Qunanbaı kóshesinde ornalasqan 14 qabatty «Abaı eli» zamanaýı turǵyn úı kesheninde ótken saltanatty sharaǵa oblys ákimi Berik Ýálı men «Otbasy bank» AQ basqarma tóraıymy Lázzat Ibragımova qatysty. Keshenniń bir ereksheligi – mundaǵy úılerge Abaı, Shákárim, Muhtar syndy uly tulǵalardyń esimi berilgen. Aımaq basshysy turǵyndardyń turmys sapasyn arttyrý – memlekettik saıasattyń basymdyǵy ekenin atap ótti.
«Jyl basynan beri baspanamen qamtý jumysy júıeli jalǵasyp keledi. Aqpanda Ushaqtar kentinde 26 otbasyna kilt tabys- talsa, búgin kópbalaly otbasylar, áleýmettik osal toptar men jetim balalar sanatyndaǵy taǵy 50 otbasy qýanyshqa kenelip otyr. Jyl sońyna deıin barlyǵy 327 semeılik baspanaly bolady», dedi B.Ýálı.
«Otbasy bank» AQ basqarma tóraıymy L.Ibragımova óńirdegi turǵyn úı jınaq júıesine suranys artqanyn, qazir oblystyq fılıalda 80 myńnan astam salymshy bar ekenin jetkizdi.
Sarapshylardyń pikirinshe, turǵyn úı máselesin sheshý óńirdiń demografııalyq, ekonomıkalyq turaqtylyǵyna tikeleı áser etedi. Ulttyq statıstıka bıýrosynyń málimetinshe, 2024 jyldyń qorytyndysy bo-ıynsha elimizde bir turǵynǵa shaqqandaǵy turǵyn úı qory 24 sharshy metrden asqan. Memleket bul kórsetkishti arttyrý maqsatynda áleýmettik osal toptardy baspanamen qamtý baǵdarlamalaryn keńeıtip otyr. Sol turǵyda Abaı oblysynda da birqatar aýqymdy is atqarylyp jatyr. Byltyr Semeıdiń Qaraǵaıly shaǵyn aýdanynda jalpy aýmaǵy 27 myń sharshy metr bolatyn bes turǵyn úı paıdalanýǵa berildi. Sonymen qatar jyl sońyna deıin taǵy eki turǵyn úıdi iske qosý josparlanyp otyr. Bıyl áleýmettik osal toptarǵa 360 jaldamaly páter satyp alynyp, «Otbasy bank» arqyly beriledi. «Abaı jastary» baǵdarlamasy aıasynda 40 páter jas mamandarǵa usynylady.
Turǵyn úımen qamtý jumysy tek oblys ortalyǵynda ǵana emes, basqa qalalarda da jalǵasyp jatyr. Máselen, ótken aıda Kýrchatov qalasynda 22 otbasy baspanaly boldy. Aldaǵy ýaqytta taǵy 14 páterdi berý josparlanǵan. Jeke ınvestordyń qarjysy esebinen Mektep kóshesinde ornalasqan 36 páterli tórt qabatty turǵyn úı qaıta qalpyna keltirildi. Onyń ishinde 8 bir bólmeli, 16 eki bólmeli, 12 úsh bólmeli páter bar.
Turǵyn úı máselesi bir kúnde sheshiletin sharýa emes. Degenmen jańa qonysqa kirgen ár otbasynyń shattyǵy bul baǵyttaǵy jumystyń qoǵam úshin qanshalyqty mańyzdy ekenin aıǵaqtaı túsedi.
Abaı oblysy
