Sýretti túsirgen – Asylbek NÁSIPQALIULY
Mundaǵy 31 eldi mekende «aýylnaı» degen qoǵamdyq laýazym belgilengen. Aýylnaılar – sol aýyldyń bas kótergen azamaty, el aǵalary, jalaqy almasa da týǵan jeriniń múddesi jolynda kún-tún demeı, qaırat kórsetip júrgender. Kókterek aýyldyq okrýgine qarasty Satybaldy aýylynyń aýylnaıy Rýslan Sarbaev – «Raıymbek» sharýa qojalyǵynyń jetekshisi. Rýslan Samıǵollauly bıyl óz aýylynda dúnıege kelgen ár balaǵa 200 myń teńge qarjylaı syıaqy tabystaıtynyn málimdegen edi. Jaqynda syılyqtyń alǵashqy laýreattary belgili boldy.
Shaǵyn ǵana Satybaldy aýylynda nebári 253 adam turady. Jyl basynan beri munda 4 bala dúnıe esigin ashqan eken. Kóktem merekesine oraı ótken saltanatty jıynda jas bosanǵan Nurly Qaıyrǵalıqyzy, Gúldana Ádilbekqyzy, Aıajan Rýslanqyzy, Ásel Beıbitqyzy aýylnaıdyń arnaıy syılyǵyna ıe boldy.
– Aýylnaılar jergilikti ákimdikpen, depýtattarmen, qoǵamdyq keńes músheleri, kásipkerler, sharýa qojalyqtary, aýyl turǵyndarymen tyǵyz baılanysta jumys isteıdi. Qyzmeti aýyldyq jerdiń órkendeýine, turǵyndardyń ál-aýqatyn arttyrýǵa baǵyttalǵan. Halqymyz anany árdaıym erekshe qurmettegen. Búgingi shara da ardaqty analarǵa, jas otbasyǵa degen shynaıy qurmet pen janashyrlyqtyń jarqyn kórinisi. Satybaldy aýylynyń aýylnaıy, el janashyry Rýslan Samıǵollauly Sarbaev óz bastamasymen 2026 jyly dúnıege sábıi kelgen 4 otbasyǵa 200 myń teńge kóleminde qarjylaı qoldaý kórsetip otyr. Bul ómirge jańa kelgen sábıge degen aq tilektiń, anaǵa degen qurmettiń, aýyl bolashaǵyna degen senimniń belgisi. Memleket basshysy Qasym-Jomart Kemeluly Toqaev: «Tabysqa jetken árbir kásipker óz aýyl-aımaǵynyń órkendeýine úles qosyp, qarjy salsa, elimizdegi kóptegen eldi meken kórkeıe túseri anyq», dep atap ótken bolatyn. Búgingi ıgi is osy sózdiń ómirsheńdigin dáleldeıtin naqty qadam, – dedi Qaztalov aýdanynyń ákimi Aslanbek Sarqulov.
Dárigerlerdiń málimetinshe, bıyl Satybaldy aýylynda taǵy 10 otbasy sábıli bolady eken. Demek aýylnaıdyń syılyǵy demografııaǵa oń áser etip jatqan sııaqty. Náreste kútken jas otbasynyń bıýdjetine memleket qoldaýynan bólek, aýyldas kásipker taǵaıyndaǵan jórgekpul da qosylatyny álbette, jaqsy jańalyq.
– Aýylymyzdyń janashyry Rýslan aǵamyzdyń bastamasy jas otbasylarǵa úlken demeý boldy. «Berseń balaǵa ber», deıdi halqymyz. Biz muny balamyzdyń nesibesi dep bilemiz. El aǵalaryna myń da bir rahmet, – deıdi jas ana Nurly Qaıyrǵalıqyzy.
Aıta keteıik, Satybaldy eldi mekenine «Qaladan – aýylǵa» baǵdarlamasy aıasynda sońǵy eki jylda eki otbasy kóship kelgen edi. Buıyrsa, bıyl taǵy bir otbasy qonys aýdarmaqshy.
