Qazybek Isa osydan úsh jyl buryn Parlamentte dinı teris aǵymdarǵa zańmen tyıym salý máselesi kóterilgenin tilge tıek etip, alaıda sodan beri naqty nátıje baıqalmaǵanyna, kerisinshe qoǵamda radıkaldy aǵymdardyń yqpaly kúsheıip bara jatqanyna alańdaýshylyq bildirdi.
«Sońǵy ýaqytta eldi dúrliktirgen birneshe keleńsiz jaıttar sonyń aıǵaǵy. Onyń biri – Naýryz merekesine qarsy jasalǵan arandatýshylyq áreket bolsa, ekinshisi – qoǵamda úlken rezonans týdyrǵan atyshýly ımamnyń isi.
Aqtóbede sottalýshylardyń áıelderiniń betin búrkemelep sotqa kelýi de qoǵamda qyzý talqyǵa tústi. Zańda qoǵamdyq orynda betti búrkeýge shekteý bolsa, nege bul talap sot ǵımaratynda saqtalmaı otyr degen zańdy suraq týyndaıdy. Eger zańnyń talaptary osylaı elenbese, basqa jerdegi jaǵdaı qandaı bolmaq?», dedi depýtat.
Depýtattyń aıtýynsha, berik ustanymnyń bolmaýy ulttyq tutastyqqa syzat túsirip, eldiń ishki qaýipsizdigine áser etip otyr. О́tken qasiretterden sabaq alýdyń ornyna, tek baqylap otyrý jetkilikti me? Qazirdiń ózinde qaýiptiń aldyn alý qajet ekeni anyq.
«Ulttyq qundylyqtarǵa qarsy kez kelgen áreket – memleketke qarsy shabýyl. Áleýmettik jelilerde ulttyq múddege qarsy, tutastyqty buzýǵa baǵyttalǵan pikirler kóbeıip otyr. Bul – ulttyq aqparattyq qaýipsizdikke tóngen qater. Sondyqtan mundaı áreketterge zańmen tosqaýyl qoıý qajet. Qoǵamda ýaǵyz aıtyp júrgenderdiń keıbiri ultty biriktirýdiń ornyna, kerisinshe, iritki salýda. Olardyń qyzmetine naqty baqylaý ornatyp, dinı basqarma tarapynan tıisti sheshimder qabyldanýy tıis», dedi Qazybek Isa.
Depýtat Aıtýar Qoshmambetov jalaqyǵa túsetin salyq júktemesin azaıtýdy usyndy
Depýtat Batys elderinde dinı qundylyqtardy qorlaǵandarǵa zańmen jaýapkershilik qarastyrylǵanyn, al bizde dinı jáne ulttyq qundylyqtarǵa qurmetsizdik tanytatyn áreketterge naqty tosqaýyl álsiz ekenin atap ótti.
«Ár otbasyda túrli dinı kózqarastardyń qaıshylyqqa ákelýi – qoǵamdaǵy kúrdeli máseleniń kórinisi. Bul baǵytta júıeli saıasat pen naqty sheshim qajet. Elimizde radıkaldy jáne dástúrli emes aǵymdardyń taralýy – ulttyq qaýipsizdikke tikeleı qater. Sondyqtan memleket eń aldymen osy qaýipterdiń aldyn alýǵa mindetti.
Radıkaldy aǵymdarǵa zańmen tyıym salý – bostandyqty shekteý emes, kerisinshe, qoǵamdy qorǵaý tetigi. Bul – dindi emes, teris baǵyttaǵy uıymdardy shekteýge baǵyttalǵan shara. Osy turǵydan alǵanda, dinı radıkalızmge qarsy kúres – kez kelgen quqyqtyq memlekettiń qaýipsizdik strategııasynyń ajyramas bóligi. Bul – qoǵamǵa baǵyttalǵan sońǵy eskertý ispetti dabyl. Qaýiptiń aldyn almasaq, saldary aýyr bolýy múmkin», dedi ol.
