Basqosýda Jaqyp Asanov kásibı ósýdiń negizgi faktory – artyq ári tıimsiz úderisterden aryla otyryp, shyn máninde mańyzdy mindetterge shoǵyrlana bilý ekenin atap ótti.
«Kez kelgen júıede saldarmen ǵana kúresip qoımaı, túpki sebepti taýyp, olardy joıý mańyzdy. Artyq mindetter men shekten tys júkteme damýǵa kedergi keltiredi. Negizgi baǵyttarǵa basymdyq berip, naqty nátıjege qol jetkizý qajet», dep atap ótti vıse-spıker.
Kezdesý barysynda Jaqyp Asanov myqty komandanyń mańyzy men sapaly kadrlyq irikteýge nazar aýdaryp, jaýapkershilik, motıvasııa jáne qyzmetkerlerdiń jeke qasıetteri jemisti jumystyń negizi ekenin basa aıtty.
«Qazirgi memlekettik qyzmet basqarýdyń jańa tásilderin, sonyń ishinde úderisterdi sıfrlandyrý men jobalyq basqarýdy engizýdi talap etedi. Bul jumys tıimdiligin aıtarlyqtaı arttyryp, sheshim qabyldaýdy jedeldetýge múmkindik beredi», dedi Jaqyp Asanov.
Jas mamandardyń óńirlerdi jáne búkil eldi damytýdaǵy róli erekshe ekeni bólek ataldy. Osyǵan baılanysty kezdesýge qatysýshylarǵa kásibı daǵdylaryn únemi shyńdap, jańa bilimge umtylý jáne nátıjege baǵyttalǵan bolý usynyldy.
Is-sharaǵa jergilikti atqarýshy, memlekettik organdardyń aýmaqtyq bólimsheleriniń ókilderi, sondaı-aq óńirdiń memlekettik jas qyzmetshileri qatysty.
