Kompanııa ókilderiniń, sonyń ishinde óńirlik vıse-prezıdent Vedat Túfekchıdiń sapary yntymaqtastyqtyń aralyq qorytyndylaryn shyǵarýǵa jáne uzaq merzimdi perspektıvaǵa arnalǵan strategııalyq josparlardy aıqyndaýǵa arnaldy.
Dıalog barysynda taraptar buǵan deıin Vashıngtonda «C5+1» formaty aıasynda qol qoıylǵan Memorandýmnyń iske asyrylý barysyn talqylady. CyberShield biryńǵaı kıberqaýipsizdik arhıtektýrasyn qalyptastyrý máselesine erekshe nazar aýdaryldy. Jaslan Mádıev Qazaqstan úshin senimdi sıfrlyq egemendikti qurý jáne synı ınfraqurylymdy qorǵaýdyń proaktıvti modeline kóshý strategııalyq basymdyqtar bolyp tabylatynyn atap ótti. Osyǵan baılanysty, mınıstrlik táýekelderdi naqty ýaqyt rejıminde kórýdi qamtamasyz etetin jáne memlekettik ári korporatıvtik prosesterge jasandy ıntellekt tehnologııalaryn qaýipsiz engizýge múmkindik beretin platformalyq tásilderdi qoldaıdy.
Bilim berý bastamalaryna sholý jasaý kezdesýdiń mańyzdy qorytyndysy boldy. Búgingi tańda yntymaqtastyq is júzindegi nátıjelerin berýde: elimizdiń bes jetekshi joǵary oqý ornynda (QBTÝ, SDU, Coventry University Kazakhstan, De Montfort University Kazakhstan, AEJBÝ) stýdentterdi oqytý bastaldy, al 7 sáýirde Astana IT University bazasynda kıberqaýipsizdik akademııasynyń resmı ashylýy ótti. Sonymen qatar, memlekettik jáne kvazımemlekettik sektordyń 30-dan astam beıindi ınjeneri halyqaralyq standarttar boıynsha kásibı oqýdan ótti.
Qazaqstanda sý únemdeý tehnologııalaryn engizý qarqyny 5 ese artty
Sondaı-aq, taraptar memlekettik organdarda iske asyrylyp jatqan aǵymdaǵy pılottyq jobalarǵa toqtaldy. Sońǵy núktelerdi qorǵaý (XDR), qaýipsizdik ortalyqtaryn avtomattandyrý jáne bulttyq tehnologııalar (SASE) boıynsha zamanaýı sheshimderdi testileý jahandyq tájirıbelerdi Qazaqstannyń ulttyq qajettilikterine qoldaný múmkindigin obektıvti baǵalaýǵa múmkindik beredi.
Kezdesý sońynda qatysýshylar aldaǵy bes jylǵa arnalǵan birlesken josparynnyń qadamdaryn belgiledi. Ol tehnologııalyq almasý men ulttyq saraptamany damytýdy ǵana emes, sonymen qatar normatıvtik-quqyqtyq baza boıynsha birlesken jumysty da qamtıdy. Atap aıtqanda, JI jáne bulttyq sheshimderdiń qaýipsizdigine qoıylatyn ózekti talaptardy ázirleý josparlanýda, bul ózgermeli jahandyq syn-qaterler jaǵdaıynda eldiń sıfrlyq ekojúıesiniń turaqtylyǵyn qamtamasyz etedi.
