Qaıyrgúl Saılaýqyzy osy ýaqyt ishinde qatardaǵy qyzmetkerden tájirıbeli aǵa jedel ýákilge deıingi joldan ótti. Pavlodar óńirindegi qylmystyq toptardyń jolyn kesý, zańsyz áreketterdi áshkereleý men qoǵamdyq qaýipsizdikti saqtaý jolynda keıipkerimiz talaı kúrdeli tapsyrmany oryndady. О́ńirlik uıymdasqan qylmysqa qarsy kúres basqarmasynda jumys isteý fızıkalyq daıyndyqty ǵana emes, analıtıkalyq oılaý men psıhologııalyq tózimdilikti de qajet etedi. Onyń aıtýynsha, bul salada áıelge tán qyraǵylyq pen ıntýısııa sheshýshi ról atqarady.
«Maı aýdanynyń týmasymyn. Mektepti Semeı óńirinde oqyp, Almatydaǵy Qazaq qyzdar pedagogıkalyq ınstıtýtyn támamdadym. Bala kezimnen polısııa kıimin kıgenderge qatty qyzyǵatynmyn, onyń ústine naǵashym ishki ister organynda qyzmet etti. Sol áser etken bolýy kerek, 2007 jyly Pavlodar qalasyndaǵy Ońtústik polısııa bólimine jumysqa turdym. Bilikti maman bolyp qalyptasýyma kómek kórsetken birinshi basshylarym Q.Túsipbekov pen B.Bólejanovqa, tálimgerlerim Irına Krıvova men Gúlmıra Dáýletshınaǵa, Aıgerim Nurbaıqyzyna alǵysym sheksiz. Polısııada áıel nemese er adam dep bóliný joq. Bizde tek ortaq mindet – zańdylyqty qamtamasyz etý, azamattardyń tynyshtyǵyn qorǵaý ǵana bar. Kún saıynǵy qıyndyqqa qaramastan, jumysymdy adal atqarýǵa tyrysamyn», dedi Q.Ońalbaeva.
Uıymdasqan qylmystyq ister boıynsha óńirde orman aǵashtaryn urlaý, kontrabandalyq ónimderdi tasymaldaý, kásiporyndardyń múlkin tonaý, uıymdasqan qylmystyq toptar qurý sııaqty zań buzýshylyq jıi tirkeledi eken.
«Máselen, jaqynda Baıanaýyl aýdanynda «Qyzyl kitapqa» engen suńqarlardy ustap, shetel asyrmaq bolǵan uıymdasqan qylmystyq top múshelerin quryqtadyq. Kúdiktiler týraly málimetterdi uzaq jınadyq. Nátıjesinde, bultartpas aıǵaqtar tabyldy. Izdestirý barysynda satý maqsatynda temir torǵa qamap qoıǵan 32 suńqar anyqtaldy. Qylmystyq iske qatysy barlar qazir tergelip jatyr. Onyń aldynda birneshe jyl ormandy otap kelgen uıymdasqan qylmystyq top múshelerin anyqtap, qolǵa túsirgen edik. Osyndaı keshendi jumystyń arqasynda zańǵa qaıshy áreket jasaǵandar jazasyn alyp jatyr», dep qosty ol.
Aǵa jedel ýákildiń aıtýynsha, oblystyq polısııa departamentine qarasty uıymdasqan qylmysqa qarsy kúres basqarmasynda segiz jyldan asa ýaqyt eńbek etip keledi. Ujymdaǵy kileń erler arasynda nebári úsh arý jumys isteıtinin, alǵashqyda qıyn bolǵanymen búginde ábden tóselip alǵanyn jetkizdi. Jyldam oılaý, dereý áreket etý, jaǵdaıdy shuǵyl túrde taldaý – kúndelikti talap etiletin daǵdylar. Basqarma qyzmetkerleri kúndelikti shuǵyl tapsyrmalardy der kezinde sheship otyrýy qajet.
Basqarma basshylyǵy Qaıyrgúldiń eńbek joly jas mamandarǵa úlgi ekenin aıtady. 20 jylǵa jýyq tájirıbesi bar ofıser retinde ol óziniń bilimin keıingi tolqynǵa úıretýden jalyqqan emes. Pavlodar oblysynyń krımınogendik ahýalyn jaqsartýǵa qosqan úlesi úshin birneshe márte vedomstvolyq marapattarmen, Alǵyshattarmen marapattalǵan. Otbasynda bir ul, bir qyz ósirip otyrǵan ardaqty ana. Balalary mektepte úlgili oqyp, bilim dodalarynda top jaryp júr. Jetkinshekteriniń jetistigi boıyna qýat beredi.
Sóz sońynda Qaıyrgúl Saılaýqyzy mamandyǵyn maqtan tutatynyn jetkizdi. Aıaýly jan barlyq názik jandardy, sonyń ishinde pogon taqqan arýlardy kóktemniń shýaqty merekesimen quttyqtap, baq-bereke tiledi.
Pavlodar oblysy
