Kýmıte saıysynda +68 kg salmaq dárejesinde synǵa túsken jerlesimiz mereıimizdi asyrdy. Aqpan aıynda Túrkııa astanasy – Ystanbulda ótken premer-lıga dodasynda da Sofıanyń baǵy janyp, top jarǵan bolatyn. 61 kg salmaq dárejesinde synǵa túsken Ásel Qanaı fınalda japon sportshysy Sarara Shımadaǵa ese jiberip, kúmis medaldi mise tutty. Erler dodasynda aıqasqan sportshylarymyzdyń arasynan tek Mıras Ábdiqadyrǵa (60 kg) ǵana júlde buıyrdy. Mundaı dúbirli dodaǵa alǵash ret qatysqan Mıras qola medal úshin jekpe-jekte túrik Býrak О́zdemırdi jeńdi.
* Jeńil atletıkadan elimizdiń ulttyq quramasy Japonııanyń Nomı qalasynda ótip jatqan Azııa chempıonatynda bir júldege ıe boldy. Qurlyqtyń tańdaýly atletteri jınalǵan alamanda jerlesimiz Iаsmına Toqsanbaeva sporttyq júristen kúmis júldeger atandy. Jartylaı marafon synynda Jasmınanyń aldyn tek qytaı qyzy Chjan Tın orap, Azııa chempıony atandy. Qola medal da Qytaı sportshysy Lıý Haııanǵa buıyrdy.
* Taıland astanasy – Bangkokta bokstan 19 jasqa deıingi jastar arasynda ótken Futures Cup halyqaralyq týrnırinde sportshylarymyz 11 medal oljalady. World Boxing uıymy uıymdastyrǵan básekede Dosjan Jumaqan (60 kg), Beıbarys Áshirbaı (70 kg), Hamza Maqsatuly (75 kg) týrnır chempıony atandy. Qyzdar arasynda Aıdana Ýbaıdýllaqyzy (80 kg) altyn medal ıelendi. Kúmis júldeni Tımýr Taıbekov (80 kg), Jalǵas О́tebekov (90 kg), Vladıslav Samojonov (+90 kg) enshiledi. Jarystyń qola medali Aqnur Tursynǵalı (57 kg), Zarına Tolybaı (75 kg), Nursultan Qystaýbaıǵa (85 kg) buıyrdy. Taılandtaǵy týrnırde jazda Dakarda ótetin jasóspirimderdiń Olımpıadasyna lısenzııa taratyldy.
* Elimizdiń birinshi raketkasy, tennısshi Elena Rybakına WTA (Women’s Tennis Association) qaýymdastyǵynyń jańartylǵan reıtınginde joǵarylap, 2-satyǵa ornyqty. Elena AQSh-ta ótken Indian Wells Open týrnıriniń fınalynda álemniń birinshi raketkasy, belarýstik Arına Sobolenkoǵa ese jiberdi. Degenmen WTA 1000 sanatyndaǵy týrnırdiń fınalyna jetken jerlesimiz 7 783 upaı jınady. Kósh basyndaǵy Arınanyń enshisinde 11 025 upaı bar. Polıak Iga Shventek 7 413 upaımen úshtikti túıindep tur. Taǵy bir tennısshimiz Anna Danılına da álemdik reıtıngtegi kórsetkishin jaqsartyp, juptyq nátıjede 4-orynǵa kóterildi.
* Polsha astanasy – Varshavada dzıýdodan eresekter arasynda Eýropa kýbogi ótti. Elimizdiń balýandary 1 altyn, 1 kúmis, 3 qola júlde oljalap, jalpy nátıjede 5-satyǵa ornyqty. Erler arasyndaǵy tartysta 60 kg salmaqta úsh birdeı sportshymyz júldeger atandy. Suńǵat Nurlatuly men Toqtar Úmitálıev fınalda beldesip, Toqtar chempıon atansa, Suńǵat kúmisti mise tutty. Bul salmaqtyń qola medali Asylhan Zınýllınge buıyrdy. Ol polıak Ksaverıı Ignasıakty jyqty. 90 kg salmaqta beldesýge túsken Aıbol Nysanáli qola júlde jolynda ýkraınalyq Oleksandr Toktamyshty toqtatty. Áıelder arasynan tek Kámıla Berliqash (+78 kg) qana júlde aldy. Ol qola medal úshin ótken tartysta ıtalııalyq Alessııa Djordanodan basym tústi. Eýropa kýbogine 27 elden 320 balýan qatysty.
* Túrkııanyń Antalıa qalasynda ótken sporttyq gımnastıkadan álem kýbogi kezeńinde Zeınolla Ydyrysov kúmis júlde oljalady. At snarıady jattyǵýynyń fınalynda ol 13 733 upaı jınady. Álem kýboginiń altyn medali 13 900 upaı alǵan ırlandııalyq Rıs Makklenaganǵa buıyrsa, qola júlde de sol eldiń spaortshysy Djeıms Hıkkıge (13 566 upaı) buıyrdy.
* Trıatlonnan jasóspirimder arasyndaǵy Azııa chempıonaty Gonkongte ótip jatyr. Qyzdar arasyndaǵy tartysta Dıana Erjanova 01.01.59 ýaqytpen qurlyq chempıony atandy. Kúmis medal japon qyzy Kanade Sýgıýraǵa, qola júlde Ońtústik Koreıa jelaıaǵy Pak So Ynǵa buıyrdy. Uldar arasynda senim artqan sańlaǵymyz Ramazan Áınekov 55.39 ýaqyt kórsetkishimen qola medal enshiledi.
