Bul kórme – jaı ǵana sýretter jıyntyǵy emes, qazaq kóshpeli órkenıetindegi áıel beınesin zertteýge arnalǵan kórkemdik joba. Avtordyń obektıvine ilingen dúnıelerden ulttyq kıimniń, sheksiz dalanyń, ata-babalar rýhynyń birtutas estetıkalyq kodqa aınalǵanyn baıqaýǵa bolady. Árbir portretti kórneki jyrǵa aınaldyryp, qazaq ulttyq kıimderiniń tereń sulýlyǵyn áıgileıdi.
«Ár sýretti adamdardyń boıynda qazaq mádenıetine qatysty jarqyn estelik qalsa degen tilekpen túsiremin. «Kıiz úı» degen joba bastap, keıingi tórt jylda ulttyq salt-dástúrimizdi áıgileıtin qanshama jandy fotosýret dúnıege ákeldim. Tutynýshylar arasynda ózge ulttyń adamdary barshylyq. Olar bul arqyly ulttyq kıimimizdiń estetıkalyq ereksheligin tereńirek túsinip, elimizge degen súıispenshiligin bildirip jatady. Áshekeılerdi kóbirek qoldanamyn. Sonaý AQSh-tan, Eýropa elderinen kelip, arnaıy túsip ketkender qanshama», deıdi Aıgúl Tólegenova.
Avtor etnostıldi jańasha paıymdap, qazaqtyń ulttyq kıimin mýzeı eksponaty retinde ǵana emes, búgingi kúnniń sánine saı jandy, ózekti mádenıet retinde kórsetedi. Bul – qazirgi jastardy óz tamyrynan ajyramaýǵa, ulttyq jádigerlerdi maqtan tutýǵa shaqyratyn erekshe úndeý. Halqymyzdyń qońyr tirshiligine jaqyn tústerdiń qanyqtylyǵy men beınelerdiń shynaıylyǵy qazaqy bolmysqa jeteleıdi.
Aıta keteıik, Aıgúldiń fotosýretteri elimizben qatar, Reseıde, Fransııadaǵy kórmelerde usynylǵan.
Pavlodar oblysy
