Foto: azattyq-ruhy.kz
Telekópirge sıfrlyq jáne quqyqtyq reformalardyń arhıtektorlary qatysty. Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıev jańa normalar aıasyndaǵy tehnologııalyq táýelsizdiktiń áleýetin túsindirdi.
– Jańa Konstıtýsııada azamattardyń quqyqtary men bostandyqtaryn qorǵaý búgingi zamannyń suranysy men talabyn eskere otyryp, jan-jaqty qamtylǵanyn basa aıtýymyz qajet. Sonyń ishinde jańa konstıtýsııalyq qujatta azamattardyń jeke málimetteriniń qaýipsizdigine quqyqtyq kepildikter beriledi. Qazirgi ýaqytta álem qarqyndy sıfrlyq ózgerister kezeńine qadam basty. Memlekettik qyzmetter, qarjy operasııalary, bilim berý, medısına jáne áleýmettik qatynastardyń basym bóligi elektrondy formatqa kóshti. Bul azamattardyń múmkindikterin keńeıtip, qyzmetterdiń qoljetimdiligin arttyrǵanymen, jańa qaýipterdi de qatar alyp keledi. Osyǵan baılanysty sıfrlyq dáýirde derbes derekterdi qorǵaý máselesi erekshe mańyzǵa ıe bolyp otyr. Konstıtýsııalyq deńgeıde derbes derekterdiń qorǵalýyna erekshe mán berý sıfrlyq keńistikte qaýipsiz quqyqtyq orta qalyptastyrady. Sondyqtan ár azamattyń bul tarıhı ózgeristerge jaýapkershilikpen qarap, eldik, memleketshildik ustanymyn tanytýy árqaısymyzdyń el bolashaǵyna qosqan naqty úlesimiz bolmaq, – dedi J.Mádıev.
Jalpy alǵanda, sıfrlandyrý úderisin quqyqtyq turǵydan bekitý – bolashaqqa jasalǵan mańyzdy qadam. Ol eldiń qaýipsiz damýyn qamtamasyz etip, azamattardyń quqyqtaryn qorǵaýdy jańa deńgeıge kóteredi. Bul baǵyttaǵy ózgerister Qazaqstan qoǵamynyń zamanaýı, qaýipsiz ári ádiletti bolashaǵyna jol ashady.
Májilis depýtattary, qoǵam qaıratkerleri men qatysýshylar azamattardyń áleýmettik-ekonomıkalyq jaǵdaıyn jańartýǵa baǵyttalǵan baptardy da egjeı-tegjeı talqylady.
– Jańa Konstıtýsııa – tek quqyqtyq qujat emes, bul memlekettiń damý baǵytyn aıqyndaıtyn qundylyqtar júıesi, qoǵamdyq kelisim men turaqtylyqtyń negizi. Búgin bekitiletin qaǵıdattar erteńgi Qazaqstannyń kelbetin qalyptastyrady. О́ıtkeni jańa Ata zańdaǵy usynylyp otyrǵan barlyq ózgeris memleketimizdiń saıası júıesin jańǵyrtyp, azamattardyń turmys sapasyn arttyrýǵa, quqyqtyq tártipti nyǵaıtýǵa jáne otanshyldyq ıdeıany kúsheıtýge baǵyttalǵan, – dedi «Qazaqtelekom» AQ basqarma tóraǵasy Baǵdat Mýsın.
«Qazaqtelekomnyń» sandyq ınfraqurylymy arqyly alys aımaqtardaǵy qyzmetkerler de onlaın rejiminde qatysyp, spıkerlerge suraq qoıdy. Basym kópshiligi jańa redaksııadaǵy jeke ómirge qol suqpaýshylyq kepildikteri, azamattardyń derbes derekterin zańsyz jınaýdan saqtaý jáne paıdalanýdan qorǵaý quqyǵy, sondaı-aq hat almasý, telefon arqyly sóılesý jáne bank salymdarynyń qupııasy jóninde saýal joldap, aqparat aldy.
Telekópir qorytyndysynda jańa Konstıtýsııa quqyqtyq saýatty arttyrýǵa, ınnovasııalyq damýdy ilgeriletýge jáne memleket pen azamattar arasynda senim men ashyqtyqqa negizdelgen sandyq qoǵam qalyptastyrýǵa jol ashatyny aıtyldy.
