Bıyl jyl basynda «Eren eńbegi úshin» medalimen marapattalǵan Darhan Saǵdashuly Qaraǵandy qalasynda dúnıege kelgenmen, balalyq shaǵy Shyǵys Qazaqstan óńirinde ótti. 1994 jyly Úlken Naryn aýdanyna qarasty Novo-Berıozovka orta mektebiniń tabaldyryǵyn attap, 2004 jyly osy bilim ordasyn aıaqtady. Erte kezden tehnıkalyq pánderge beıimi bar ol bolashaq kásibin sanaly túrde tańdady. Sol jyly D.Serikbaev atyndaǵy Shyǵys Qazaqstan tehnıkalyq ýnıversıtetiniń jylý-elektrmen qamtamasyz etý fakýltetine oqýǵa túsip, «Jylý energetıkasy» mamandyǵyn aldy. Ýnıversıtette alǵan teorııalyq daıarlyq pen óndiristik oılaý mashyǵy onyń keıingi eńbek jolyna berik negiz qalady. 2008 jyly joǵary oqý ornyn támamdaǵan soń, jas maman eńbek jolyn «О́skemen JEO»-da bastady.
Alǵashqy jyldary ortalyqtandyrylǵan jóndeý sehynda termo oqshaýlaýshy, otqa tózimdeýshi bolyp eńbek etti. Qazandyq agregattary men qubyr júıelerindegi jylý oqshaýlaý jumysy stansa tıimdiligine tikeleı áser etetin jaýapty ýchaske sanalady. Darhan Saǵdashuly ózine júktelgen mindetterdi tııanaqtylyqpen oryndap, tehnologııalyq tártipti qatań saqtaıtyn maman retinde qalyptasty. Atqarylǵan jumys jabdyqtardyń senimdiligin arttyryp, jylý shyǵynyn azaıtýǵa múmkindik berdi.
«Jumysqa ábden tóselip aldyq. Sonyń ózinde ár qımylymyz óte jaýapty. Jylý júıesi syrt kózge ońaı kóringenimen, óte kúrdeli úderis. Mundaǵy mamandardyń qaı-qaısysy da óz isiniń naǵyz sheberi», deıdi Darhan.
Qyzmet babynda satylap ósken maman 2014 jyldan jabdyqtardy paıdalaný, jóndeý jónindegi tehnık qyzmetin atqardy. Stansanyń negizgi tehnologııalyq júıeleriniń turaqty jumysyn qamtamasyz etýge eleýli úles qosty. О́ndiristik úderisterdi tereń túsinýi men tájirıbege súıengen sheshimderi onyń kásibı deńgeıin bekemdeı tústi. Sóıtip, 2023 jylǵy tamyzda hımııalyq sý tazalaý sheberi laýazymyna aýystyryldy. Qysqa merzim ishinde jańa baǵyttaǵy jumysty júıelep, ujym qyzmetin tıimdi uıymdastyra bildi. Hımııalyq sý tazalaý – jylý elektr ortalyǵy jumysyndaǵy negizgi býyndardyń biri. Sý sapasyna qoıylatyn talaptardyń saqtalýy jabdyqtardyń uzaq ári apatsyz qyzmet etýin qamtamasyz etedi. Osy jaýapkershilikti tereń sezinetin maman óndiristik tártip pen qaýipsizdik talaptaryna aıryqsha mán beredi.
Darhan Saǵdashuly únemi óndiris tıimdiligin arttyrýǵa baǵyttalǵan usynysymen erekshelenedi. Tehnologııalyq úderisterdi jetildirý, resýrstardy utymdy paıdalaný jónindegi bastamalary stansanyń paıdalaný shyǵyndaryn tómendetýge, tehnıkalyq senimdiligin arttyrýǵa yqpal etti.
Eńbek adamyna tán taǵy bir qyry – keıingi býynǵa baǵyt-baǵdar berý. Ol jas mamandardy baýlyp, olardyń boıynda óndiristik mádenıet pen jaýapkershilik qaǵıdatyn qalyptastyrýǵa erekshe kóńil bóledi. Ujymdy uıymdastyra bilýi, talap pen ádildikti ushtastyrýynyń arqasynda áriptesteri arasynda bedelge, syı-qurmetke ıe. Búginde Darhan óz isine adal, óndiristiń jaýapty ýchaskesinde tabandy eńbek etip júrgen tájirıbeli maman. Osyndaı azamattardyń eńbegi arqyly el energetıkasy damyp, qoǵamnyń turaqty tirshiligi qamtamasyz etilip otyr.
О́SKEMEN
