Jarapazan aıtyp jarysty

Jarapazan Oraza aıynda orynda­la­­tyn jyr. Qazir ult­tyq dástúrimiz bolyp ketti. Onda adamdy jomarttyqqa, adam­gershilikke, izgilikke úndeıtin áserli shýmaqtar bar. Bul baıqaý ári qasıetti Ramazan aıynyń adamdarǵa berer mol paıdasyn bildirý maqsatynda qolǵa alyn­dy. Oraza ustaǵan adam eń bas­tysy rýhanı kemeldenip,  ish­teı qaıta túlep jańarady. Uıym­dastyrýshylar sol Oraza aıynyń basty nyshany Jarapa­zannyń qazaq dástúrinde alar orny erekshe ekenin aıtady.

Qalalyq ádet-ǵuryp jáne salt-dástúr ortalyǵynyń shyǵar­mashylyq jónindegi orynbasa­ry Raıhan Altybaevanyń málim­deýinshe konkýrs qala ákimdiginiń qoldaýymen Áz Naýryz mere­ke­siniń onkúndigi aıasynda uıym­das­tyryldy. Baıqaýǵa Qazaq­stan­nyń ár óńirinen 11 top kelip qa­tysty. Osynaý konkýrs aıasynda shyǵarmashylyq odaqtarmen kezdesýler, qolóner sheberleriniń kór­mesi, qol kúres, bestas, arqan tartý sekildi qazaq­tyń dástúrli oıyn­dary jáne basqa da qyzyqty is-sharalar ótkizildi.

Qazaqstannyń mádenıet sala­synyń úzdigi, jyrshy-termeshi, qazylar alqasynyń tóraǵasy Abylaı Bórihanovtyń aıtýynsha barlyq komanda óte joǵary daıyndyqpen kelgen. Jarapazan jyry qurylymy jaǵynan kúrdeli óner túrine jatady deıdi termeshi. Onyń pikirinshe jyrdy qaı maqamǵa salyp aıtsa da bola beredi. Ár óńir­diń ereksheligine qaraı túrlishe keledi. Deı turǵanmen, baıqaýda qaty­sýshylardyń óneri Jarapazan shýmaqtarynyń ishki mazmun, mán-maǵynasymen birge maqam-sazyna qaraı da baǵalandy. Sebebi jyrdyń maqamy áýezdi, adamdy ózine baýrap alatyndaı bolý kerek.

Ár óńirdiń ózine tán mazmuny men maqam-sazdary bólek jyrlardy bir arnaǵa toǵystyryp, qalyń kópshilikke tanystyrý maqsaty kózdeldi. О́ner ujymdary qazaq­tyń salt-dástúri boıynsha vıkto­rınalyq suraqtarǵa jaýap berip, ózara jarysty.

Bastapqyda jasy úlken kisi­ler qurdastaryn sáresine oıatý maqsatynda nemerelerin sol úıge júgirtip jiberetin bolǵan. Bala­lardyń áýezdi jyrlaryna erekshe súısingen úı ıeleri, ertesine taǵy kelsin degen nıetpen qoldaryna táttiler ustatqan.

«Jarapazan arabtyń «Jáá Ramazan» degen sózinen shyqqan. Din men dástúrdi qatar nasıhat­taýda qala ákimdigi Qazaq­stan musylmandary dinı basqar­masymen tyǵyz baılanysta jumys júrgizip keledi. Jarapazan oraza ustaý, keń peıildi jomart bolý sekildi dinı qundylyqtar men adamgershilik qasıetterdi tereń jyrlaıdy. Sonymen qatar eldi yntymaq pen aýyzbirshilikke úndeıdi» deıdi Shymkent qalasy bas ımamynyń orynbasary Ahmetjan Kerimbek.

ShYMKENT