Sýretterdi túsirgen: Iýrıı Bekker
Ekspozısııa kórermendi erekshe kórkem keńistikke jeteleıdi. Sýretshiniń týyndylary ishki áýenge, ýaqyt dınamıkasyna jáne emosııalyq qýatqa toly. Munda tús, faktýra men yrǵaq ózara úılesim taýyp, kópqabatty kórkem «sımfonııaǵa» aınalǵan.
Qazaqstannyń eńbek sińirgen mádenıet qaıratkeri Beısebek Aqanaev sýretshiniń shyǵarmashylyǵyna joǵary baǵa berip, onyń kartınalary ishki mán men mýzykalyq úılesimge qurylǵan tutas energetıkalyq álem qalyptastyratynyn atap ótti.
Kórmede usynylǵan jumystar avtordyń shyǵarmashylyq baǵytyn aıqyn tanytady. Akademııalyq dástúrdiń sheńberinen shyǵyp, óner ıesi abstraktili keskindeme tilin tańdaǵan. Onyń eńbekterinde pishin men tús, yrǵaq pen faktýra ózara árekettesip, kúrdeli ári áserli kompozısııalar túzgen. Bul týyndylar kórermenge emosıonaldyq áser beretin, tereń maǵynaǵa ıe kórkem qurylymdar retinde qabyldandy.
Sezinip kórýge bolatyn fotokórme: Almatylyqtar «sý astyndaǵy ómirdi» tamashalady
Sýretshiniń shyǵarmashylyǵynda natıýrmort janry da jańa qyrynan kórindi. Dástúrli «tynysh» janr bul joly pozıtıvti energııa men kórkem medıtasııa keńistigine aınalǵan. Jaryq pen úılesimge qurylǵan bul jumystar art-terapııalyq sıpatymen erekshelenip, qazirgi zamannyń fılosofııalyq astaryn ashýǵa múmkindik beredi.
Kórme barysynda Madına Muhtarova óz kózqarasymen bólisip: «О́ner shekarasy joq sheksiz álem. Ol adamdy izgilikke bastaıdy. Onyń ortaq tili – meıirim, tazalyq», dep atap ótti. Bul pikir kórmeniń ıdeıalyq ózegin aıqyndaı tústi.
О́nertanýshy ári kórme kýratory Marııa Jumaǵulova sýretshiniń zamanaýı óner keńistigindegi ornyn erekshe atap ótip, onyń abstraktili keskindeme arqyly pishin, tús jáne yrǵaqtyń úılesimdi qurylymdaryn batyl qalyptastyra alǵanyn jetkizdi.
Jalpy, «Ýaqytpen astasqan jol» kórmesi Madına Muhtarovanyń kórkemdik izdenisin, ýaqyt pen keńistik týraly paıymyn jáne zamanaýı ónerdegi ózindik qoltańbasyn aıqyndaǵan mazmundy mádenı is-shara retinde ótti. Kórme kelýshilerge tereń áser qaldyryp, ár kórermendi oı men sezimniń erekshe álemine jeteledi.
