M.Áshimbaev atap ótkendeı, qazirgi jahandyq turaqsyzdyq pen qarqyndy tehnologııalyq ózgerister jedel beıimdelýdi, tıimdi basqarý júıesin qalyptastyrýdy talap etip otyr. Osyǵan baılanysty Memleket basshysynyń bastamasymen eldiń konstıtýsııalyq-quqyqtyq jáne ınstıtýsıonaldyq negizderin jańǵyrtý úderisi qolǵa alyndy. Bul qadamnyń basty maqsaty – memlekettiń ornyqty damýyn qamtamasyz etý jáne saıası júıeni tereń demokratııalandyrý. Osy turǵyda Senat tóraǵasy memlekettiń jańa modelin qalyptastyratyn negizgi baǵyttarǵa toqtaldy.
«Jańa Konstıtýsııa jobasy – el bolashaǵynyń manıfesi jáne Prezıdent Qasym-Jomart Toqaevtyń saıası júıeni jańǵyrtý baǵdarynyń dáıekti jalǵasy. Ata zań jobasy, eń aldymen, qoǵamdyq kelisim men ulttyq birlik qaǵıdattaryna taban tirep, memlekettiń uzaqmerzimdi damý baǵytyn aıqyndaıdy. Qujatta ulttyq biregeılikti nyǵaıtýǵa, memlekettik tildi dáripteýge jáne patrıottyq qundylyqtardy qoldaýǵa aıryqsha mán berilgen. Adam kapıtaly el kelesheginiń berik irgetasy retinde jarııalanǵan Konstıtýsııa elimizdiń bilim, ǵylym jáne ınnovasııaǵa negizdelgen damý jolyna túsip, ozyq memleketterdiń qataryna qosylýdy kózdeıtin umtylysyn aıqyn kórsetedi. Jalpy, qujattaǵy barlyq norma – uzaqmerzimdi memlekettik strategııalarǵa arnalǵan irgeli quqyqtyq negiz», dedi M.Áshimbaev.
Senat spıkeriniń aıtýynsha, referendým ótkizý barlyq baǵytta jańa tarıhı kezeńniń bastalatynyn bildiredi. Bul qadam partııalyq júıeni, máslıhattardyń áleýeti men azamattyq dıalog ınstıtýttaryn nyǵaıtýǵa serpin berip, ortalyq pen óńirler arasyndaǵy ózara is-qımyldyń berik ári tıimdi vertıkalyn qalyptastyrýǵa jol ashady. Konstıtýsııany jańartý arqyly jahandyq ózgeristerge beıimdelý saıası arhıtektýrany ǵana emes, qoǵamnyń áleýmettik negizderin de tereń transformasııalaýǵa qajetti alǵysharttardy qamtamasyz etedi.
Sonymen qatar M.Áshimbaev zańnamalyq jańashyldyqtardy tabysty iske asyrý jastardyń belsendi qatysýyna, olardyń bilim deńgeıine jáne el taǵdyry úshin jaýapkershilikti óz moınyna alýǵa daıyndyǵyna tikeleı baılanysty ekenin erekshe atap ótti.
«Jańa Konstıtýsııanyń negizgi basymdyǵy – adam jáne onyń quqyqtary men bostandyqtaryn, zańdy múddelerin qorǵaý. Konstıtýsııalyq reforma keleshek urpaqtyń órkendeýine jáne jastardyń áleýetin tolyq ashýǵa múmkindik beretin uzaqmerzimdi berik negiz qalyptastyrady. Osyndaı jaǵdaıda jastardyń azamattyq jaýapkershiligi aldyńǵy orynǵa shyǵady. Ádiletti Qazaqstandy qurý isine belsendi aralasý, jańǵyrtý úderisine atsalysý, dıalog pen jasampazdyq mádenıetin damytý – ýaqyt talaby. Bul jolda Prezıdent usynǵan «Adal azamat» tujyrymdamasy mańyzdy baǵdar bolady. Ol Abaıdyń «Tolyq adam» ilimine súıene otyryp, eńbekqorlyqty, adaldyqty, kásibılikti, úzdiksiz bilim alýdy jáne otansúıgishtikti árbir azamat úshin túbegeıli qundylyqtar retinde dáripteıdi», dedi Senat tóraǵasy.
Palata spıkeri Senat janynda bes jyldan asa ýaqyttan beri jumys istep kele jatqan Sarapshylar klýby men Taldaý mektebiniń qyzmetine de toqtaldy. Bul alańdar ártúrli saladaǵy jas mamandardyń saraptamalyq qabiletin jetildirýge, kásibı oılaý mádenıetin qalyptastyrýǵa baǵyttalǵan. Kezdesýde qatysýshylar sıfrlyq quqyqtardy qorǵaý, ǵylym men tehnologııany damytý jáne ózge de ózekti baǵyttarǵa qatysty máseleler boıynsha pikir almasty.
Konstıtýsııalyq ózgeristerdi talqylaýǵa arnalǵan is-sharaǵa jetekshi ǵalymdar, akademııalyq qaýymdastyq ókilderi, memlekettik basqarý salasynyń sarapshylary men EUÝ oqytýshylary men doktoranttary qatysty.
