Prezıdent búgin tarıhı kún ekenin atap ótip, jastarǵa rızashylyǵyn bildirdi.
«Shyn máninde, bul kún el ómirinde máńgi saqtalady. Endi 15 naýryz – Konstıtýsııa kúni bolyp belgilenedi. Bul – elimizdiń basty qujaty. Men basqa da memleketterdiń konstıtýsııalarymen tanysyp shyqtym. Bizdiń Konstıtýsııamyz eń úzdik Ata zańdardyń qatarynda turady dep senimmen aıta alamyn», dedi Memleket basshysy.
Sonymen qatar Prezıdent jańa Konstıtýsııa, eń aldymen, jastarǵa arnalǵanyna nazar aýdardy. Ata zańǵa volonterlik qyzmet, ǵylym, ınnovasııa jáne jasandy ıntellekt sııaqty uǵymdar engizilgenine toqtaldy.
«Aýqymdy úgit-nasıhat naýqany júrgizildi. Aldymyzda jumys kóp. Endi jazda Parlament saılaýy ótedi. Ony bir el bolyp atqarýymyz kerek. Bul jastardyń parlamenti bolýy qajet dep oılaımyn», dedi Qasym-Jomart Toqaev.
Kezdesýde «Jastar rýhy» jastar qanatynyń tóraǵasy Aqerke Eskendirova, kreatıvti ındýstrııa ókili, kásipker Kamıl Baıramov, belsendi jastar Erjan Hamıtov pen Nurbol Serikbaı sóz sóıledi.
Jastar bir aı ishinde túrli formatta 5 myńǵa jýyq kezdesý ótkizip, oǵan 1,5 mıllıonnan asa azamat qatysqanyn jetkizdi. Sondaı-aq elimizde qolǵa alynǵan ózgeristerdiń barlyǵyn qoldaıtynyn aıtty.
Aıta keteıik, 15 naýryzda Qazaqstanda jańa Konstıtýsııany qabyldaý máselesine arnalǵan respýblıkalyq referendým ótti. Eldiń barlyq óńirinde, sondaı-aq sheteldegi Qazaqstan Respýblıkasynyń dıplomatııalyq ókildikterinde daýys berý ýchaskeleri ashyldy. Qazaqstandyqtar «konstıtýsııalyq reformany qoldaı ma, álde qoldamaı ma» degen suraqqa jaýap berdi.
Aýmaqtyq komıssııalardyń derekterine sáıkes, eldiń barlyq óńirinde referendýmǵa 9 126 850 qazaqstandyq kelip daýys bergen. Aldyn ala málimet boıynsha, referendýmdaǵy jalpy qatysý deńgeıi 73,24% boldy.
