foto: Aqorda
Paternalızmnen – múmkindikter qoǵamyna
Memleket basshysy óz sózinde eldiń damý modelin ózgertý qajettigine erekshe nazar aýdardy. Onyń aıtýynsha, Qazaqstan paternalıstik tásilden bas tartyp, basty resýrs retinde adam men onyń qabiletteri alǵa shyǵatyn júıege kóshýi tıis.
«Ǵylymda naqty nátıjege jetý úshin adamı kapıtalǵa aıryqsha kóńil bólý qajet. Biz jas urpaqty tárbıeleý men azamattardy qoldaý tásilderin áleýmettik ádildik, patrıotızm jáne eńbekqorlyq turǵysynan qaıta qaraýymyz kerek», dedi Prezıdent.
Toqaev jańa Konstıtýsııanyń dál osy sebepti adamǵa baǵdarlanǵan sıpatqa ıe ekenin atap ótti.
Aımaqtar – ǵylymnyń ósý núkteleri
Prezıdent óńirlerdegi ǵylymdy damytýǵa da erekshe toqtaldy. Onyń aıtýynsha, ákimdikterge ǵylymı-tehnologııalyq saıasatty iske asyrý ókilettikteri berilgen.
Qazirgi tańda 11 óńirlik joǵary oqý ornynda akademııalyq artyqshylyq ortalyqtary men ǵylymı-zertteý ortalyqtary qurylýda. Bul ortalyqtar balamaly energetıkadan bastap bıotehnologııaǵa deıingi ártúrli baǵyttar boıynsha zertteýler júrgizedi.
«Biz ózgeniń ǵylymı jetistikterin kóshirmeýimiz kerek, kerisinshe, ózimizdikin jasaýymyz qajet. Álemdik deńgeıde suranysqa ıe zertteýler júrgize alatyn ǵalymdar býynyn qalyptastyrý mańyzdy», dedi Toqaev.
Ǵylym men bilim – strategııalyq basymdyq
Prezıdent adamı kapıtaldy, bilimdi, ǵylym men ınnovasııany damytý jańa Konstıtýsııada memlekettiń strategııalyq baǵyty retinde bekitilgenin eske saldy.
Onyń aıtýynsha, bul mindetterdi júzege asyrý ǵylymı qaýymdastyqtan joǵary kásibılikti, jaýapkershilikti jáne otansúıgishtikti talap etedi.
«Bul – kúrdeli mindet, biraq basqa jol joq. Men sizderge úlken úmit artamyn», dep ǵalymdarǵa úndeý jasady Memleket basshysy.
Konstıtýsııa – jańǵyrýdyń irgetasy
Prezıdent sóziniń eleýli bóligi jańa Konstıtýsııanyń róline arnaldy. Toqaevtyń aıtýynsha, eldiń shynaıy jańarýy urandardan emes, quqyqtyq negizdi nyǵaıtýdan bastalady.
«Jańa Konstıtýsııa bizdiń memlekettiligimiz ben egemendigimizdiń senimdi tiregine aınalady. Onyń árbir normasy eldi nyǵaıtýǵa qyzmet etedi», dedi Prezıdent.
Sondaı-aq ol qazaq memlekettiliginiń tarıhı quqyqtyq negizderine – «Qasym hannyń qasqa joly», «Esim hannyń eski joly» jáne «Jeti jarǵyǵa» – nazar aýdardy.
Memleket basshysynyń aıtýynsha, jańa Negizgi zań – qazirgi geosaıası jaǵdaıda azamattardyń arman-muratyn beıneleıtin «shynaıy halyqtyq Konstıtýsııa».
Prezıdent: Adam kapıtaly sapasyn arttyrý úshin bárin jasaýymyz qajet
Osylaısha, Prezıdenttiń Almatyǵa sapary Qazaqstannyń damýyndaǵy strategııalyq baǵdarlardy talqylaýǵa arnalǵan mańyzdy alańǵa aınaldy. Bul baǵytta ǵylymǵa, bilimge jáne memleket úshin basty qundylyq sanalatyn adamǵa erekshe ról berilip otyr.
Aıta keteıik, Prezıdent Qasym-Jomart Toqaev Almaty qalasyna jumys sapary aıasynda ál-Farabı atyndaǵy Qazaq ulttyq ýnıversıtetiniń ǵylymı áleýetimen tanysqanyn habarlaǵan edik.
