Jumys saparyna ortalyq memlekettik organdardyń, Úkimet apparatynyń ókilderi, sondaı-aq Almaty oblysynyń ákimi Marat Sultanǵazıev qatysty.
Tekserý barysynda Qonaev qalasyndaǵy kommýnaldyq jaǵajaılar men «ASP Arena» kópfýnksıonaldy kesheni qaraldy. Oblys ákimdigi men beıindi qyzmetter sanıtarııalyq daıyndyq, qaýipsizdik sharalary, medısınalyq, qutqarý jáne quqyq qorǵaý qyzmetteriniń jumysy, sondaı-aq demalýshylarǵa qolaıly jaǵdaı jasaý jóninde baıandady.
Aıda Balaeva nysandardyń tolyq daıyndyǵyn dál qazirden bastap qamtamasyz etý qajettigine erekshe nazar aýdardy. Sonymen qatar halyqpen ýaqytyly túsindirý jumystaryn júrgizýdiń, sýdaǵy qaýipsizdikti, azyq-túlik qaýipsizdigin qamtamasyz etýdiń jáne qoǵamdyq tártipti saqtaýdyń mańyzdylyǵyn atap ótti.
Úkimet jańa Konstıtýsııany túsindirý jónindegi is-sharalar josparyn bekitti
Sonymen birge barlyq jaǵajaılar men demalys aımaqtary ákimdikterdiń qaraýynda emes ekeni de arnaıy aıtyldy. Osyǵan baılanysty Aıda Balaeva jekemenshik nysandardyń ıeleri de tazalyqqa, qoǵamdyq tártipke, ınfraqurylymnyń jaı-kúıine jáne eń aldymen adamdardyń sýdaǵy qaýipsizdigine tolyq jaýapkershilikpen qaraýǵa tıis ekenin aıtty. Oblys ákimdigine demalys aımaqtary ıeleriniń atyna qaýipsizdikti qamtamasyz etý, sanıtarııalyq talaptardy saqtaý jáne jazǵy maýsym kezeńinde jumysty tıisti deńgeıde uıymdastyrý jónindegi usynymdar qamtylǵan tıisti habarlamalar ázirleý tapsyryldy.
Budan bólek, týrızm jáne sport mınıstrine týrıstik nysandar ıeleri men jeke kompanııalardyń qajetti ınfraqurylymdy qamtamasyz etýine, qaýipsizdik talaptaryn saqtaýyna jáne belgilengen normalardy oryndaýyna qatysty jaýapkershiligin retteıtin quqyqtyq tetikterdi pysyqtaý tapsyryldy. Jekemenshik demalys aımaqtary azamattar men memleket aldyndaǵy tıisti jaýapkershiliksiz tek kommersııalyq qyzmetpen ǵana shektelmeýge tıis ekeni basa aıtyldy.
2029 jylǵa deıin halyqtyń tabysy qalaı artady? Úkimet jańa baǵdarlama ázirlep jatyr
Premer-mınıstrdiń orynbasary týrıstik aımaqtarda jumys isteıtin qoǵamdyq tamaqtaný oryndary men ózge de servıstik nysandar qyzmetiniń zańdylyǵyn baqylaý qajettigine de aıryqsha nazar aýdardy. Ýákiletti organdarǵa eńbek zańnamasynyń saqtalýyn, qyzmetkerlermen, onyń ishinde jumysqa tartylatyn jastarmen jáne stýdenttermen jasalǵan eńbek sharttarynyń bolýyn, sondaı-aq eńbek qaýipsizdigi talaptarynyń oryndalýyn tekserýdi qamtamasyz etý tapsyryldy. Azamattardyń quqyqtary tolyq kólemde saqtalýǵa tıis ekeni atap ótildi. Bul demalýshylardyń da, jergilikti turǵyndar men qyzmetkerlerdiń de quqyqtaryna birdeı qatysty.
Sonymen qatar kólik logıstıkasy, avtoturaqtardyń jetkiliktiligi, jol qozǵalysyn uıymdastyrý jáne jappaı demalys oryndaryndaǵy kólik aǵynyn retteý máselesi de kóterildi. Qoǵamdyq tártip pen qaýipsizdik talaptaryn buzýǵa qatań áreket etý qajettigi bólek kórsetildi. Aıda Balaeva barlyq belgilengen talaptar múltiksiz saqtalýǵa tıis ekenin, al quqyq buzýshylarǵa qatysty sharalar ýaqtyly ári zańnamaǵa sáıkes qabyldanýy qajet ekenin atap ótti.
«Taza Qazaqstan ıdeologııasy jaı uran bolyp qalmaı, týrıstik nysandardyń jaı-kúıinen kórinis tabýy kerek. Ol tazalyqtan, tártipten, keńistiktiń túsinikti uıymdastyrylýynan jáne ortaq demalys ornyna degen qurmetten baıqalýǵa tıis. Al «Zań men tártip» qaǵıdaty barlyq qyzmettiń naqty ári úılesimdi jumysynan jáne qaýipsizdik talaptary men qoǵamdyq tártip normalaryn buzǵandarǵa qatysty sharalardyń bultartpaı qoldanylýynan kórinýi qajet», dedi Aıda Balaeva.
Jumys saparynyń qorytyndysy boıynsha Premer-mınıstrdiń orynbasary aýmaqtardyń sanıtarııalyq jaǵdaıyn kúsheıtýdi, ınfraqurylym men qaýipsizdik qyzmetteriniń daıyndyǵyn qamtamasyz etýdi, halyqpen profılaktıkalyq túsindirý jumystaryn jandandyrýdy, sondaı-aq kommýnaldyq jáne jekemenshik demalys nysandaryna júıeli baqylaý ornatýdy tapsyrdy. Sonymen birge zańdylyqtyń saqtalýyna, azamattardyń eńbek quqyqtaryn qorǵalýyna jáne menshik ıeleriniń qaýipsizdik, tártip pen kórsetiletin qyzmet sapasy úshin jaýapkershiligine erekshe mán berildi.
