Bıyl ekinshi ret ótip otyrǵan mazmundy is-sharaǵa óńirlerden otandyq ǵylymdy damytýǵa aıryqsha úles qosyp júrgen ǵalymdar qatysty.
Kórnekti ǵalym, fızıolog Náılá Bazanovanyń esimi Ortalyq Azııa elderine alǵashqy áıel-akademık, qazaq áıelderi arasynan shyqqan tuńǵysh bıologııa ǵylymdarynyń doktory, professor retinde belgili. Akademık N.Bazanova atyndaǵy marapat – el ǵylymynyń damýyna eleýli úles qosyp júrgen ǵalym áıelderdi marapattaýǵa arnalǵan qurmet belgisi. Marapat ǵylym men tehnologııanyń úzdiksiz damýyn, akademık zertteýlerindegi jańashyldyqty beıneleıdi.
Saltanatty jıynda Prezıdent janyndaǵy UǴA prezıdenti Aqylbek Kúrishbaev ǵylym salasynda tabandylyqpen eńbek etip júrgen áıelderdi kóktemmen birge kelgen sulýlyq merekesimen quttyqtady.
«Elimizdiń ekonomıkalyq damýyn ǵylymnyń qatysýynsyz damytý múmkin emes. Osy oraıda Memleket basshysy ǵylym salasyna orasan zor mindet júktep otyr. Bul zertteý qyzmetin uıymdastyrýǵa degen kózqarasty ózgertip, ǵalymdy óziniń zııatkerlik áleýetin tolyq ashýǵa yntalandyratyn jańa tetikter jasaýǵa mindetteıdi. Jaýapkershiligi joǵary mindetti iske asyrýda ǵylymı qoǵamdastyqtyń áıelder qaýymyna erekshe senim artamyz. Názik jandylar bilim men ǵylymnyń damýyna, qoǵamnyń zııatkerlik áleýetin arttyrýǵa súbeli úles qosyp, urpaq tárbıelep júr. Jyl saıyn ǵylymdaǵy áıelder úlesi artyp, búginde kórsetkish 12 myńnan asady. Olardyń qatarynda ǵylym doktorlarynyń sany – 898, ǵylym kandıdattary – 2 859, PhD – 2 229, beıini boıynsha doktorlar – 185. Ǵylymdy damytýǵa baǵyttalǵan keshendi josparda ǵalym áıelderge túsetin salmaq ta, jaýapkershilik te joǵary. Biraq osyndaı kúrdeli mindetti iske asyrýda áıelder óz isine degen adaldyqpen el damýyna keleli úles qosyp jatyr», dedi UǴA prezıdenti.
Alqaly jıyn barysynda Almaty qalasy ákimi Darhan Satybaldynyń quttyqtaýyn Jastar saıasaty basqarmasynyń basshysy Ázız Qajdenbek jetkizip, ǵylymdy qoldaýǵa baǵyttalǵan jobalar týraly aıtyp ótti. Al izgi lebizin arnaǵan UǴA akademıgi Dılıara Qaıdarova, Qazaq ulttyq qyzdar pedagogıkalyq ýnıversıtetiniń rektory Beıbitgúl Kárimova qoǵamdaǵy ǵalym áıelderdiń róline, jetistigine toqtaldy.
Saltanatty jıynda Abaı atyndaǵy QazUPÝ professory Faýzııa Orazbaeva, R. Súleımenov atyndaǵy Shyǵystaný ınstıtýty janyndaǵy respýblıkalyq aqparattyq ortalyq dırektory, professor Merýert Ábýseıitova, Almaty tehnologııalyq ýnıversıtetiniń professory Marııam Alımardanova, ál-Farabı atyndaǵy QazUÝ professory Tamara Shalahmetova syndy 60-tan astam ǵalym marapattaldy.
ALMATY
