Foto: Energetıka mınıstrligi
Energetıka vıse-mınıstri Erlan Aqbarov iri kómir óndirýshi kompanııalar ókilderimen ótken keńeste Prezıdent tapsyrmalarynyń oryndalý barysyn aıtty. Jıynda kómir generasııasyn damytýǵa arnalǵan Ulttyq joba ázirleý máselesi talqylandy.
Joba Qazaqstan úshin kómirdi tek otyn kózi emes, ekonomıkanyń uzaq merzimdi strategııalyq resýrsy retinde qarastyrady. El aýmaǵynda jalpy qory 33 mlrd tonnadan asatyn kómir bazasyn tıimdi paıdalaný kózdelip otyr. Bul baǵyt ınvestısııa tartýǵa, óndiristik logıstıkany jańǵyrtýǵa jáne ekologııalyq talaptarǵa saı tehnologııa engizýge múmkindik beredi.
Keńeske Nıkolaı Radostoves, Evgenıı Masternak jáne Pavel Chývashev qatysyp, óndiristi damytý josparlaryn tanystyrdy.
Atap aıtqanda, Bogatyr Kómir JShS óndiris kólemin kezeń-kezeńimen ulǵaıtýdy josparlap otyr. Kompanııa 2024 jylǵy 42,7 mln tonna óndiris deńgeıin:
-
2026 jyly – 45,2 mln tonnaǵa
-
2032 jyly – 56,5 mln tonnaǵa deıin jetkizýdi kózdeıdi.
360 mlrd teńge ınvestısııa óndiristi jańǵyrtýǵa, tehnıka satyp alýǵa jáne sıkldi-tolassyz tehnologııa (STT) nysandaryn salýǵa baǵyttalady. Sonymen birge MES júıesi arqyly júk aǵyndaryn basqarý jáne óndiris qaýipsizdigin kúsheıtý sharalary engizilip jatyr.
Al Shubarkól Kómir AQ 2026 jylǵa qaraı kómir óndirý kólemin 16,1 mln tonnaǵa jetkizýdi josparlap otyr. 2026-2032 jyldar aralyǵynda 95,5 mlrd teńge ınvestısııa tartý kózdelgen.
Bul qarajat tehnıkalyq qaıta jaraqtandyrýǵa, sıfrlyq tehnologııalardy engizýge jáne óndiristik prosesterdi avtomattandyrýǵa jumsalady. Josparda:
-
STAK-2 sıkldi-tolassyz arshý kesheniniń ekinshi kezeńin iske qosý;
-
49,4 mlrd teńgege jabdyqtar parkin jańartý;
-
Hovermap geomonıtorıng júıesin engizý;
-
Robottandyrylǵan avtoaýdarǵysh samosvaldardy paıdalaný qarastyrylǵan.
Keńes qorytyndysynda vıse-mınıstr kómir tasymaly máselesine erekshe toqtaldy. Jartylaı vagondar parkin keńeıtý jáne temirjol ınfraqurylymyn jańǵyrtý jumystary qatar júrgizilýi tıis.
Bul sharalar otyn jetkizý turaqtylyǵyn arttyryp, eldiń energetıkalyq qaýipsizdigin nyǵaıtady. Sonymen birge kómir salasyn sıfrlandyrý óndiristiń tıimdiligin kóterip, ekologııalyq talaptardy saqtaýǵa múmkindik beredi.
Qazaqstan aldaǵy jyldary kómir óndirisin damyta otyryp, energetıkalyq júıeniń turaqtylyǵyn qamtamasyz etýdi jáne jańa ónerkásiptik jobalardyń suranysyn tolyq óteýdi maqsat etip otyr.
