Jumys saparyna ortalyq memlekettik organdardyń, Úkimet apparatynyń, salalyq vedomstvolardyń ókilderi, sondaı-aq Jetisý oblysynyń ákimi Beıbit Isabaev qatysty. Sapar barysynda Úkimet basshysynyń orynbasary qonaqúı keshenderi, káriz-tazartý qurylystary nysany, Kóktuma aýylyndaǵy jaǵalaýdy bekitý ýchaskesi men Úsharal qalasynyń áýejaıyn aralady. Ár baǵyttaǵy nysandar men jobalardyń iske asý qarqyny jóninde baıandaldy.
Oblys ákimdigi jaǵalaýdy jazǵy týrıstik maýsymǵa daıyndaý baǵytynda aýqymdy ári júıeli jumys júrgizip keledi. Bul jumystar Memleket basshysynyń tapsyrmasyna sáıkes júzege asyrylýda. Prezıdent byltyr da týrıstik aımaqtarda tártip ornatý, ınjenerlik jáne kólik ınfraqurylymyn damytý, sondaı-aq ınvestorlar úshin naqty qolaıly jaǵdaı jasaý máselelerine erekshe nazar aýdarǵan bolatyn. Búginde bul másele Memleket basshysynyń aıryqsha baqylaýynda. Atap aıtqanda, jalpy uzyndyǵy 488 shaqyrymdyq Taldyqorǵan – Úsharal sondaı-aq Úsharal – Dostyq avtomobıl joldaryn rekonstrýksııalaý aıaqtalyp, jaǵalaýdyń kólik qatynasy edáýir jaqsarǵan. Úsharal áýejaıynyń ushý-qoný jolaǵyn jańǵyrtýdan keıin iri áýe kemelerin qabyldaýǵa múmkindik jasalyp, qosymsha termınal salý jobasy da ázirlengen.
Týrıstik aımaqtyń ınjenerlik ınfraqurylymy da edáýir nyǵaıtylyp, 57 shaqyrym elektr jelisi men eki qosalqy stansa qurylysy aıaqtaldy. Bul energııa qýatyna tapshylyqty joıyp, aldaǵy kezeńge qajetti elektr energııasynyń qoryn qalyptastyrýǵa múmkindik berdi. Aqshı aýylynda 69 shaqyrym káriz jelisiniń qurylysy aıaqtaldy. Aqshı men Kóktumadan shyǵatyn aǵyn sýlardy tazalap, sýdy tehnıkalyq maqsatta qaıta paıdalanýǵa múmkindik beretin tazartý qurylystary jobasyn iske asyrý jalǵasýda. Nysandy bıylǵy qazan aıynda tolyq jabdyqtap, ınjenerlik jelilerge qosý josparlanǵan. Osylaısha, jaǵalaýdaǵy sanıtarlyq jaǵdaı, sý burý jáne ekologııalyq qaýipsizdik máseleleri kezeń-kezeńimen sheshimin taýyp keledi.
Jaǵalaýdy bekitý jumysynyń barysyna da basa nazar aýdaryldy. Joba Alakól jaǵalaýynyń 13 shaqyrym aýmaǵyn qamtıdy. Tekserý barysynda birqatar ýchaskelerde, sonyń ishinde jaǵalaýǵa jaqyn ornalasqan nysandar mańynda jaǵanyń shaıylý belgileri bar ekeni tirkeldi. Týrıstik nysan ıeleriniń aıtýynsha, qys mezgilinde qatqan siri muzdyń kóktemde kóbesi sógilgende topyraqty shaıyp, jaǵajaı aýmaǵyna zaqym keltiredi. Sonyń saldarynan kásipkerler ár maýsym saıyn jaǵajaılardy qalpyna keltirip, abattandyrýǵa shyǵyndanýǵa májbúr. Qazirgi ýaqytta Kóktumada 960 metr, Aqshıde 200 metr aýmaqta jaǵalaýdy bekitý jumysyy atqarylǵan. Bul baǵyttaǵy jumys jalǵasýǵa tıis. О́ıtkeni aýmaqtyń qorǵalýy, nysandardyń saqtalýy jáne jaǵalaýdyń odan ári damýy soǵan tikeleı baılanysty.
Jaǵalaýdyń sanıtarlyq daıyndyǵy jóninde de jeke baıandaldy. Osy maqsatta kommýnaldyq baza nyǵaıtylyp, sanıtarlyq tazartý jumysyna qosymsha 42 birlik arnaıy tehnıka satyp alynǵan. Maýsymdyq brıgadalardyń jumysy kúsheıtilip, qoqysty júıeli shyǵarý, qoǵamdyq keńistikter men jaǵajaı aýmaǵyn kútip ustaý sharalary qolǵa alyndy.
Maýsymnyń jaqyndaýyna baılanysty qaýipsizdik máselelerine de erekshe nazar aýdaryldy. Jaǵalaýda qutqarý bólimsheleri jumys isteıdi, jazǵy kezeńde maýsymdyq qutqarýshylar qosymsha tartylady, tehnıka jáne qural-jabdyqpen jaraqtandyrý kúsheıtiledi. Sonymen qatar beınebaqylaý, dron arqyly monıtorıng, qoldanystaǵy shekteýler men quqyqbuzýshylyqtar úshin jaýapkershilik týraly aqparattyq eskertpeler ornalastyrý kózdelgen. «Taza Qazaqstan», «Zań men tártip» qaǵıdattary jaǵalaýdyń búkil aýmaǵynda naqty kórinis tabýǵa tıis ekeni atap ótildi. Bul eń aldymen tazalyqtan, tártipten, belgilengen talaptardyń saqtalýynan jáne barlyq qyzmetterdiń úılesimdi jumysynan baıqalýy qajet.
Kún tártibinde týrıstik saladaǵy eńbek qatynastary máseleleri de qaraldy. Ásirese jastar men stýdentterge qatysty beıresmı jumyspen qamtýdyń aldyn alý qajettigine erekshe mán berildi. Barlyq eńbek qatynastary, eńbekaqy tóleý jáne eńbek jaǵdaılary turaqty baqylaýda bolýǵa tıis.
Alakóldiń jazǵy maýsymǵa daıyndyǵymen qatar, Balqash kólindegi týrıstik ınfraqurylymdy damytý baǵytynda da jumys júrgizip jatqany aıtyldy. Jaǵalaý aımaǵynyń bas jospary men egjeı-tegjeıli josparlaý jobasy bekitilgen, abattandyrý jumysy júrgizilýde, jaǵajaı ınfraqurylymyn aıaqtaý 15 maýsymǵa josparlanǵan. Sonymen qatar aýmaqty odan ári damytýǵa jáne ınvestısııa tartýǵa baǵyttalǵan ilespe jobalar júzege asyrylyp jatyr.
Aıda Balaeva atqarylǵan jumys jaǵalaýdyń jańa ınfraqurylymdyq negizin qalyptastyryp jatqanyn atap ótti. Sonymen birge demalýshylar aǵynynyń ulǵaıýyn eskere otyryp, basty ólshem naqty nátıje men barlyq qyzmetterdiń daıyndyǵy bolyp qala beretinin aıtty.
Jumys sapary barysynda Premer-mınıstrdiń orynbasary jaǵalaýdyń jazǵy maýsymǵa tolyq daıyndyǵyn qamtamasyz etýdi, negizgi ınfraqurylymdyq jobalardy belgilengen merzimde aıaqtaýdy júktedi. Sonymen qatar qaýipsizdik pen sanıtarlyq kútip-ustaý sharalaryn kúsheıtýdi, demalýshylarǵa arnalǵan kórneki profılaktıkalyq túsindirý jumysyn jolǵa qoıýdy, sondaı-aq týrıster aǵynynyń ósýi men ishki týrızmdi damytýdyń uzaqmerzimdi mindetterin eskere otyryp, týrıstik aımaqty júıeli jańǵyrtýdy jalǵastyrýdy tapsyrdy.
