«Sıonıstik rejımniń eń iri munaı óńdeý keshenderi sanalatyn Haıfa men Ashdodtaǵy munaı óńdeý zaýyttaryna zymyrandarmen soqqy jasaldy», delingen Irannyń memlekettik teleradıo kompanııasy taratqan KSIR málimdemesinde.
Osylaısha, KSIR AQSh pen Izraılge qarsy «Shynaıy ýáde 4» operasııasy aıasyndaǵy 65-shi soqqy tolqyny týraly habarlap, Izraıldegi ondaǵan áskerı nysanǵa da shabýyl jasalǵanyn atap ótti.
«Izraıldiń ońtústigi men ortalyq bóligindegi, sonyń ishinde Rıshon-le-Sıon qalasy mańyndaǵy, sondaı-aq Tel-Avıvtiń shyǵysy men ońtústigindegi 80 túrli áskerı nysan zymyran júıeleri men ushqyshsyz apparattar arqyly dál soqqyǵa ushyrady», dep keltiredi korpýstyń málimdemesin IRNA agenttigi.
Sondaı-aq KSIR Izraıldiń «strategııalyq nysandaryna», onyń ishinde Tel-Avıvtegi Ben-Gýrıon áýejaıyna, Izraıldiń ulttyq qaýipsizdik mınıstrligine, Tel-Avıvtegi 13-arnanyń keńsesine, sondaı-aq Izraıldiń qurlyq áskerine qatysty nysandarǵa soqqy jasalǵanyn málimdedi.
Shabýyldar ushqyshsyz ushý apparattary men zymyrandar arqyly jasalǵany atap ótildi.
Iran AQSh pen Izraıl tarapynan jasalǵan shabýylǵa jaýap retinde Taıaý Shyǵystaǵy AQSh-tyń áskerı nysandaryna jáne Izraıl aýmaǵyna soqqy berip jatyr. Qaqtyǵystyń alǵashqy kúni, 28 aqpanda, Irannyń ońtústigindegi qyzdar mektebi soqqyǵa ushyrap, joǵarǵy kóshbasshy aıatolla Álı Hameneı qaza tapqan. BUU janyndaǵy Irannyń turaqty ókili Ámir Saıd Iravanıdiń málimetinshe, shabýyl qurbandarynyń jalpy sany 1,3 myńnan astam beıbit turǵyndy qurap, 17 myńnan astam adam jaralanǵan.
