Ábjan Ábiltaı – qara sózdi kıe tutqan qalamger. Onyń sanaly ǵumyrynyń biraz bóligi týǵan eli Torǵaı jerinde ótti. Uzaq jyl aýdandyq, oblystyq basylymdarda qyzmet istep, jýrnalıstıkada qoltańbasyn qaldyrdy. Alaıda Ábjan aǵany el arqaly aqyn dep biledi. Buǵan deıin birneshe jyr jınaǵy jaryq kórgen. Aqyn poezııasynda órlik pen rýh erkindigi aıqyn kórinip turady. Sondaı-aq onyń shyǵarmashylyǵyna ádebıettegi aǵa býyn ókilderi men synshylar joǵary baǵa bergen.
Qalamgerdiń taǵy bir qyry – aýdarmashylyǵy. Bul salada da ónimdi eńbek etti. «Mádenı mura» baǵdarlamasy aıasynda E.Zolıa, N.Gogol, I.Brodskıı sııaqty ádebıet klassıkteriniń týyndylaryn tárjimeledi. Álemge áıgili S.Esenın, E.Evtýshenko, R.Rojdestvenskıı, A.Voznesenskıı, K.Nasrýllo, G.Safıeva sekildi aıtýly aqyndardyń óleńderin qazaqsha sóıletti. Sonymen birge biraz jyl memlekettik qyzmet salasynda da ter tógip, qazaq tiliniń termınologııalyq sózdigin jetildirý men aýdarma isin damytýǵa atsalysty.
Ádebı keshti Jazýshylar odaǵy Astana qalalyq fılıalynyń dırektory, aqyn Baýyrjan Babajanuly júrgizdi. Jıyn quttyqtaýlarmen bastaldy. Aldymen Astana qalasy Tilderdi damytý jáne arhıv isi basqarmasynyń basshysy Sáken Esirkep Memleket basshysynyń quttyqtaýyn oqyp berdi. Odan keıin Jazýshylar odaǵynyń tóraǵasy Mereke Qulkenovtiń lebizi men syı-sııapaty da tapsyryldy.
Jıynda elordalyq qalamgerler daryndy tulǵanyń aqyndyǵy, aýdarmashylyǵy, azamattyǵy týraly salmaqty sóz órbitti. Máselen, jazýshy Mádı Aıymbetov kesh ıesiniń aýdarmashylyq eńbegine toqtaldy.
«Memlekettik qyzmette júrip, shyǵarmashylyqpen aınalysý ońaı emes. Biraq Ábjan – osy qıyndyqtan jol taba bilgen qalamger. Onyń aqyndyǵy týraly sóz basqa. Al aýdarmashylyq ónerine únemi tántimin. Aıtalyq, ataqty aqyn I.Brodskııdiń poezııasyn keremet aýdarǵan. Quddy, aqyn óleńderi Ábjannyń óz týyndysy sekildi. Qazaqy naqyshty ıirimge baı. Sondaı-aq ol zań salasynyń termınologııasyn qalyptasyrýǵa da mol úles qosty», dedi ol. Al kórnekti aqyn Serik Turǵynbekuly Ábjannyń bolmysy men poezııasynda Maǵjanǵa uqsas qasıetter kóp ekenin tilge tıek etti. Jazýshy-jýrnalıst Qaısar Álim óz sózin qalamgerdiń uly babasy, Torǵaı aqyndyq mektebiniń iri ókili Seıdahmet Beısenulynan bastady.
«Ahmet Baıtursynuly «Ádebıet tanytqysh» atty zertteýinde Seıdahmettiń óleńderine taldaý jasaǵan. Bul – aqyn poezııasynyń myqtylyǵyn aıǵaqtaıtyn mysal. Ábjan – Seıdahmet aqynnyń shóberesi. Onyń óleńderinde de babasynan daryǵan ótkirlik, kemeldilik, parasattylyq tunyp tur», dedi. Is-shara barysynda basqa da azamattar sóz alyp, jyly pikirlerin bildirdi. Án aıtylyp, kúı tartyldy. Kesh sońynda aqyn jańa óleńderin oqyp, jıynǵa kelgen qaýymǵa rızashylyǵyn jetkizdi.
