Senat tóraǵasy Sarango Radnaragchaǵa iltıpat bildirip, elimiz ben BUU-nyń dáıekti yntymaqtastyǵyna negiz bolatyn irgeli qundylyqtardy atap ótti. Sondaı-aq ol elimiz Uıymnyń barlyq qurylymymen tyǵyz ári syndarly baılanysty odan ári nyǵaıtýǵa múddeli ekenin aıtty.
Álemdegi geosaıası ahýaldy talqylaý barysynda M.Áshimbaev elimiz daý-janjaldy halyqaralyq quqyq jáne BUU Jarǵysy aıasynda dıplomatııalyq jolmen beıbit sheshýge beıil ekenin atap ótti.
«Biz Taıaý Shyǵystaǵy ahýaldyń kúrt shıelenisýin tereń alańdaýshylyqpen baqylap otyrmyz. Prezıdent Qasym-Jomart Toqaev jaǵdaıdyń ýshyǵýyna baılanysty Parsy shyǵanaǵyndaǵy birqatar eldiń basshylaryna qoldaý bildirdi. Memleket basshysy atap ótkendeı, elimiz qaqtyǵystardy tezirek toqtatýdy, barlyq teketiresti dıalog pen dıplomatııa arqyly beıbit retteýdi qoldaıdy», dedi M.Áshimbaev.
Osyǵan oraı palata tóraǵasy Ortalyq Azııa aımaǵynyń qaýipsizdigin nyǵaıtýda ózekti qurylymnyń birine aınalǵan BUU-nyń Almatydaǵy О́ńirlik ortalyǵynyń mańyzy týraly aıtty. Ol Ortalyqty qurý der kezinde qabyldanǵan sheshim ekenin, bul qadam Qazaqstan men BUU arasyndaǵy senimge negizdelgen qarym-qatynastardyń naqty nátıjesi sanalatynyn atap ótti.
Kezdesýde Senat tóraǵasy elimizde júrgizilip jatqan konstıtýsııalyq reformanyń iske asyrylý barysyna da toqtaldy.
«Memleket basshysy byltyrǵy qyrkúıekte halyqqa arnaǵan Joldaýynda bir palataly Parlament júıesine kóshý týraly bastama kótergen edi. Osy maqsatpen Konstıtýsııalyq reforma jónindegi komıssııa qurylyp, elimizdiń strategııalyq damý basymdyqtaryna, qazirgi jahandyq syn-qaterlerge saı jańa Konstıtýsııa jobasy ázirlendi. Jańa Ata zań jobasynda quqyqtyq memleket qaǵıdattary, qorshaǵan ortany qorǵaý, azamattardyń quqyqtary men bostandyqtaryn qamtamasyz etý prınsıpteri bekitilgen. Olar memleket úshin eń joǵary qundylyqtar retinde aıqyndaldy. Atalǵan bastama boıynsha qorytyndy sheshimdi elimizdiń azamattary 15 naýryzda ótetin respýblıkalyq referendýmda qabyldaıdy», dep M.Áshimbaev BUU-nyń Qazaqstandaǵy Turaqty úılestirýshisine Jańa Konstıtýsııa jobasynyń mańyzdy erejeleri týraly aıtyp berdi.
Sonymen qatar olar aldaǵy kezeńge arnalǵan birlesken jumystyń basym baǵyttaryn jan-jaqty talqylap, Ortalyq Azııadaǵy ornyqty damý maqsattaryna qol jetkizý jáne geosaıası shıelenis jaǵdaıynda aımaqtaǵy klımattyq syn-qaterlerdi eńserý máseleleri týraly pikirlesti.
О́z kezeginde Sarango Radnaragcha elimizge ornyqty damý maqsattaryna qol jetkizý, adam kapıtalyn damytý, ınklıýzııany qamtamasyz etý jáne BUU-men seriktestikti nyǵaıtý baǵytyndaǵy bastamalary úshin alǵys bildirdi. Sondaı-aq ol kópjaqty qarym-qatynasty ilgeriletýge, birqatar baǵyt boıynsha birlesken jobalardy iske asyrýǵa daıyn ekenin jetkizdi.
