Foto: Densaýlyq saqtaý mınısrligi
Kún jylynǵan saıyn tabıǵatta, ásirese shóp basqan aımaqtarda kenege tap bolý qaýpi joǵarylaıdy. Elimizde juqtyrý qaýpi joǵary 7 endemııalyq óńir anyqtalǵan: Almaty qalasy, Almaty, Shyǵys Qazaqstan, Jetisý oblystary, sondaı-aq Aqmola, Soltústik Qazaqstan, Abaı oblystarynyń jekelegen aýdandary.
Kene ensefalıti – kene shaǵýy arqyly taralatyn, mı men julyndy zaqymdaıtyn qaýipti vırýstyq aýrý. Aýrý asqynǵan jaǵdaıda aýyr nevrologııalyq saldarǵa ákelýi múmkin, sondyqtan aldyn alý sharalaryn qatań saqtaý mańyzdy.
Búgingi tańda eldegi epıdemıologııalyq jaǵdaı turaqty:
- kene ensefalıti jaǵdaılary tirkelgen joq;
- 478 adam medısınalyq kómekke júgingen, onyń ishinde 232-si – balalar;
- zardap shekkenderdiń 97% profılaktıkalyq kómek alǵan.
Aq halatty alaıaqtar kóbeıdi: Densaýlyq saqtaý mınıstrligi azamattarǵa eskertý jasady
Maýsymǵa daıyndyq aldyn ala júrgizilip jatyr. Qaýip tobyndaǵy azamattardy vaksınasııalaý jalǵasyp jatyr – qazirdiń ózinde 5 845 adam egildi. Sonymen qatar elde vaksına men ımmýnoglobýlınniń jetkilikti qory bar. Almaty qalasy jáne Almaty, Jetisý oblystarynda kenege qarsy óńdeý jumystary bastaldy.
Mamandar kene shaǵýynyń aldyn alý úshin qarapaıym, biraq tıimdi sharalardy usynady:
- vaksınasııa – eń senimdi qorǵanys tásili;
- jabyq, ashyq tústi kıim kııý;
- arnaıy repellentterdi qoldaný;
- tabıǵatta bolǵanda bıik shópten aýlaq bolý jáne deneni únemi tekserip otyrý;
- sút ónimderin tutynarda mindetti túrde qaınatý.
Eger kene terige jabysyp qalsa, birden durys áreket etý qajet. Mamandar keneni pınset nemese jip arqyly abaılap alyp tastaýdy, shaǵý ornyn antıseptıkpen óńdeýdi, múmkin bolsa, keneni zerthanaǵa tapsyrýdy jáne mindetti túrde dárigerge qaralýdy usynady. Qajet bolǵan jaǵdaıda 72 saǵat ishinde ımmýnoglobýlın engiziledi.
Densaýlyq saqtaý mınıstrligi atap ótkendeı, kene ensefalıti – aldyn alýǵa bolatyn qaýipti aýrý. Qarapaıym saqtyq sharalaryn saqtaý jáne ýaqtyly medısınalyq kómekke júginý arqyly óz densaýlyǵyńyzdy jáne jaqyndaryńyzdy qorǵaýǵa bolady.Tabıǵat aıasynda demalǵanda saqtyq tanytý – qaýipsizdiktiń basty kepili.
Densaýlyq saqtaý salasyndaǵy serpin: Elimizde náreste ólimi aıtarlyqtaı tómendedi
