Tańǵy saǵat 10:00-den bastap alańdarda ulttyq taǵamdar men qolóner buıymdarynyń jármeńkeleri, master-klasstar men sporttyq jarystar bastaldy. Qonaqtar sıfrlyq is-sharalarǵa qatysyp, robottarmen jáne jasandy ıntellekt múmkindikterimen tanysyp, tehnologııa men ulttyq dástúrdiń úılesimin tamashalaýda.
Esil aýdanynda merekelik sharalar EXPO aýmaǵynda ótýde. Saǵat 10:00-den bastap barlyq alań jumys isteıdi, onyń ishinde zamanaýı sıfrlyq tehnologııalarmen jabdyqtalǵan arnaıy taqyryptaǵy alty kıiz úı bar.
Birinshi kıiz úıde ınteraktıvti dıspleıi bar jasandy ıntellekt avatary ornatylǵan.
Ekinshi jáne úshinshi kıiz úılerde qonaqtar VR-kózildirikter arqyly vırtýaldy álemge ene alady.
Tórtinshi kıiz úı «Zań men tártip» taqyrybyna arnalǵan: munda robot-ıt, dron-polıseı kórsetilip, «Tazabek» keıipkeri qyzmet etedi.
Besinshi kıiz úıde erekshe qajettiligi bar jandar daıyndaǵan ónimderdiń áleýmettik mańyzy bar jármeńkesi uıymdastyrylǵan.
Bul keńistik ınklıýzııany qoldaýǵa jáne áleýmettik kásipkerlikti damytýǵa baǵyttalǵan.
Altynshy kıiz úı qolónershiler jármeńkesine arnalǵan, munda qonaqtar halyq sheberleriniń buıymdarymen tanysyp, ulttyq ónermen jaqynyraq tanysa alady.
Sondaı-aq saǵat 10:00-den bastap jasandy ıntellekt elementteri engizilgen sporttyq jarystar ótýde.
Qonaqtardy taıqazan, shańyraq pishindes arkalar men shatyrlar, qobyz beıneleri sekildi ulttyq naqyshtaǵy shaǵyn sáýlettik formalar qarsy alady.
Saǵat 13:00-de sahnada qazaqstandyq estrada juldyzdarynyń qatysýymen konserttik baǵdarlama bastalady.
Sonymen qatar, 21 naýryz kúni saǵat 14:00-de EXPO halyqaralyq kórme ortalyǵynda (Máńgilik El dańǵyly, 53/1) otandyq óndirýshiler qatysatyn «Naýryz bazary» azyq-túlik jármeńkesi ashylady. Munda «Altyn sapa» syılyǵynyń qatysýshylary men jeńimpazdarynyń ónimderi usynylady.
Qonaqtar úshin konsert, úlken qazanǵa daıyndalǵan naýryz kóje jáne ulttyq taǵamdar jármeńkesi uıymdastyrylady. Kórme ortalyǵynda fotoaımaqtar men uzyndyǵy 12 metrlik LED-tonneli bar ınteraktıvti keńistik jumys isteıdi.
Ortalyq zalda sahna, «Jeti qazyna» ekspozısııasy jáne qyzǵaldaqtar kórmesi ornalastyrylady. Sonymen qatar Nauryz Kitap Fair kitap jármeńkesi men ulttyq sport oıyndary ótedi.
Kelýshiler qazaqsha kúres, asyq atý, sadaq atý, arqan tartý jáne basqa da jarystarǵa qatysa alady.
Balalar úshin jeke art-keńistik uıymdastyrylyp, onda master-klasstar, shyǵarmashylyq sabaqtar men oıyn aımaqtary qarastyrylǵan.
Is-sharalar 22-23 naýryz kúnderi saǵat 10:00-den 18:00-ge deıin jalǵasady.
Nura aýdanynda merekelik sharalar «Astana Arena» mańynda ótýde. Saǵat 10:00-den bastap «Digital Nauryz» taqyrybyndaǵy ınteraktıvti alańdary bar alty kıiz úı jumys isteıdi. Balalar men eresekter úshin attraksıondar, ulttyq stıldegi fotoaımaqtar ashylǵan.
Jasandy ıntellekt tehnologııalary arqyly ulttyq kıimderdi vırtýaldy túrde kıip kórip, estelik sýretter túsirýge bolady.
Saǵat 13:00-de sahnada estrada juldyzdarynyń qatysýymen konsert ótedi. 22 naýryzda baǵdarlama sóıleý men ıntellekt damýyn anyqtaýǵa arnalǵan dıagnostıka jáne Naýryz taqyrybyndaǵy ınteraktıvti gologrammalarmen tolyqtyrylady.
Saraıshyq aýdanynda merekelik sharalar «Qazaq eli» alańynda bastaldy.
Qonaqtarǵa túıeler kerýenimen serýendeý usynylyp, ulttyq dástúrlermen tanysýǵa, fotosýretke túsýge jáne demalýǵa múmkindik jasalǵan.
Sonymen qatar, munda gýmanoıd robot pen robot-ıt tanystyrylýda.
Mádenı baǵdarlama aıasynda «Tumar» etno-folklorlyq ansambli óner kórsetip, Qazaq ulttyq óner ýnıversıtetiniń stýdentteri konsert pen zamanaýı ulttyq sán kórsetilimin usynady.
Saǵat 16:00-de jarys jeńimpazdary marapattalyp, 16:30-da úlken konsert bastalady.
21 naýryz kúni shamamen 20:00–21:00 aralyǵynda ótetin dron-shoý bolmaq.
Baıqońyr aýdanynda merekelik is-sharalar «Atatúrik» saıabaǵynda ótýde.
Munda «Digital-Naýryz» ınteraktıvti aımaǵynda qonaqtar jasandy ıntellekt arqyly ulttyq kıimdegi sıfrlyq portret jasaı alady.
Qonaqtardy «Naýryzaı» men «Naýryzbek» AI-keıipkerleri qarsy alyp, mereke dástúrleri týraly málimet beredi.
Sondaı-aq «Berekeli ashana» jáne «Dám men dástúr» etno-kıiz úılerinde ulttyq taǵamdar usynylady.
Saǵat 12:00-de «Naýryz toıy» – birneshe jas juptyń qatysýymen qazaqtyń dástúrli úılený rásimi ótedi. Jastarǵa bata berilip, «shashý» rásimi jasalady.
Saǵat 13:00-de konserttik baǵdarlama bastalady.
«Qalamgerler» alleıasynda saǵat 12:30-dan bastap konsert, balalarǵa arnalǵan oıyn-saýyq jáne ulttyq sport jarystary uıymdastyrylady.
Memleket basshysy el azamattaryn Naýryz meıramymen quttyqtady
Almaty aýdanynda negizgi alań Astana Music Hall avtoturaǵynda ornalasqan. Munda saǵat 10:00-den bastap merekelik sharalar ótýde, al 13:00-de konsert bastalady.
Bul jerde «Digital Nauryz» sıfrlyq avatary bar kıiz úıler jumys isteıdi.
Qonaqtarǵa VR-kózildirikter usynylyp, Naýryz atmosferasyn vırtýaldy túrde sezinýge múmkindik beriledi.
Saryarqa aýdanynda qalalyq alańda saǵat 10:00-den bastap merekelik kóńil kóterý is-sharalary bastaldy. Konsert saǵat 12:00-de ótedi.
Baǵdarlamanyń ereksheligi – VR-aımaqtary bar taqyryptyq kıiz úıler. Qonaqtar vırtýaldy Qazaqstanǵa saıahat jasap, oıyndarǵa qatysa alady. Sonymen qatar, robototehnıka men jasandy ıntellekt jetistikteri, onyń ishinde gýmanoıd robottar men shapan kıgen bı bıleıtin robot usynylǵan.
Merekelik kóńil kúıdi fotobýdkalar arttyra túsedi, qonaqtarǵa estelik sýretter túsirýge múmkindik beriledi.
Qonaqtardy 10 metrlik «Saryarqa áje» alyp ınstallıasııasy qarsy alady. Alań qazaq dástúrlerine negizdelgen keıipkerlermen jáne ortaǵasyrlyq stıldegi dekorasııalarmen bezendirilgen.
Saǵat 11:00-de qazaqsha kúres jarystary bastalady, oǵan qala turǵyndarynyń kez kelgeni qatysa alady.
Yntymaq kúni: Qazaqstanda Naýryznama onkúndiginiń segizinshi kúni toılanyp jatyr
Eske sala keteıik, «Naýryznama» dekadasy aıasynda qalada 200-den astam is-shara uıymdastyrylǵan – konsertter, ulttyq oıyndar, jármeńkeler, master-klasstar men túrli salt-dástúr kórsetilimderi. Olardyń basym bóligi búginde ótkizilip jatyr.
