Foto: Sý resýrstary jáne ırrıgasııa mınıstrligi
Sý resýrstary jáne ırrıgasııa mınıstrligi 2027 jylǵa deıin Aqmola, Batys Qazaqstan, Qostanaı, Jetisý jáne Ulytaý oblystarynda jerasty sýyn izdestirý-barlaý jumystaryn júrgizýdi josparlap otyr. Atalǵan bastama jerasty sý qorynyń resýrstyq áleýetin keńeıtip, ekonomıkanyń túrli salalaryn turaqty sýmen qamtamasyz etýge múmkindik beredi.
Sonymen qatar 2026 jyly jerasty sý ken oryndaryn barlaýǵa arnalǵan 28 jańa joba ázirleý kózdelgen. Onyń ishinde Jambyl oblysynda – 9 joba, Aqmola oblysynda – 3 joba, Batys Qazaqstan jáne Túrkistan oblystarynda – 4 jobadan, Mańǵystaý men Atyraý oblystarynda – 2 jobadan iske asyrylady. Budan bólek, Shyǵys Qazaqstan, Pavlodar, Qyzylorda, Ulytaý oblystarynda 1 jobadan júzege aspaq.
GIZ Qazaqstannyń Sý resýrstary jáne ırrıgasııa mınıstrligine 240 jańa tehnıka beredi
Qazirgi tańda Qazaqstan aýmaǵynda aýyzsý, óndiristik jáne aýyl sharýashylyǵy qajettilikterine arnalǵan 4 803 jerasty sý ken orny barlanǵan. Memlekettik balans derekterine sáıkes, jerasty sýynyń táýliktik paıdalanýǵa bolatyn qory 43,2 mln tekshe metrdi quraıdy. Alaıda sonyń nebári 1,5 mln tekshe metri ǵana paıdalanylyp otyr, bul jalpy kólemniń 3,6%-y.
Barlanǵan qor qurylymynda 21,2 mln tekshe metr aýyzsý men turmystyq qajettilikke, 2,4 mln tekshe metr óndiristik-tehnıkalyq maqsattarǵa, al 19,6 mln tekshe metr sýarmaly eginshilikke baǵyttalǵan.
«Sý tapshylyǵy kúsheıip, klımattyq ózgerister údegen tusta jerasty sýynyń áleýetin damytý – negizgi strategııalyq baǵyttardyń biri. Qazirgi tańda onyń edáýir bóligi tolyq zerttelmegen», dedi Sý resýrstary jáne ırrıgasııa vıse-mınıstri Talǵat Momyshev.
Osyǵan baılanysty mınıstrlik jerasty sýyn keshendi paıdalaný tujyrymdamasyn ázirleýdi bastaǵan. Qujat jerasty sý resýrstaryn basqarýdyń zamanaýı júıesin qalyptastyrýǵa baǵyttalǵan.
