Foto: Aqorda
Memleket basshysyna 2025 jyldyń qorytyndysy boıynsha ishki jalpy ónimniń 19 paıyzǵa jýyǵy saýda-sattyqqa tıesili ekeni baıandaldy. Qazaqstan ekonomıkasynyń mańyzdy sektorlarynyń biri sanalatyn salaǵa 1,2 trıllıon teńge ınvestısııa quıylǵan. Al taýar aınalymy 8,9 paıyzǵa ulǵaıyp, 80,3 trıllıon teńgege jetken.
Qasym-Jomart Toqaevqa elektrondy saýdanyń damýy jóninde málimet berildi. Byltyr onyń kólemi 3,9 trıllıon teńgeni quraǵan. Bul – bólshek saýdanyń 15 paıyzyna teń. Elimizde 10 logıstıka ortalyǵynan turatyn jeli qalyptasty. Astana men Almaty qalalarynda eki iri fýlfılment-ortalyq salynyp jatyr.
Saýda jáne ıntegrasııa mınıstrligi elimizdiń eksporttyq áleýetin nyǵaıtýǵa aıryqsha mán berýde. Jahandaǵy ekonomıkalyq syn-qaterlerge qaramastan, syrtqy naryqqa shyǵarylatyn shıkizattyq emes taýar túrleri men qyzmetter kólemi 41 mıllıard dollarǵa jetti. Eksporttaýshylardy qarjylaı qoldaý tetikteri aıtarlyqtaı keńeıdi. Atap aıtqanda, saqtandyrý somasynyń maksımaldy mólsheri 1,2 trıllıon teńgege deıin kóbeıip, qoldaý sharalary eki ese artty.
Memleket basshysyna Eýrazııalyq ekonomıkalyq odaq aıasynda atqarylyp jatqan jumystar jóninde aıtyldy. EAEO qurylǵannan beri 70 saýda kedergisiniń 69-y joıyldy. Kelissózder nátıjesinde elimizdiń birqatar máselege qatysty ustanymy eskerildi. Onyń qatarynda Qazaqstan kásiporyndaryna dempıngke qarsy baj salyǵyn tólemeı, keıbir taýar túrlerin kirgizýge kvota berý sekildi mańyzdy mámileler bar.
Prezıdent vedomstvoǵa zamanaýı saýda ekojúıesin qalyptastyrý, otandyq óndiristiń ósýine qolaıly jaǵdaı jasaý, tutynýshylardyń quqyqtaryn jan-jaqty qorǵaý, eksporttyq áleýetti nyǵaıtý, sondaı-aq eldiń ekonomıkalyq múddelerin ilgeriletý jóninde birqatar mindet júktedi.
