Foto: TSM
Atalǵan dodany el quramasy 7 júldemen aıaqtady. Onyń altaýy – altyn, bireýi – kúmis medal.
Krıstına Shýmekova 500, 1000 jáne 1500 metr qashyqtyqtarynda, sondaı-aq kishi kópsaıysta chempıon atandy. Sonymen qatar ol 3000 metrde kúmis júldege ıe boldy.
Krıstına Shýmekova, Anastasııa Belovodova jáne Varvara Glýhova bastaǵan áıelder quramasy komandalyq sprıntte de top jardy. Altynshy altyn júldeni Vadım Chebardakov saldy. Sheshýshi jarys kúninde otandasymyz mass-startta jeńiske jetti.
Osylaısha, otandastarymyz dúbirli dodany tabysty qorytyndylady.
Sportshylardy qarsy alý rásiminde Krıstına Shýmekova tarıhı jetistigine qatysty pikir bildirdi.
«Qazir kóńil-kúıim keremet, sózben aıtyp jetkizý múmkin emes. Tuǵyrdyń eń bıik satysynda turǵanda Qazaqstannyń ánurany shyrqalǵany – ǵajap sáttiń biri. Qazir meniń áli ınstagram paraqsham joq. Jaqyndarym ol jerde men týraly óte kóp jazyp, pikir jazý arqyly qoldap jatqanyn kórsetti. Sonyń ózi jaqsy áser qaldyrdy. Álem chempıonatyna bararda júlde alatynymdy bildim. Alaıda dál 500 metrge jarysta medal alam degen oı bolmaǵan. Osy joly bári sátti boldy», dedi Krıstına Shýmekova.
