- Qatysýshylar tizimine ázirge 18 jerlesimiz enip otyr. Olar taekvondo (+63 kg, qyzdar), jaǵajaı voleıboly (eki sportshy, uldar), tas joldaǵy velosport (toptyq jarys, uldar, qyzdar, jekeleı jarys (jekeleı ýaqytqa), uldar, qyzdar), trıatlon (jekeleı sprınt, uldar), semserlesý (qylysh, uldar), breıkıng (qyzdar), boks (70 kg, uldar, 54 kg, qyzdar, 57 kg, qyzdar), dzıýdo (52 kg, qyzdar), júzý (100 metr erkin tásil, uldar, 50 metr arqamen júzý, qyzdar), sporttyq gımnastıka (jekeleı kópsaıys, uldar, qyzdar), jeńil atletıkadan (dısk laqtyrý, uldar, 400 metrge kedergiler arqyly júgirý, qyzdar) baq synaıdy.
- Elimizdiń birinshi raketkasy Aleksandr Býblık Monte-Karloda ótip jatqan, júlde qory 6 309 095 eýrony quraǵan ATR-1000 týrnırin ekinshi kezeńnen bastady. Osy mejede ol fransııalyq Gael Monfısti 6:4, 6:4 esebimen utty. Endi chehııalyq Irjı Legechka (ATR №13) men chılılik Alehandro Tabılo (ATR №39) arasyndaǵy kezdesýdiń jeńimpazymen kúsh synasady. Al irikteý synynan irkilmeı ótken Aleksandr Shevchenko (ATR №77) negizgi dodanyń tusaýkeser kezdesýinde horvatııalyq Marın Chılıchke (ATR №51) ese jiberdi – 1:6, 3:6.
- 12 sáýirde Tashkentte taekvondodan jasóspirimderdiń álem birinshiliginiń shymyldyǵy túriledi. Jarysta elimizdiń týy astynda myna daıan sheberleri óner kórsetedi: uldar – Saǵı Mádıuly (45 kg), Erasyl Erzat (48 kg), Ádilet Sheri (51 kg), Islam Medetbaı (55 kg), Nuraly Mahmut (59 kg), Muhammedáli Mahmut (63 kg), Álıdar Ábdýkárimov (68 kg), Janaıbek Shamuratov (73 kg), Bekzat Ǵazız (78 kg), Amanaı Quralbaev (+78 kg); qyzdar – Shahrızoda Akramova (42 kg), Aıym Serikbaeva (44 kg), Sulý Ábıbýlla (46 kg), Janelıa Jaqsylyqova (49 kg), Eleanora Sheraly (52 kg), Nuraılym Baqytjanqyzy (55 kg), Evelına Ábdirasulova (59 kg), Lıýbov Iýn (63 kg), Balgerim О́tegen (68 kg), Sabına Turtýlova (+68 kg).
- 18 sáýirde AQSh-tyń Fılodelfııasynda ótetin RAF 08 týrnırinde erkin kúresten álem chempıony Rızabek Aıtmuhan aty ańyzǵa aınalǵan jergilikti balýan Kaıl Snaıdermen beldesedi. Snaıder – Rıo Olımpıadasynyń jeńimpazy, Tokıo Olımpıadasynyń kúmis júldegeri, álemniń tórt dúrkin chempıony, tórt dúrkin júldegeri, Álem kýboginiń eki dúrkin ıegeri, Panamerıka oıyndarynyń úsh dúrkin jeńimpazy, óz qurlyǵynyń jeti dúrkin chempıony. Balýandar osydan bir jyl buryn Almatyda kúsh synasqan edi. Ol kezde amerıkalyq apaıtós aıqyn basymdyqpen jeńiske jetti.
- 12–18 sáýir kúnderi Ispanııada shaıbaly hokkeıden IB dıvızıonyndaǵy áıelder arasynda álem chempıonaty ótedi. Jarys kestesine saı elimizdiń quramasy myna komandalarmen kúsh synasady: 12 sáýir – Latvııa, 13 sáýir – Nıderland, 15 sáýir – Ispanııa, 17 sáýir – Ońtústik Koreıa, 18 sáýir – Ulybrıtanııa.
- Sport tarıhynda qarjylaı turǵydan eń kóp tabys tapqan sańlaqtardyń esimderi jarııalandy. Baı-qýattylar kóshin Maıkl Djordan bastap tur. AQSh-tyń ataǵy jer jarǵan basketbolshysy óz mansabynda 4,5 mlrd dollar tapqan. Ekinshi orynda – Taıger Výds. Amerıkalyq golfshynyń tabysy – 2,88 mlrd. Úshinshi satyǵa áıgili fýtbolshy Krıshtıaný Ronaldý jaıǵasty (2,52 mlrd). Sondaı-aq TOP-10-dyqqa basketbolshy Lebron Djeıms (2,03 mlrd), fýtbolshylar Lıonel Messı (1,99 mlrd) men Devıd Bekhem (1,68 mlrd), golfshylar Arnold Palmer (1,85 mlrd) men Djek Nıklaýs (1,83 mlrd), tennısshi Rodjer Federer (1,67 mlrd), boksshy Floıd Meıvezer (1,57 mlrd) enip otyr.
