Memlekettik keńesshimen birge óńirge Jalpyulttyq koalısııa músheleri – Májilis depýtattary Nurtaı Sabılıanov, Erlan Saırov, Nartaı Sársenǵalıev, Oqý-aǵartý mınıstri Juldyz Súleımenova, aqyn Muhtar Nııazov, Prezıdent janyndaǵy Jastar saıasaty jónindegi keńestiń múshesi Oljas Súleımen jáne ózge de azamattar bardy.
Sapar aıasyndaǵy negizgi is-shara – Abaı atyndaǵy oblystyq kitaphanada ótken óńir aktıvimen kezdesý. Talqylaý jumysyna 500-ge jýyq adam – máslıhat depýtattary, qoǵamdyq keńes músheleri, saıası partııalardyń, Qazaqstan halqy Assambleıasynyń, ardagerler uıymdarynyń, bıznes, bilim, densaýlyq saqtaý, sport salalarynyń, ǵylymı jáne jastar qaýymynyń ókilderi qatysty.
Dıalogtiń ózegi – jańa Konstıtýsııa jobasynyń erejeleri men aldaǵy 15 naýryzda ótetin respýblıkalyq referendýmnyń mańyzy.
Memlekettik keńesshi Erlan Qarın jobany ázirleý jumysy ashyqtyq jáne keń qoǵamdyq qatysý qaǵıdatyna negizdelgenin, e-Otinish jáne eGov sıfrlyq platformalary arqyly azamattardan kelip túsken usynystar eskerilgenin atap ótti. Onyń aıtýynsha, usynylyp otyrǵan ózgerister memlekettik basqarý júıesiniń turaqtylyǵyn nyǵaıtýǵa, bılik ınstıtýttarynyń ókilettigi men jaýapkershiligi arasyndaǵy teńgerimdi kúsheıtýge, sondaı-aq adam kapıtalyn, bilim men ǵylymdy jáne ınnovasııany memlekettiń strategııalyq basymdyqtary retinde damytýǵa baǵyttaldy.
«Jańa Konstıtýsııadaǵy negizgi tujyrymdamalyq erejelerdiń basym bóligi tikeleı Qasym-Jomart
Kemelulynyń bastamasymen usynyldy. Máselen, jańa preambýla Prezıdenttiń tujyrymdamalyq tezısteri negizinde ázirlendi. Memleket basshysy – azamattarymyzdyń múddesin qorǵaýǵa baǵyttalǵan birqatar norma men jańashyl bastamanyń avtory», dedi Erlan Qarın.
Májilis depýtaty Nurtaı Sabılıanov menshik nysandarynyń barlyq túrin qorǵaý, ulttyq zańnamanyń basymdyǵy men ulttyq valıýtanyń rólin bekitý syndy ekonomıkalyq kepildikter kúsheıtilgenin atap ótti. Bul bıznes pen ınvestısııalar úshin turaqty jaǵdaı qalyptastyrady.
Oqý-aǵartý mınıstri Juldyz Súleımenova bilim, ǵylym jáne ınnovasııany damytý máselesi strategııalyq basymdyq deńgeıinde bekitilgenin, bul adam kapıtalyn qalyptastyrýǵa baǵyttalǵan memlekettik qoldaýdy kúsheıtetinin málimdedi.
Májilis depýtaty Erlan Saırov Quryltaıdyń baqylaý fýnksııalary kúsheıgenine nazar aýdarsa, oblystyq ardagerler keńesiniń tóraǵasy Muratqazy Alın jańa Konstıtýsııanyń ulttyq mádenıet pen dástúrli otbasylyq qundylyqtardy nyǵaıtýdaǵy mańyzyn atap ótti. Sonymen qatar sapar aıasynda óńirdegi shyǵarmashylyq zııaly qaýym ókilderimen kezdesý ótti.
Talqylaý taqyryptary – mádenıettiń, tarıhı jadynyń jáne ulttyq biregeıliktiń róli. Erlan Qarın jańa Konstıtýsııa quqyqtyq qujat qana emes, qoǵamnyń qundylyq baǵdaryn aıqyndaıtyn zamanaýı qoǵamdyq kelisim retinde qarastyrylatynyn atap ótti. Onyń aıtýynsha, joba negizinde adamǵa baǵdarlanǵan tásil jatyr. Onda memlekettik saıasattyń basty baǵdary – azamattardyń quqyǵy, bostandyǵy men múmkindikteri.
Qatysýshylar memlekettik qyzmet qaǵıdattarynyń tizbesinde tarıhı-mádenı murany saqtaý men ulttyq mádenıetke qoldaý kórsetý normalaryn bekitýge qoldaý bildirdi.
Sapar barysynda Jalpyulttyq koalısııa músheleri kásipodaq uıymdarymen, pedagogter qaýymymen, mádenıet salasynyń ókilderimen, «SemAZ» JShS eńbek ujymymen jáne óńir jastarymen de kezdesti. Dıalog aıasynda eńbek adamynyń quqyǵyn qorǵaý, áleýmettik kepildikti qamtamasyz etý, bilim men ǵylymdy damytý, óńirlerdiń ekonomıkalyq turǵyda damýyna turaqty jaǵdaı jasaý jáne jastardyń ózin tanytý múmkindikterin keńeıtý máseleleri talqylandy.
Jalpy, Abaı oblysyndaǵy kezdesýler jergilikti jurtshylyqtyń aldaǵy referendýmǵa erekshe nazar aýdaryp otyrǵanyn kórsetti.
