Álem Qaıyrjanqyzynyń negizgi mamandyǵy – qazaq tili men ádebıeti pániniń muǵalimi. Ekinshi mamandyǵy – zańger. Ol aýyl ákimdigine qyzmetke qabyldanǵanynda memlekettik qyzmet salasynyń syrt kózge kórine bermeıtin salmaǵy bar ekenin túısinipti. Jalyndap turǵan jas maman ákimdiktiń qazanynda qaınap, tájirıbesin tolyqtyrady. Jıyrma jylǵa jýyq ýaqyt tapjylmaı ákimdikte qyzmet istegen maman, árıne, aýyldaǵy ár máseleni búge-shúgesine deıin biledi. Ondaı jaýapty janǵa halyq mindetti túrde senim artady. Sóıtip, osydan úsh jyl buryn ótken ákim saılaýynda el senimine basymyraq ıe bolǵan Álem Qaıyrjanqyzy Úshtóbe aýylynyń ákimi bolady.
Ol kisi basqaryp otyrǵan okrýg quramyna Úshtóbe, Saryarqa, Qurylys, Atameken, Soqyr aýyly kiredi. Aýylda 167 shaǵyn jáne orta bıznes nysany jumys istep tur. 62 sharýa qojalyǵy, 24 seriktestik, 81 jeke kásipker, 16 saýda dúkeni bar. Shaǵyn jáne orta bızneste jumyspen 1000 adam qamtylyp otyr.
Bıyldyń ózinde sút zaýyty, qurǵaq sút qospalaryn óndiretin zaýyt, meıramhana men eki azyq-túlik dúkeni óz jumysyn bastap, onda 34 aýyl turǵyny jumysqa ornalasqan.
Aýyl ákimi eldimekenniń ınfraqurylymyn jańǵyrtýǵa ynta qoıyp otyr. «Aýyl – el besigi» baǵdarlamasy aıasynda Saryarqa aýylynda Dostyq, Qaırat Jumabekov, Yntymaq kóshelerinde jalpy uzyndyǵy 1,7 shaqyrym jolǵa ortasha jóndeý júrgizildi. Naýryz, Bolashaq kósheleriniń ishki joldaryna qıyrshyq tas tóseldi. Alash jáne Bolashaq kóshelerinde 24 kóshe jaryqtandyrý baǵany ornatyldy. Sonymen qosa, «SıneMıdasStroı» JShS-men ózara yntymaqtastyq ornatyp, demeýshilik qarajat esebinen Mánshúk Mámetova jáne Yntymaq kóshelerinde jalpy uzyndyǵy 1 km kentishilik joldarǵa ortasha jóndeý jasalǵan. Aýyl kóshelerine beınebaqylaý kameralary qoıylyp, veterınarlyq-profılaktıkalyq jumysqa arnalǵan mal ustaıtyn qorshaý salyndy. Búginde maly bar aǵaıynnyń kádesine jarap tur.
Atameken aýylynda 150 balaǵa arnalǵan jańa mektep ashylyp, aýyl balalary sapaly bilim alyp otyr. Al Úshtóbe aýylynda ashylǵan kópfýnksıonaldy hokkeı korty balalardyń bir mezgil qysqy sportpen shuǵyldanýyna múmkindik berip otyr.
Byltyr Úshtóbe aýyly úshin berekeli jyl boldy. Buryn-sońdy mádenıet úıi bolmaǵan aýylda «Aýyl – el besigi» baǵdarlamasy aıasynda jańa zamanaýı klýb úıi ashyldy. Aýyl turǵyndary bul máseleni birneshe ret kóterip, byltyr qýanyshqa keneldi.
«Jaıly mektep» jobasy aıasynda aýylda 300 balaǵa arnalǵan jańa mekteptiń qurylysy aıaqtaldy. «Aýyldyq densaýlyq saqtaýdy jańǵyrtý» ulttyq jobasy aıasynda Saryarqa jáne Qurylys aýyldarynda medısınalyq feldsherlik-akýsherlik pýnktterdiń qurylysy da támamdaldy. Memlekettik-jekemenshik áriptestik aıasynda Úshtóbe aýylynda 120 baldyrǵanǵa arnalǵan «Sýper botaqan» jeke balabaqshasy ashyldy.
Memlekettik baǵdarlama aıasynda Atameken aýylynda jalpy uzyndyǵy 1,74 shaqyrym jolǵa ortasha jóndeý jasaldy. Aýdandyq bıýdjet esebinen Úshtóbe aýylyndaǵy ónerkásip aımaǵyna aparatyn jolǵa uzyndyǵy 1,38 shaqyrym ortasha jóndeý júrgizildi. Qurylys jáne Soqyr aýyldarynyń kireberis joldary boıyna jaryq baǵandary ornatyldy.
Byltyrǵa deıin Soqyr aýylynda elektr energııasy jıi úziletin edi. Elektr berý jelileri aýyldyq okrýgtiń balansynda bolǵandyqtan, eki keshendi transformatorlyq qosalqy stansasynyń elektr jelileri jáne transformator aýystyrylyp, jóndeý jumysy júrgizildi. Qazir turǵyndar sapaly qýat kózin tutynyp otyr.
– Álem Qaıyrjanqyzy bul aýyldyń ákimdiginde kóp jyldan beri eńbek etip keledi. Eńbek jolyn qarapaıym maman retinde bastap, aýyldyń barlyq máselesin jaqsy meńgergen. О́zi de osy aýyldyń turǵyny bolǵandyqtan, halyqtyń jaǵdaıyn tereń túsinip, elge janashyrlyqpen qaraıdy. Buryn qys mezgilinde boran soǵyp, joldy qar basyp qalǵanda aýyldan qatynaý qıynǵa túsetin. Joldy arshytýdyń ózi úlken máselege aınalyp, turǵyndar jıi alańdaıtyn. Qazir mundaı qıyndyq joq. Joldar ýaqtyly tazartylyp, qatynasqa qolaıly jaǵdaı jasalǵan. Sonymen qatar aýylda aýyzsý máselesi de sheshimin taýyp, turǵyndar sapaly aýyzsýmen qamtamasyz etildi. Aýyl kósheleri jap-jaryq bolyp tur. Álem Qaıyrjanqyzy – úlkenge qurmet, kishige izet kórsete biletin, halyqpen til tabysyp, eldiń alǵysyna bólenip júrgen ákim, – deıdi Úshtóbe aýylynyń qadirli aqsaqaly Jaqsybergen Ábdikárim.
Aýyl ákimdiginiń aldaǵy josparlary da naqty. Eń aldymen, turǵyndardyń baqsha sýarýyna qolaıly jaǵdaı jasaý úshin turaqty sý júıesin jolǵa qoıý mindeti tur. Sonymen qatar aýylishilik joldardy jóndeý, kópqabatty úılerde turatyn azamattar úshin ortalyqtandyrylǵan káriz júıesin júrgizý máseleleri kezeń-kezeńimen sheshimin tabady dep josparlanyp otyr.
– Áleýmettik salada da oń ózgerister bar. Keıingi jyldary aýyldaǵy mektep pen medısınalyq mekemelerge jas mamandar kele bastady. Sońǵy jyldyń ózinde «Dıplommen – aýylǵa!» baǵdarlamasy aıasynda jıyrmaǵa jýyq jas maman jumysqa ornalasty. Bul aýyldaǵy kadr tapshylyǵyn azaıtyp, bilim berý men medısına salasynyń sapasyn arttyrýǵa yqpal etip otyr. Sonymen qatar qazir aýyldyq basqarý júıesiniń tıimdiligin arttyrýǵa erekshe kóńil bólinýde. Osyǵan baılanysty halyq tikeleı saılaǵan aýyl ákimderiniń biliktiligin arttyrý baǵdarlamasy iske asyrylyp jatyr. Arnaıy kýrstarda biz «Jergilikti bıýdjetti tıimdi paıdalaný», «Memlekettik satyp alýlar men salyqtar», «Kommýnaldyq menshikti basqarý, ekologııa jáne qorshaǵan ortany qorǵaý», «Kásipkerlikti damytý jáne memlekettik qoldaý sharalary, óńirge ınvestısııa tartý», sondaı-aq «Memlekettik basqarýdaǵy sıfrlyq tehnologııalar men jasandy ıntellekt quraldaryn qoldaný» sııaqty mańyzdy baǵyttar boıynsha bilimimizdi jetildirýdemiz, – deıdi aýyl ákimi.
Otbasynda asyl jar, aıaýly ana Álem Qaıyrjanqyzy «atqarar sharýamyz budan kóp», deıdi. Bastysy, aýyl halqynyń amanatyn adal atqarýdy muraty sanaıdy. Olaı bolsa, eldik istiń basynda júrgen eljandy azamatqa qajymas qajyr-qaırat tileımiz!
Qaraǵandy oblysy,
Buqar jyraý aýdany,
Úshtóbe aýyly
