Marqumdardyń jaqyn týysy Galına Nabıevanyń «31 arnaǵa» bergen suhbatyna súıensek, bul qasirettiń aldyn alýǵa múmkindik bolǵan. Kúdiktiniń psıhıkalyq aýytqýlary erte jastan, tipti úshinshi synyptan bastap baıqalǵan kórinedi.
«Ol psıhıkalyq esepte turǵan. Bizdiń Novorossııskide turatyn aǵamyz bar. Ápkem (marqum) oǵan habarlasyp, ulynyń (kúdiktiniń) ústinen shaǵymdanatyn kórinedi. Nege ol maǵan aıtpady eken? Eger bilgenimde, ony birden tıisti mekemege jatqyzar edim. Ol eki jyl boıy psıhıkalyq aýrýhanada emdeldi. Tipti úshinshi synypta oqyp júrgende-aq onyń aqyl-esinde aýytqýlar bary anyqtalǵan edi. Ony qaraýsyz qaldyrýǵa bolmaıtyn, ol turaqty kómekke muqtaj jan bolatyn. Bul jerde dárigerler de óz jumysyn tıisti deńgeıde atqarmady dep esepteımin», deıdi marqumdardyń týysy Galına Nabıeva.
Aýyl turǵyndarynyń aıtýynsha, bul otbasy syrt kózge óte tynysh kóringen. Kúdiktiniń ózi tuıyq bolǵan, aýladan shyqpaı, adamdarmen aralaspaǵan. Tek keıde esh sebepsiz aıqaılap, aınalasyna qorqynysh uıalatatyn sátteri bolǵanyn aıtady.
Aqmola oblystyq Polısııa departamenti bastyǵynyń birinshi orynbasary Erlan Aqbarovtyń málimdeýinshe, atalǵan fakti boıynsha qylmystyq is qozǵalyp, tergeý amaldary Ishki ister mınıstrligi men óńirlik departament basshylyǵynyń tikeleı baqylaýyna alyndy.
