№200 mektep ǵımaratynda ornalasqan ýchaskede saılaýshylardy ulttyq naqyshtaǵy kıim kıgen «Ájeler hory» qarsy aldy. Ánshi ájeler alǵashqy mınýttan-aq merekelik kóńil kúı syılap, halyq ánderin oryndady. Sonymen qatar kelgen turǵyndardy qýanysh pen berekeniń, aq tilektiń belgisi sanalatyn dástúrli shashý rásimimen qarsy aldy.
Shashylǵan tátti dámder men jınalǵan jurttyń shat kúlkisi aınalany erekshe merekelik kóńil kúıge bóledi. Shaǵyn aýdan turǵyndarynyń kópshiligi daýys berý kúniniń osyndaı jyly ári áserli bastalaryn kútpegenin aıtty. Kópshilik hor múshelerimen birge sýretke túsip, merekelik kóńil kúı syılaǵandary úshin alǵys bildirdi. Olardyń aıtýynsha, mundaı bastamalar mańyzdy qoǵamdyq sharalardy halyqqa jaqyndatyp, shynaıy merekelik atmosfera qalyptastyrady.
Astanada referendým ýchaskesine robot-ıtpen kelgen qyz jurt nazaryn aýdardy
Uıymdastyrýshylardyń aıtýynsha, sharanyń basty maqsaty – turǵyndarǵa kóterińki kóńil kúı syılaý ǵana emes, sonymen qatar qazaq halqynyń baı dástúrlerin nasıhattaý. Osyndaı mańyzdy memlekettik oqıǵa – referendým kúni almatylyqtar ulttyq qundylyqtardy qadirleı otyryp, qonaqjaılyq dástúrin de aıqyn kórsetti.
