Dananyń zańǵar kókke degen qyzyǵýshylyǵy bala kezden bastalǵan. Es bilgeli ǵaryshqa, juldyzdar álemine qyzyǵyp, armany aspanmen astasqan. Ýaqyt óte kele qyzyǵýshylyǵy maqsatqa ulasyp, ómirlik jolyn avıasııamen ushtastyrdy.
«Ákem polısııada, anam áskerı salada qyzmet etti, qazir zeınetker. Olar tańdaýymdy ár kez qoldap, Qostanaıdaǵy Nazarbaev zııatkerlik mektebinde oqytty. Keıin bilim uıasyndaǵy baza Majarstan úkimetiniń Stipendium Hungaricum grantyn ıelenýge yqpaldasty. Bul baǵdarlamaǵa irikteý barysynda talapkerlerdiń aǵylshyn tilin meńgerý deńgeıi, fızıka men matematıka pánderinen bilimi, sondaı-aq oqý úlgerimi men jetistikteri eskerildi. Sóıtip, Debresen ýnıversıtetine «Kásibı ushqysh» baǵdarlamasyna qabyldandym», dedi Dana.
Ushqysh mamandyǵyna oqý barysynda stýdentter aldymen trenajerlyq ushaqtarda jattyǵyp, ushýdyń barlyq qımyl-qozǵalysyn meńgeredi. Ushaqtyń kóterilýi, quldılaýy, burylýy sekildi áreketter shynaıy jaǵdaıǵa barynsha jaqyn kórsetiledi. Ár jattyǵýdan keıin kýrsanttar jibergen qatelikterin taldap, keleside túzetýge tyrysady.
Dananyń aıtýynsha, ádette avıasııa salasyna bet burǵan kadetterdiń shamamen 40%-y oqýyn aıaqtamaıtyn kórinedi. Jalpy, álemdik statıstıkany baıqasaq ta áıel ushqyshtar sany shamamen 5 paıyzdy ǵana quraıdy. Ashyq derekkózderde elimizde 34 áıel ushqysh qyzmet etetini jazylǵan. Sarapshylar muny avıasııa salasyna qoıylatyn joǵary fızıkalyq jáne psıhologııalyq talaptarmen baılanystyrady. Oǵan qosa qoǵamdaǵy dástúrli kózqaras pen otbasylyq mindet te áser etetini sózsiz.
«Oqýǵa túsý, mamandyqty tolyq meńgerýdiń óz qıyndyǵy bar. Barlyq tekseris pen emtıhandardy shamań kelgenshe alǵashqy múmkindikte tapsyrýǵa umtylý mańyzdy. Mundaı jaýapkershilik pen daıyndyq keıin jumysqa ornalasý múmkindigin de edáýir arttyrady. Odan bólek ushqysh retinde eńbekke aralasý da jan-jaqty daıyndyqty talap etedi. Sheteldik nemese otandyq kompanııada bolsyn, kandıdattar keshendi túrde baǵalanady. Psıhomotorlyq, psıhotehnıkalyq qabilet, tulǵalyq erekshelik men ynta-jigeri, ushý daǵdylary, stress jaǵdaıynda áreket etý, kútpegen jaǵdaıdy sheshý qabileti eskeriledi. Densaýlyǵyńyzdy skanerlep, lýpamen qaraǵandaı qadaǵalaıdy. Men de oqý aıaqtalysymen, osyndaı tekseristen ótip, qazir «Air Astana» kompanııasynda ekinshi ushqysh retinde jumysqa ornalastym. Eldegi aýqymdy áýe kompanııasynyń quramynda bolǵanyma shamamen bir jyldan asty», dedi D.Qylyshbaeva.
«Ushqysh qyz alǵash ret 2021 jyly shaǵyn «Cessna–172» ushaǵynyń shtýrvalyna otyrǵan. Ushaq kókke kóterilgende ol erekshe qýanysh pen tolqýdy qatar sezingenin aıtady. Al qazir Dana halyqaralyq baǵyttar boıynsha jolaýshylardy tasymaldap júr. Kóbine Jıdda, Saýd Arabııasyna jol túsedi», deıdi keıipkerimiz.
Negizinen ushqyshtardyń ár reısi úlken daıyndyqty talap etedi. Ushý aldynda ekıpaj aýa raıy boljamyn zerttep, ushý jáne qoný josparlaryn qaraıdy. Brıfıng ótkizilip, reıs barysyndaǵy barlyq rásim talqylanady.
Aldaǵy ýaqytta Dana kásibı tájirıbesin odan ári arttyryp, kúrdeli halyqaralyq baǵytta jolaýshylar tasymaldaýdy maqsat etip júr. Sóz aıaǵynda aspandy serik etken arý qyz-kelinshekterge óz armandarynan qoryqpaı, alǵa umtylýǵa keńes berdi.
«Armandaryńyz bıik bolsyn. О́mirlerińiz kók aspan sekildi shetsiz, sheksiz ári ashyq bolsyn», deıdi jas ushqysh.
