Jýrnalıster aldynda saıasattanýshylar Nurbolat Nyshanbaı, Nurgeldi Ábdiǵanıuly, qoǵam qaıratkeri Dos Kóshim jáne qoǵam múshesi Beknur Qysyqov pikir bildirdi. Spıkerlerdiń aıtýynsha, táýelsiz baqylaýshylar tobyn qurý bastamasy jańa Konstıtýsııa jobasynyń alǵashqy nusqasy jarııalanǵan sátte kóterilgen. Ideıany saıasattanýshy Nurbolat Nyshanbaı usynǵan, keıin bul usynysty qoǵamdyq belsendiler men azamattyq qoǵam sarapshylary qoldaǵan.
TúrkPA baıqaýshylary: Referendýmda zań buzýshylyqtar anyqtalǵan joq
Baqylaýshylardyń negizgi mindeti 15 naýryz kúni ótken daýys berý rásimine qoǵamdyq baqylaý júrgizip, prosestiń ashyqtyǵyn qamtamasyz etý jáne yqtımal zańbuzýshylyqtardyń aldyn alý edi. Osy maqsatta bir aı boıy daıyndyq júrgizilip, eldiń ár qalasynan eriktiler tartylyp, arnaıy oqytý men nusqaýlyqtar uıymdastyrylǵan. Qatysýshylarǵa saılaý zańnamasynyń talaptary men qoǵamdyq baqylaý qaǵıdalary túsindirilgen.
Referendým kúni «Halyq úni» tobynyń shamamen eki myń baqylaýshysy Qazaqstannyń 11 qalasyndaǵy ýchaskelerde jumys istedi. Olardyń qatarynda Almaty, Taraz, Túrkistan, Oral, Qonaev jáne Taldyqorǵan qalalary bar. Baqylaýshylar ýchaskeler ashylǵan sátten bastap daýys berý aıaqtalǵanǵa deıin qatysyp, rásimderdiń saqtalýyn baqylap, barlyq derekti tirkep otyrǵan.
Saıasattanýshy Nurbolat Nyshanbaıdyń aıtýynsha, mundaı táýelsiz baqylaý bastamalary qoǵamdaǵy saıası mádenıetti damytýǵa jáne ınstıtýttarǵa degen senimdi kúsheıtýge yqpal etedi. Onyń sózinshe, baqylaý barysynda jınalǵan usynystar men eskertýler aldaǵy ýaqytta taldanyp, Ortalyq referendým komıssııasyna joldanady.
Spıkerlerdiń málimetinshe, sarapshylar jasaǵan qorytyndy jalpy alǵanda Ortalyq referendým komıssııasy jarııalaǵan resmı aqparatpen sáıkes shyqqan. Sonymen qatar Astana, Almaty jáne Shymkent sııaqty iri qalalardaǵy ýchaskelerde táýelsiz baqylaýshylardyń bolýy qoǵamdyq baqylaýdyń mańyzdy tetigine aınalǵany aıtyldy. Bul óz kezeginde daýys berý rásiminiń ashyqtyǵyn qamtamasyz etip, azamattardyń saıası naýqanǵa degen senimin arttyrýǵa múmkindik bergen.
Oljas Bektenov: El taǵdyryna qatysty tarıhı oqıǵanyń kýágeri boldyq
Kezdesý sońynda top ókilderi bastamanyń negizgi maqsaty qoǵamnyń saılaý rásimine degen senimin nyǵaıtyp, azamattyq qatysý mádenıetin damytý ekenin atap ótti. Baspasóz konferensııasy qoǵamdyq baqylaýdyń alǵashqy qorytyndysyn jarııalap qana qoımaı, mańyzdy saıası prosestiń ashyqtyǵyn qamtamasyz etýdegi azamattyq qoǵamnyń róli týraly pikir almasýǵa arnalǵan alańǵa aınaldy.
