq el bolashaǵyn aıqyndaıtyn jastardyń róli sekildi ózekti taqyryptardy arqaý etti. Aıtyskerlerdiń paıymynsha, Ata zańdy jańartý Qazaqstan táýelsizdigin nyǵaıtyp, memlekettiń jańa damý kezeńine qadam basýyna serpin bermek.
Qaraǵandylyq ǵalymdar men stýdentter Konstıtýsııalyq reformany talqylady
Aqyndardyń aıtýynsha, jańa Konstıtýsııa qoǵamnyń basty qundylyqtaryn – bilim men mádenıetti, ınnovasııa men ulttyq birlikti bekemdeýge baǵyttalǵan.
«Myńjyldyqtar – tarıhym, dalam – dastan,
Birligiń bekem bolsa, baǵań da asqan.
Ǵylym, bilim, mádenıet, ınnovasııa –
Eń basty qundylyqtar sanamdy ashqan.
El bolyp jańa zańdy qabyldaıyq,
Tilegim úlken-kishi zamandastan.
Táýelsiz Qazaqstan órkendeı ber,
Qarqyndap alǵa qaraı qadam basqan», dep jyr tókti Nurlan Esenqul.
Aıtyskerler el bolashaǵy bilim men ǵylymnyń órkendeýimen tikeleı baılanysty ekenin aıtyp, jastar qoǵam damýynyń qozǵaýshy kúshine aınalýy tıis ekenin de erekshe atap ótti.
«Atalarym ańsaǵan asqaq arman,
Beıbit kún baqytymyz basqa qonǵan.
Ata zańy jańaryp memlekettiń,
Elimde bir úlken is bastaý alǵan.
Ǵylymdy zań júzinde qorǵaıtynyn,
Oqıdy sol qujatty ashqan ár jan.
Qazaqstan bilimmen qaryshtasa,
О́sedi ǵalym bolyp jastar alýan.
Ǵylymyń zań júzinde qorǵalsa eger,
Tuǵyryń bıik bolar basqalardan», dep oıyn óleń órimimen jetkizdi Nurbol Jaýynbaı.
Aqyndardyń sózinshe, aıtys ejelden halyq óneriniń bir qyry ǵana emes, qoǵamnyń kóńil kúıi men rýhanı baǵdaryn tanytatyn mańyzdy minber sanalady. Poezııa men sýyrypsalmalyq arqyly aqyndar qaı kezeńde de el bolashaǵy, ulttyq birlik jáne rýhanı damý máselelerin kóterip keledi.
Oraldyń kreatıvti ári belsendi jastary jańa Konstıtýsııa jobasyn qoldady
Aıtyskerler jańa Konstıtýsııany qoldaý – memlekettilikti nyǵaıtýǵa, ádiletti qoǵam qalyptastyrýǵa baǵyttalǵan ortaq jaýapkershiliktiń kórinisi ekenin atap ótti.
Sondaı-aq rýhanı mazmunǵa baı bastamaǵa Meıirbek Sultanhan, Ásem Erejeqyzy, Dıdar Qamı, Jansaıa Mýsına, Muhtar Nııazov syndy aqyndar da qatysty. Olar poezııa tili arqyly eldiń Ata zańyn jańartýdyń mańyzyn tereńnen tolǵap, onyń ádiletti qoǵam qalyptastyrýdaǵy aıryqsha rólin aıqyn kórsetti.
Aqyn Meıirbek Sultanhan óz óleńinde jańa Konstıtýsııany el táýelsizdigi men memlekettiliginiń berik tuǵyry retinde beıneledi.
«Tarıh kóshi qalmaıdy jolda júırep,
Elenedi endi óner, endi ádebıet.
Qoldaý berip turǵan soń Ata zańda,
Tórimizge shyǵady tól mádenıet», dep jyrdan órnek órdi Meıirbek Sultanhan.
О́leń joldarynda Konstıtýsııa Qazaqstannyń egemendigin qorǵap qana qoımaı, ulttyq mádenı murany saqtaýǵa, otbasylyq qundylyqtardy qurmetteýge jáne keler urpaq aldyndaǵy jaýapkershilikti bekitýge negiz bolatyny aıqyn ańǵarylady.
QazUÝ ǵalymdary jańa Konstıtýsııa jobasyn túsindiretin oqý quralyn jaryqqa shyǵardy
Aqyn Dıdar Qamı da óz sózinde ádilettilik pen qoǵamdyq birlik taqyrybyn arqaý etip, qoǵam tiregi sanalatyn otbasy men dástúrdiń mańyzyn erekshe atap ótti.
Onyń jyrlarynda Ata zańnyń ulttyq bolmys pen til taǵdyrymen sabaqtastyǵy da aıqyn kórinis tapty.
«Otbasy – tárbıeniń bul mektebi,
Ata zań qundylyqty qurmettedi.
Áke menen ananyń, balanyń da,
Aıqyndaldy orny men mindetteri», dedi Dıdar Qamı.
Sondaı-aq aqyn táýelsizdik jyldarynyń tarıhı mánine toqtalyp, Konstıtýsııanyń ana tilinde jazylýy el rýhanııaty úshin aıryqsha mańyzǵa ıe ekenin jyr joldarymen jetkizdi:
«Táýelsizdik tańyna basqaly aıaq,
Basqany oılap keldik tek, basqany aıap.
Alǵashqy Ata zańymyz bul bizderdiń,
Ana tilde jazylǵan bastan-aıaq», dep aqyn oı túıdi.
Sonymen qatar Ásem Erejeqyzy, Jansaıa Mýsına, Muhtar Nııazov pen Nurlan Esenqul júrekjardy jyrlary arqyly tarıhı sabaqtastyq, ulttyq mádenıet jáne qoǵamdyq birlik taqyryptaryn tereń tolǵady. Aqyndardyń óleńderinde Qazaqstannyń memlekettiligi men egemendigi árdaıym Ata zańmen qorǵalatyny týraly oı ózek boldy.
Qatysýshylardyń aıtýynsha, poezııa qazaq qoǵamynyń rýhanı ómirinde ejelden mańyzdy oryn alyp keledi. Kórkem sóz arqyly táýelsizdik, birlik pen rýhanı qundylyqtar ıdeıalary urpaqtan urpaqqa jalǵasyp, qoǵamdyq sananyń qalyptasýyna yqpal etedi.
Aqyndar jańa Konstıtýsııa eldiń aldaǵy damý baǵytyn aıqyndaıtyn, memlekettilikti nyǵaıtatyn berik quqyqtyq negizge aınalýy tıis ekenin jyrǵa qosty.
