Sýretti túsirgen – Jumabaı MUSABEK
El ishinde áleýmettik qoldaýdy kúsheıtý baǵytyndaǵy mańyzdy qadamdardyń biri – kópbalaly analardy baspanamen qamtý. Osy baǵytta oblys ortalyǵynda áleýmettik osal sanattaǵy 28 otbasy úıli boldy. Olarǵa bir, eki jáne úsh bólmeli baspana kiltteri tabystaldy. Berilgen turǵyn úıler qalanyń «Jastar-3» turǵyn úı alabynan, «Shyǵys» shaǵyn aýdanynan jáne Qadyrǵalı Jalaıyrı dańǵylynda ornalasqan. Jańa páterge qol jetkizip, qýanyshy eselengen jandardyń qatarynda kóp balaly ana Baqyt Boztaeva da bar.
– Osy kúndi uzaq kúttim, turǵyn úı kezeginde 10 jylǵa jýyq ýaqyt turdym. Úsh bólmeli páterdiń kiltin aldym. Alty balanyń anasymyn, «Kúmis alqa» ıegerimin. Balalarymnyń óz shańyraǵy, jyly ári jaıly baspanasy bolǵanyna sheksiz qýanyshtymyn, – dedi ol.
Keıingi jyldary óńirde áleýmettik osal toptarǵa arnalǵan turǵyn úılerdiń qurylysy qarqyn alǵan. Memlekettik baǵdarlamalar aıasynda kópbalaly, tolyq emes jáne erekshe qajettiligi bar balalary bar otbasylarǵa basymdyq berilip keledi.
– On bir jyldan beri kezekte turdyq, búgin baspanaly bolý týraly armanymyz oryndaldy. Bizben birge qýanyshqa kenelip jatqan kórshilerimizdiń de jańa páterleriniń ishi qut-berekege toly bolsyn, – deıdi Eleonora Harıtonova.
Kóksý aýdanynyń Balpyq bı, Jambyl, Zylıha Tamshybaı aýyldarynda jalpy sany 7 úı qoldanysqa berildi. Jeke turǵyn úı kiltterine kezekte turǵan áleýmettik osal toptaǵylar, atap aıtqanda, tolyq emes jáne kópbalaly otbasylar, jetim balalar men ata-analarynyń qamqorlyǵynsyz qalǵan balalar sanatyndaǵy azamattar ıe boldy. Kóp jyldan beri kezekte turǵan otbasylarǵa bul kún – úmittiń aqtalǵan, armannyń oryndalǵan sáti.
– 2016 jyly turǵyn úı kezegine turǵanmyn. Tolyq emes otbasy sanaty boıynsha baspana alyp otyrmyn. Balalarymnyń óz shańyraǵy bar bolǵanyna qýanyshtymyn. Osyndaı qoldaý men qamqorlyq kórsetkeni úshin memleketimizge rızamyz, – deıdi Vesnıana Belova.
Oblys ákimi baspasóz qyzmetiniń málimetinshe, Taldyqorǵan qalasynda ótken jyly 600-den astam turǵyn baspanaly bolsa, osy jyldyń basynan beri 120-ǵa jýyq azamat óz páterlerine qol jetkizdi. Al Kóksý aýdanynda 2022–2024 jyldar aralyǵynda 188 otbasy baspanaǵa ıe boldy. Oǵan qosa áleýmettik osal sanatyndaǵy otbasylar úshin 90 jeke turǵyn úıdiń qurylysy aıaqtaldy. Jyl sońyna deıin kezekte turǵan azamattarǵa bul úıler kezeń-kezeńimen tabystalady.
Jetisý oblysy
