ASTANAǴA ANGELA MERKEL KELEDI

Keshe Syrtqy ister mınıstr­liginde osy vedomstvonyń resmı ókili Asqar Abdrahmanov dástúrli brıfıng ótkizdi. Onda... ol áýeli 16 jáne 17 shildede Eýro­pa­daǵy qaýip­sizdik jáne yntymaqtastyq uıymynyń Is basyndaǵy tór­aǵa­sy, Qa­zaq­stannyń Memlekettik hat­shysy – Syrt­qy ister mı­nıstri Qanat Saýdabaevtyń sha­qy­rýymen Uıymǵa múshe 56 mem­le­ket­tiń syrtqy saıası vedom­stvo­lary­nyń bas­shy­lary nemese jo­ǵary mártebeli ókil­deri, Uıymmen yntymaqtastyq jónindegi áriptes 12 memleket, sonymen qosa bir­qatar halyqaralyq uıymdardyń laýazym­dy tulǵalary Almatyda ótetin beıresmı kezdesýde jına­latynyn habarlady. Atal­mysh bas­qosý elimizdiń Eýropadaǵy qaýip­sizdik jáne yntymaqtastyq uıymyna tóraǵalyq etý sheń­be­rindegi eń mańyzdy sha­ralardyń biri bolyp tabylady. Jo­ǵary dárejeli jınalystyń ashylýynda Prezıdent Nursultan Nazarbaev sóz sóıleıdi dep kútilýde, dedi A.Abdrahmanov. Resmı ókildiń aıtýynsha, beı­res­mı kezdesý barysynda oǵan qatysýshylar Uıym keńistiginde ortaq jáne bólinbeıtin qaýip­siz­dik­ti nyǵaıtýdyń keń aýqymdy máselelerin talqyǵa salady. Atap aıtqan­da, 2009 jyly grektiń Korfý aralynda ótken mınıstr­ler­diń alǵashqy beıresmı kezde­sýi­niń qorytyndysy boıynsha iske qosylǵan Korfý prosesi aıasynda Eýropa men Eýrazııa qaýipsizdigi jónindegi únqa­tysýdyń alǵashqy qorytyndylary sarala­natyn bolady. Jınalysqa qatysýshylar, so­nymen qatar, Eýropadaǵy qaýip­siz­dik jáne yn­tymaqtastyq uıy­my­nyń jaýapkershiligi taraıtyn ke­ńistikte jáne odan tys aýmaq­tar­da­ǵy qaýipsizdik máselelerin, sonyń ishinde Qyrǵyzstan men Aýǵanstan jaǵ­daı­yn jáne ha­lyq­aralyq qaýymdas­tyq­tyń atal­mysh elderdi turaqtandyrýdaǵy qyzmetine Uıymnyń qosar úlesin arttyrý joldaryn qarastyrady. Basqosý barysynda josparlanǵan Sammıttiń kún tártibine enýi yqtımal taqyryptardy anyqtaý jumysyna erekshe kóńil bólinedi. Mınıstrlerdiń beıresmı kez­de­sýi kezinde sondaı-aq birqatar janama sharalar ótkizý jospar­lan­ǵan, dedi osy aýqymdy sharaǵa oraı A.Abdrahmanov. Sonyń ishin­de Eýropadaǵy qaýipsizdik jáne yntymaqtastyq uıymy “Úshtiligi­niń” (ıaǵnı, Qazaqstan, Grekııa jáne Lıtva syrtqy ister mı­nıstr­leriniń), Taýly Qarabaq janjalyn beıbit jolmen sheshý joldaryn talqylaý maqsatynda Ázirbaı­jan men Armenııa syrtqy ister mınıstr­leri­niń (quramynda Reseı, Fransııa jáne AQSh bar), Mınsk toby teń tóraǵa­la­ry­nyń (Qanat Saýdabaevtyń qatysýymen) kezdesýleri ótedi. Sonymen qatar, Eýro­padaǵy qaýipsizdik jáne yn­tymaqtastyq uıymy Is basyndaǵy tóraǵasynyń bas­tamasymen Eýro-Atlantıka jáne Eýrazııa aımaq­tary­nyń qaýipsizdigimen aınaly­satyn jeti halyqaralyq uıymnyń (ıaǵnı, EQYU, Eýroodaq, NATO, Eýropa Keńesi, TMD, Ujymdyq qaýipsizdik týraly shart uıymy, Azııa keńesi) basshylary men joǵary laýazymdy ókilderiniń tuńǵysh basqosýy ótedi. Resmı ókil kelesi kezekte 18 shildede Qazaqstan Prezıdenti Nur­sultan Nazar­baev­tyń shaqy­rýy­men Germanııa Fede­ra­tıv­tik Respýblıkasynyń Federaldyq kan­sleri Angela Merkeldiń Asta­naǵa resmı saparmen keletinin jetkizdi. Jo­ǵa­ry deńgeıdegi kelissózder sheńberinde taraptar saıası, saýda-ekonomıkalyq jáne mádenı-gýmanıtarlyq salalardaǵy qazaq-nemis yntymaqtastyǵynyń búgingi ahýaly men keleshegin talqylaıdy. Sonymen qatar, bir­qatar ekijaqty kelisimderge jáne kommersııalyq sharttarǵa qol qoıý, eki eldiń isker toptarynyń qatysýymen bıznes-forým ótkizý josparlanýda. Láıla EDILQYZY.