Sýret: Olympic.kz
- Birikken kúres álemi (UWW) resmı saıtynda balýandardyń reıtıngin jarııalady. Erkin kúresten otandastarymyzdyń arasyndaǵy eń úzdik nátıje Asyljan Esengeldige tıesili. 61 kg salmaqtaǵy qandasymyz úshinshi oryndy ıelenip tur. Nurqoja Qaıpanov (70 kg) pen Kamıl Kýrýglıev (97 kg) besinshi satyǵa jaıǵasty. Azamat Dáýletbekov TOP-10-dyqty túıindedi. Grek-rım kúresinde Aıdos Sultanǵalıdyń (60 kg) ózgelerden kóshi ilgeri. Byltyr álem chempıony atanǵan sańlaq ekinshi orynda nyq tur. Demeý Jadyraev (77 kg) pen Islam Evloev (87 kg) úzdik altylyqtyń qatarynda. Mereı Máýletqanov (72 kg) jetinshi orynda. Sondaı-aq Erbol Kamalıev (60 kg), Álmır Tólebaev (82 kg), Oljas Syrlybaı (130 kg) TOP-10 balýannyń qataryna enip otyr. Áıelder kúresinen Jámılá Baqbergenova (72 kg) jetinshi, Vıktorııa Hýsaınova (59 kg) segizinshi satyǵa ornyqty.
- 16 jastaǵy tennısshi Tomırıs Nurjan Aljırde uıymdastyrylǵan jasóspirimder arasyndaǵy halyqaralyq týrnırde top jardy. Fınalda ol reseılik Varvara Vınogradovany utty. Bul – Tomırıstiń ITF Juniors J60 serııasyndaǵy alǵashqy júldesi.
- Tanymal faıter Azamat Baqytov UFC BJJ promoýshenimen kelisimshartqa otyrdy. Nomad Wrestling týrnıriniń eki dúrkin chempıony degen ataǵy bar qandasymyz osy kúnge deıin 9 kezdesý ótkizip, barlyǵynda jeńiske jetti. Alaıda Azamat atalǵan promoýshende brazılııalyq djıý-djıtsý erejesimen aıqasady. Tusaýkeser kezdesýi 21 mamyrda ótedi. Qarsylasy – aýstralııalyq Tomas Devıd.
